اِرِمیا 5 - کتاب مقدس به زبان آذربایجانی جنوبی - نسخه ادبیاورشلئمئن گوناهی 1 «اورشلئمئن کوچهلرئنی گَزئن، اطرافا باخیب فئکئرلهشئن، اونون میدانلارینی آختارین. اگر بئر نفر دوز ائش گؤرَن، حقئقت آختاران آدام تاپاسینیز، من شهری باغیشلایارام. 2 اونلار ”وار اولان تارییا آند اولسون“ دِسهلر ده، یقئن یالاندان آند ائچئرلر.» 3 یارب، گؤزلرئن حقئقته طرف مگر دؤنمهیئب؟ سن اونلاری ووردون، لاکئن آغری حئسّ اتمهدئلر. سن اونلاری قیردین، آمّا عئبرت آلمادیلار. اوزلرئنی داشدان بَرک ادئبلر؛ دؤنمک ائستمهیئبلر. 4 او واخت من ددئم: «بونلار آنجاق یوخسولدورلار، آخماقدیرلار، چونکی ربّئن یولونو، اؤزلرئنئن تاریسینین حؤکملرئنی بئلمئرلر. 5 من بؤیوکلرئن یانینا گدئب اونلارلا دانیشارام، چونکی ربّئن یولونو، اؤزلرئنئن تاریسینین حؤکملرئنی بئلئرلر.» آنجاق اونلارین هامیسی دا بئرلئکده یوغو سیندیریب ائپلری قیریبلار. 6 بونا گؤره ده مِشهدن بئر آصلان چیخیب اونلاری اؤلدورهجک، صحرادان قورد گلئب اونلاری پارچالایاجاق، شهر کناریندا پلنگ کمئن قوراجاق، شهردن چیخان هر آدام پارچالاناجاق. چونکی اونلارین عوصیانلاری چوخدور، دؤنوکلری ساییسیزدیر. 7 «سنی نجه باغیشلایا بئلهرم؟ اؤولادلارین منی ترک ادئب، تاری اولمایان بوتلرئن آدی ائله آند ائچئب. من اونلاری دویدوردوغوم زامان، اونلار زئنا اتدئلر، فاحئشهلرئن اِولرئنه ییغیشدیلار. 8 اونلار بَسلَنمئش، شهوتلی آتلار کئمئدئرلر. هر بئری قونشوسونون آروادینا کئشنهیئر.» 9 رب بویورور: «من بونلارا گؤره اونلاری جزالاندیرماییم؟ بله بئر مئلّتدن قئصاصیمی آلماییم؟ 10 اونلارین اوزوم آغاجلارینین سیرالاریندا گَزئب داغیدین، آمّا بوسبوتون محو اتمهیئن. مِینه بوداقلارینی قوپاردیب آتین، چونکی اونلار ربّئن دیئللر.» 11 رب بویورور: «ائسرایئل و یهودا نسلی منه کامئل خیانت ادئب. 12 اونلار رب حاقّیندا یالان دانیشیب دیئبلر: ”او هچ نه اتمز، باشیمیزا بلا گلمز. نه قیلینج گؤرهجیئک، نه قیتلیق.“ 13 پیغمبرلر بوشبوغازدیرلار. تارینین سؤزو اونلاردا دیئل، قوی اونلارین باشینا بو ائش گلسئن.» 14 بونا گؤره ده قوشونلار تاریسی رب بله دیئر: «بله سؤزلر ددئکلری اوچون، باخ، سؤزلرئمی سنئن آغزیندا اودا، بو خالقی دا اودونا چِوئرهجیم، اود اونلاری یاندیریب قورتاراجاق» 15 رب بویورور: «باخ، ای ائسرایئل خالقی، اوزاقدان اوستونوزه بئر مئلّت گتئرهجیم؛ دئلئنی بئلمهدئیئن، ددئکلرئنی آنلامادیغین گوجلو و قدئم بئر مئلّت. 16 اونلارین اوخدانلاری آچیق قبئر کئمئدئر، هامیسی ائگئد دؤیوشچودور. 17 اونلار سنئن محصول و چؤرهیئنی یئیهجکلر. اوغوللار و قیزلارینی یئیهجکلر، سورولر و ناخیرلارینی یئیهجکلر، مِینهلر و اَنجئر آغاجلارینی یئیهجکلر. اِعتئماد اتدئیئن قالالی شهرلری قیلینجلا داغیداجاقلار.» 18 رب بویورور: «حتّا او گونلر ده سئزی کامئل قیریب یوخ اتمیهجیم. 19 بئر واخت اونلار سوروشاجاقلار: ”نه اوچون تاریمیز رب بوتون بونلاری باشیمیزا گتئردی؟“ او واخت اونلارا بله دِه: ”نجه منی ترک ادئب اؤز اؤلکهنئزده یاد آللاهلارا خئدمت اتدئنئز، اِلهجه ده یاد اِللیلره سئزئن اولمایان اؤلکهده خئدمت ادهجکسئنئز.“ 20 بونو یعقوب نسلئنه اعلان ات، یهودایا اعلان ادئب دِه: 21 ”بو سؤزه قولاق آسین، ای عاغیلسیز و درّاکهسئز خالق، ای گؤزلری اولارکن گؤرمهین! قولاقلاری اولارکن اشئتمهین! 22 مندن مگر قورخمورسونوز؟“» رب بویورور. «منئم حوضورومدا تئترهمئرسئنئز؟ چونکی من ابدی فرمانلا دهنز اوچون قومو سرحد قویموشام، بونا گؤره ده اوندان کچه بئلمز. شَپهلری جوشسا دا، قالئب گله بئلمز. نَعره چکسه ده، کچه بئلمز. 23 آمّا بو خالقین عئنادلی و عوصیانکار اورهیی وار. اونلار آزیبلار، اؤز یوللاری ائله گدئبلر. 24 داها اؤز اورَکلرئنده دِمئرلر: ”گلئن، ائندی تاریمیز ربدن قورخاق، او کی، پاییز و یاز یاغیشلارینی بئزه واختیندا ورئر، موعَیّن بئچئن هَفتهلرئنی بئزئم اوچون قورویور.“ 25 تقصئرلرئنئز بونلاری سئزدن آلیب، گوناهلارینیز سئزی بو نعمتدن محروم ادئب. 26 چونکی منئم خالقیمین ائچئنده پئس آداملار وار: قوش اووچولاری کئمی کمئنده دورورلار، تله قوروب آدام توتورلار. 27 قوشلارلا دولو قفس کئمی، اونلارین اِولری حئیله ائله دولودور. بونون سایهسئنده اوجالیبلار، وارلانیبلار. 28 کؤکدورلر، یوغوندورلار، پئس ائشلرله حدلرئنی آشیبلار، محکمه ائشلرئنی، یِتئملرئن ائشلرئنی عدالتله حلّ اتمئرلر کی، کامیاب اولسونلار. یوخسوللارین حاقّیندان دئفاع اتمئرلر» 29 رب بویورور: «من بونلارا گؤره اونلاری جزالاندیرماییم؟ بله بئر مئلّتدن قئصاصیمی آلماییم؟ 30 بو اؤلکهده حیرتلی و دهشتلی بئر ائش باش ورئب: 31 پیغمبرلر یالاندان نبئلئک ادئرلر، کاهئنلر اؤز ائقتئدارلارینا دایاناراق حؤکم سورورلر. خالقیم دا بونو بَیهنئر! آمّا آخیردا نه ادهجکسئنئز؟» |
@ 2022 Korpu Company