عئبرانئلره 13 - کتاب مقدس به زبان آذربایجانی جنوبی - نسخه ادبیآخیر نصئحتلر 1 قویون قارداش محبّتی داوام ورسئن. 2 قرئب آداملارا قوناقپرورلئک اتمهیی یاددان چیخارتمایین، چونکی بونونلا بعضئلر بئلمهدن ملکلره قوناقپرورلئک گؤرسهدئبلر. 3 محبوسلاری اونلارلا محبوس اولانلار کئمی، یاوا رفتار اِدئلَنلری اؤزونوز ده بدنده اولدوغونوزا گؤره یادا سالین. 4 نئکاح گرک هر کسئن طرفئندن حؤرمتلی توتولسون و دؤشهیی ده گرک لکهسئز ساخلانسین. چونکی تاری فاسئقلر و زئناکارلاری موحاکئمه ادهجک. 5 شخصئیّتئنئز پولپرستلئکدن آزاد اولسون، نهیئنئز وارسا، اونونلا کئفایتلهنئن. چونکی تاری اؤزو دیئب: «سنی هچ واخت بوراخمارام، سنی هچ واخت ترک اتمهرم.» 6 بونا گؤره یقئنلئکله دیئرئک: «رب منئم کؤمهیئمدئر، قورخمارام. ائنسان منه نه اده بئلر؟!» 7 سئزی هئدایت اتمئش اولانلاری کی، تارینین کلامینی سئزه ددئلر، خاطیرلایین. اونلارین رفتارینین نتئجهسئنی دئقّتله نظره آلین و اونلارین ائمانیندان نومونه گؤتورون. 8 عئسا مسئح، دونَن، بو گون و ابده کئمی هَمَندئر. 9 فرقلی و قرئب تعلئملرله یولدان آزمایین. چونکی یاخشیدیر کی، اورَک فیضله قووّتلَنسئن، یمکلرله یوخ کی، اونلارلا مشغول اولانلار بئر فایدا تاپمادیلار. 10 بئزئم بئر قوربانگاهیمیز وار کی، عئبادت خیمهسئنده خئدمت ادنلرئن اوندان یمهیه حاقلاری یوخدور. 11 چونکی او حیوانلارین بدنلری کی، قانلاری باش کاهئن طرفئندن گوناه اوچون لاپ موقدّس یره گتئرئلئر، اوردوگاهین اشئیئنده یاندیریلیر. 12 بونا گؤره، عئسا دا، خالقی اؤز قانینین واسئطهسیائله تقدئس اتمک اوچون دروازانین اشئیئنده عذاب چکدی. 13 بونون اوچون گلئن اونون سئتمئنی داشیییب، اوردوگاهدان اشئک اونون یانینا گدک. 14 چونکی بورادا بئزئم دائمی بئر شهرئمئز یوخدور، لاکئن گلهجک شهری آختاریریق. 15 اوندا گلئن اونون واسئطهسیائله دائمن تارییا حمد قوربانی، یعنی، اونون آدینی اعلان ادن دوداقلارین میوهسئنی تقدئم ادک. 16 یاخشیلیق اتمهیی و اؤزگهلرله پایلاشماغی یاددان چیخارتمایین، چونکی تاری بو جور قوربانلاردان خوشلانیر. 17 سئزه رهبر اولانلاردان ائطاعت ادئن و اونلارا موطئع اولون. چونکی اونلار حساب ورهجک کئمسهلر کئمی جانلارینیزین قیدئنه قالیرلار. قویون بونو شادلیقلا اتسئنلر، قمله یوخ کی، سئزئن اوچون فایداسی اولماز. 18 بئزئم اوچون دوعا ادئن؛ چونکی آرخایینیق کی، وئجدانیمیز تمئزدئر و جان آتیریق دا کی، هر شیده حؤرمتلی رفتار ادک. 19 سئزئن هامینیزا یالواریرام کی، بونو داها دا چوخ ادهسئنئز، اِله کی، من تزلئکله یانینیزا قایتاریلیم. 20 ائندی باریش تاریسی کی، قویونلارین بؤیوک چوبانینی، ابدی عهدئن قانی واسئطهسیائله ربّئمئز عئسانی اؤلولردن دئرئلتدی، 21 سئزی هر یاخشی ائشده حاضیرلاسین کی، اونون ائرادهسئنی یرئنه یتئرهسئنئز و عئسا مسئحئن واسئطهسیائله اؤز نظرئنه خوش گلهنی، بئزده عمله گتئرسئن کی، اونا ابددن ابدهجک شؤوکت اولسون. آمئن. 22 آمّا قارداشلار، سئزه یالواریرام کی، بو تشوئق سؤزونو تحمّول ادهسئنئز، چونکی سئزه قیساجا یازمیشام. 23 خبرئنئز اولسون کی، قارداشیمیز تئموتاعوس آزاد اولوب و اگر تزلئکله یانیما گلسه، اونونلا سئزی گؤرهجهیم. 24 بوتون رهبرلرئنئزه و بوتون موقدّسلره سالام یتئرئن. ائتالیادان اولانلار سئزه سالام گؤندَرئرلر. 25 فیض سئزئن هامینیزلا اولسون. |
@ 2022 Korpu Company