اِشَعیا 1 - کتاب مقدس به زبان آذربایجانی جنوبی - نسخه ادبی1 یهودا و اورشلئم بارهسئنده آموص اوغلو اِشَعیایا گؤرونن رؤیا کی، یهودا پادشاهلاری عوزّئیا، یوتام، آخاز، و خئزقئیانین دؤورونده باش وردی. رب خالقینا ائخطار ادئر 2 ای گؤیلر، قولاق آسین، ای یِر اوزو، اشئت! چونکی رب بله دیئر: «اؤولادلار یتئشدئرئب بؤیوتموشم، آمّا اونلار منئم ضئدّئمه عوصیان ادئبلر. 3 اؤکوز یئیهسئنی، اِششَک ده صاحئبئنئن یِملئیئنی تانیییر، لاکئن ائسرایئل خالقی منی تانیمیر، خالقیم آنلامیر.» 4 گوناه ادن مئلّتئن، شر ائشلر آلتیندا اولان خالقین، پئسلئک ادن نسلئن، فاسئد اؤولادلارین وای حالینا! اونلار ربّی ترک ادئبلر، ائسرایئلئن موقدّسئنه حقارتله باخیبلار، اوندان اوز دؤندَرئبلر. 5 نه اوچون گئنه ده دؤیولهسئنئز، نئیه عوصیان اتمکده داوام ادئرسئنئز؟ باش تامامن ناخوش، اورَک تامامن مرئض. 6 بدنئنئز تپهدن دیرناغاجاق ناخوشدور، بئر صاغ یِرئنئز یوخدور: یارالارینیز، زَدهلرئنئز، تزه ضربهلرله وورولموش یارالارینیز، تمئزلَنمهمئش، ساریلمامیش، مَلحَمله یوموشالدیلمامیشدیر. 7 مملکتئنئز وئراندیر، شهرلرئنئز اودلا یانیب، یاداِللیلر گؤزونوزون قاباغیندا تورپاغینیزی یِیئب داغیدیرلار. تورپاغینیز کئمسهسئز قالیب، سانکی یاد آداملار اورانی تالاییب. 8 صَحیون قیزی اوزوم باغینداکی چارداق کئمی، خئیار بوستانینداکی کوما کئمی، موحاصئرهیه آلینمیش شهر کئمی تک قالیب. 9 اگر قوشونلار ربّی، بئزئم خالقدان بئر نچه صاغ قالان آدام قویماسایدی، بئز سودوم کئمی اولاردیق، گومورایا بَنزهیَردئک. 10 ای سودوم باشچیلاری، ربّئن سؤزونو اِشئدئن! سئز، ای گومورا خالقی، تاریمیزین تعلئمئنی اِشئدئن! 11 رب دیئر: «قوربانلارینیزین چوخلوغوندان منه نه؟ یاندیرما قوچ قوربانلاریندان، کؤکَلمئش حیوانلارین پئیئندن دویموشام. گامیش، قوزو، کِچی قانینی ائستهمئرم. 12 حوضوروما گلرکن اَلئنئزده بونلاری گتئرمهیئنئزی کئم ائستهیئر؟ معبدئمئن صَحنلرئنه بوش یِره آیاق باسیرسینیز. 13 منه آرتیق دَیَرسئز تقدئملر گتئرمهیئن، بوخور منده ائکراه یارادیر. پئسلئکله دولو تزه آی مراسئملرئنئزه، سَبّت گونلرئنئزه، موقدّس ییغینلارینیزا دؤزه بئلمئرم! 14 تزه آی جشنلرئنئزدن، بایرام گونلرئنئزدن نئفرت ادئرم. بونلار منه یوک اولوبلار، اونلاری داشیماقدان یورولموشام. 15 بونا گؤره سئز اَل آچیب منه یالواراندا، گؤزلرئمی سئزه یوماجاغام. نه قدر چوخ دوعا ادهسئنئز ده، گئنه قولاق آسمایاجاغام. اَللرئنئز قانلا دولودور، 16 یویونون، اؤزلرئنئزی تمئزلهیئن؛ گؤزومون قاباغیندا ائشلرئنئزی شردن اوزاقلاشدیرین، پئسلئک اتمهیی بوراخین. 17 یاخشیلیق اتمهیی اؤیرهنئن، عدالتی آختارین، مظلوملاری قورتارین، یِتئمئن حاقّینی ورئن، دول آروادی حئمایت ادئن.» 18 رب دیئر: «گلئن، ائندی بئربئرئمئزله بحث اِدَک، گوناهلارینیز قیپقیرمیزی پارچا کئمی گؤرونسه ده، اونلار قار کئمی آغ اولاجاق، توند قیرمیزی رنگه چالسا دا، آغ یون کئمی آغ اولاجاق. 19 اگر سؤزه باخیب ائطاعت ادهسئنئز، تورپاغین لاپ گؤزل بهرهلرئندن یئیَرسئنئز. 20 آمّا اگر منی ردّ ادئب عاصی اولاسینیز، قیلینج سئزی اوداجاق.» دوغرودان دا، بو سؤزلر ربّئن آغزیندان چیخیب. گوناهلی شهر 21 گؤر ربّه وفالی اولان شهر نجه بئر فاحئشهیه دؤنوب! او شهر کی، عدالتله دولو ائدی! بئر زامان اورادا صالحلئک مَنزئل اتمئشدی، لاکئن ائندی قاتئللرله دولودور! 22 گوموشونوز چوروفه چِورئلئب، شرابینیزا سو قاتیلیب. 23 باشچیلارینیز عاصی اولوب اوغرولارلا اَلبئردئر. هر کس روشوَتی سِوئر، بخشئش دالینجا قاچیر. یِتئمئن حاقّیندان دئفاع اتمئرلر، دول آروادین مودافئعهسئنه قالخمیرلار. 24 بونا گؤره ده رب، قوشونلارین پروردئگاری بله اعلان ادئر، ائسرایئلئن قادئر تاریسی بله اعلان ادئر: «دوشمنلرئمدن اؤزومو راحاتلایاجاغام، خصملرئمدن قئصاص آلاجاغام. 25 اَلئمی سنئن ضئدّئنه ده اوزاداجاغام، چوروفونو گئلآبی ائله آریدیب، بوتون ناخالئصلئیئنی سندن تمئزلَیهجیم. 26 او زامان حاکئملرئنی اَوّلکی کئمی، مصلحتچئلرئنی ده باشلانیشدا اولدوغو کئمی گری قایتاراجاغام. سنه تزهدن ”صالحلئک شهری، وفالی شهر“ دیئلهجک.» 27 صحیون عدالتله، تؤوبه ادن ساکئنلری صالحلئکله قورتولاجاق. 28 لاکئن عاصئلرله گوناهکارلار بئرلئکده هلاک اولاجاقلار، ربّی ترک ادنلر یوخ اولاجاقلار. 29 آرزو اتدئیئنئز پالید آغاجلاریندان خجالت چکهجکسئنئز، سِچدئیئنئز باغلاردان اوتاناجاقسینیز. 30 چونکی سئز، یارپاقلاری سولموش چؤل پوستهسی آغاجینا، سوسوز باغا دؤنهجکسئنئز. 31 گوجلو آدام کتان قیرینتیسینا اوخشایاجاق، گؤردویو ائش جرقّه کئمی اولاجاق، بلهجه ائکئسی بئرلئکده یاناجاق، اونلاری سؤندورَن ده اولمایاجاق. |
@ 2022 Korpu Company