اِرِمیا 3 - کتاب مقدس به زبان آذربایجانی جنوبی - نسخه ادبیخیانتکار ائسرایئل 1 رب دیئر: «اگر بئر آدام اؤز آروادینی بوشاسا، آرواد دا اونو ترک ادئب آیریسینا اَره گتسه، مگر او آدام بئر ده آروادینین یانینا قاییدار؟ بله اتسه، مگر اؤلکه کامئل بئر شکئلده نجئس اولماز؟ آمّا سن چوخلو اویناشی اولان بئر فاحئشهسن؛ آیا گئنه ده منه طرف دؤنورسن؟ 2 باشینی چیلپاق تپهلره طرف قالدیریب باخ. سِوئشمهدئیئن یِر مگر وار؟ صحرادا یاشایان بدوی کئمی یول کناریندا اوتوردون و اویناشلارینی گؤزلهدئن. زئناکارلیغین و پئسلئکلرئنله اؤلکهنی نجئس اتدئن. 3 بونا گؤره ده یاغیشلارین آردی کَسئلدی و یاز یاغیشی یاغمادی. آمّا سن اوزسوز فاحئشهیه اوخشادین، اوتانماق ائستمهدئن. 4 مگر ائندی منی چاغیرمادین: ”آتام، جاوانلیغیمدان بَری سن منئم دوستومسان. 5 مگر همئشهلئک قضبلی اولاجاق؟ مگر ابده کئمی کئن ساخلایاجاق؟“ باخ، دانیشیبسان و گوجون چاتدیغی قدر پئسلئک ادئبسن.» 6 یوشئیانین پادشاهلیغی دؤورونده رب منه ددی: «دؤنوک ائسرایئلئن نه اتدئیئنی گؤردون؟ هر اوجا تپهنئن اوستونه گدئب، بول یارپاقلی آغاجین آلتینا گدئب اورادا فاحئشه کئمی اولوب منه خیانت اتدی. 7 دوشونوردوم: ”بوتون بونلاری ادندن سونرا منه طرف قاییداجاق.“ آمّا او قاییتمادی. خیانتکار باجیسی یهودا دا بونو گؤردو. 8 دفهلرله زئنا اتدئیی اوچون دؤنوک ائسرایئله بوشانما کاغیذی ورئب اونو بوشادیم. لاکئن اونون خیانتکار باجیسی یهودا گئنه قورخمادی، او دا گدئب فاحئشهلئک اتدی. 9 هچ اهمئیّت ورمهدن زئناکارلیغی ائله اؤلکهنی نجئس اتدی، داشلارا و آغاجلارا سجده ادئب خیانت اتدی. 10 بوتون بونلارا باخمایاراق، اونون خیانتکار باجیسی یهودا منه بوتون قلبی ائله یوخ، حئیله ائله اوز توتدو.» رب بویورور. 11 رب منه ددی: «دؤنوک ائسرایئل خائن یهودا ائله موقایئسهده داها صالح اولدو. 12 گت، بو سؤزلری شئمال سمتئنه اعلان ادئب دِه: ”ای دؤنوک ائسرایئل، گری قاییت.“» رب بویورور. «سنه قضبله باخمایاجاغام، چونکی من مرحمتلییَم.» رب بویورور. «همئشهلئک کئن ساخلامارام. 13 آنجاق سن اؤز تقصئرئنی بوینونا آل کی، تارین ربّئن ضئدّئنه عوصیان ادئبسن، هر بول یارپاقلی آغاجین آلتیندا یاد آللاهلارا کؤنول ورئبسن و منئم سؤزومه قولاق آسماییبسان.» رب بویورور. 14 «ای دؤنوک اؤولادلار، گری قاییدین» رب بویورور. «چونکی آغانیز منم. بئر-بئر شهردن، ائکی-ائکی طایفادان چیخاردیب صحیونا گتئرهجیم. 15 اورهیئمه یاتان چوبانلاری سئزه ورهجیم، سئزه آغیل و حئکمتله چوبانلیق ادهجکلر. 16 سئزئن اؤلکهده تؤرهیئب چوخالدیغینیز گونلرده، داها ربّئن عهد ساندیغیندان دانیشمایاجاقلار» رب بویورور. «او ساندیق بئر داها کئمسهنئن آغلینا گلمیهجک، یادا سالینمایاجاق، اونون اوچون داریخمایاجاقلار، تزهسی ده دوزَلدئلمیهجک.» 17 او زامان اورشلئمه «ربّئن تختی» دئیهجکلر. بوتون مئلّتلر ربّئن آدی خاطئرئنه اورشلئمده ییغیشاجاقلار. بئر داها پئس اورَکلرئنئن عئنادکارلیغینا گؤره حرکت اتمیهجکلر. 18 او گونلرده یهودا نسلی ائسرایئل نسلی ائله بئرلهشئب شئمال اؤلکهسئندن آتالارینیزا ائرث وردئیئم تورپاغا بئرلئکده گلهجکلر. 19 من ددئم: «نجه ده ائستردئم، سنی اوغوللاریمین آراسینا قویوم، سنه ائستَکلی تورپاغی-مئلّتلر آراسیندا لاپ گؤزل ائرثی ورئم! گومان اتدئم کی، منی آتام چاغیراجاقسینیز، مندن اوز دؤندَرمیهجکسئنئز. 20 بئر آرواد اؤز اَرئنه نجه خیانت ادئر، سئز ده منه اِله خیانت اتدئنئز، ای ائسرایئل نسلی!» رب بویورور. 21 «لوت تپهلر اوستونده بئر سَس - ائسرایئل اؤولادلارینین آغلاشما و یالواریشلاری اِشئدئلئر، چونکی اونلار یوللارینی آزیبلار، اؤزلرئنئن تاریسی ربّی یاددان چیخاردیبلار. 22 گری قاییدین، ای دؤنوک اؤولادلار، من سئزئن دؤنوکلویونوزه شفا ورهجیم.» اونلار دا دئیهجکلر: «باخ، بئز سنه طرف گلئرئک، چونکی تاریمیز رب سنسن. 23 دوغرودان دا، تپهلردن، داغلاردان گلن های-کوی یالاندیر. اصلئنده ائسرایئلئن نئجاتی، تاریمیز ربدهدئر. 24 جاوانلیغیمیزدان بَری اوتاندیریجی بوتلر، آتالاریمیزین زحمتئنی، سورولرئنی و مال-حیوانلارینی، اوغوللارینی و قیزلارینی تلف ادئب. 25 قوی بئز خجالتئمئز ائچئنده یاتاق، قوی روسوایچیلیق بئزی اؤرتسون، چونکی جاوانلیغیمیزدان ائندئیهجک، بئز و آتالاریمیز، تاریمیز ربّئن ضئدّئنه گوناه اتمئشئک، تاریمیز ربّئن سؤزونه قولاق آسمامیشیق.» |
@ 2022 Korpu Company