اِستِر 1 - کتاب مقدس به زبان آذربایجانی جنوبی - نسخه ادبیفارس پادشاهی اَخَشوِروشون ضئیافتی 1 بو حادئثهلر اَخَشوِروشون دؤورونده باش ورمئشدی. اَخَشوِروش هودّودان کوشا قدر یوز ائیئرمی یدّی وئلایت اوستونده پادشاهلیق ادئردی. 2 او دؤورده پادشاه اَخَشوِروش شوشَن قالاسیندا سلطنت تختئنده اوتورموشدو. 3 پادشاهلیغینین اوچونجو ائلئنده او بوتون ریئسلری و اعیانلاری اوچون بئر ضئیافت قوردو. فارسین و مئدیانین سرکردهلری، اصئلزادهلری و وئلایت باشچیلاری اونون حوضوروندا ائدئلر. 4 او، اوزون مودّت عرضئنده، یعنی یوز هشتاد گون اؤز پادشاهلیغینین جاه-جلالینی، عظمتئنی و پارلاق شؤهرهتئنی نومایئش وردی. 5 بو ضئیافت گونلری قورتاراندان سونرا، پادشاه شوشَن قالاسیندا بؤیوکدن کئچئیه قدر بوتون خالقا، سارایینین حَیَط باغچاسیندا یدّی گون آیری بئر ضئیافت وردی. 6 باغچادا ارغوانی ظرئف کتان قایتانلارلا پامبیق پارچادان آغ و لاجورد پردهلر وار ائدی کی، مرمر سوتونلارداکی گوموش حالقالارا کچئرئلمئشدی. سوماقداشی، مرمر، صدف و آیری قئیمتلی داشلاردان دوزَلدئلمئش دؤشَمه اوستونده قیزیل و گوموش کورسولر قویولموشدو. 7 شرابلار جوربهجور قیزیل جاملاردا قوناقلارا ورئلئردی و پادشاهین سخاوتئنه لایئق شاهانه شراب بول-بول تقدئم ادئلئردی. 8 پادشاهین امری ائله شراب ائچمیه مجبورئیّت یوخ ائدی، چونکی پادشاه شراب مأمورلارینا امر اتمئشدی کی، هر کسه ائستهیئنه گؤره خئدمت گؤرسدئلسئن. 9 ملکه وَشتی ده اَخَشوِروشون ساراییندا آروادلار اوچون ضئیافت قوردو. پادشاهین وَشتئنی ملکهلئکدن چیخارتماسی 10 یدّئنجی گون پادشاهین اورهیی شرابدان نَعشهلَنَنده، یدّی حرم آغاسینا کی، آدلاری مَهومان، بئزِتا، خَربونا، بئگتا، اَبَگتا، زِتَر و کَرکس ائدی، امر اتدی کی، 11 ملکه وَشتی، باشیندا ملکهلئک تاجی ائله، پادشاهین حوضورونا گتئرئلسئن. او ائستهیئردی کی، ملکهنئن گؤزللئیئنی خالقا و ریئسلره نومایئش اتدئرسئن. چونکی ملکه گؤزل ائدی. 12 لاکئن ملکه وَشتی پادشاه امرئندن کی، حرمآغالاری واسئطهسیائله گؤندَرئلمئشدی، اونون حوضورونا گلمک ائستمهدی. پادشاه بونا چوخ قضبلَندی و قضب اورهیئنی یاندیریب یاخدی. 13 پادشاه زامانلاری بئلَن حئکمتلی آداملارلا مصلحتلَشدی، چونکی پادشاها عادت ائدی کی، قانون و عدالتی بئلَن بوتون آداملارلا دانیشسین. 14 کَرشِنا، شِتار، اَدماتا، تَرشئش، مِرِس، مَرسِنا، مِموکان پادشاهین یاخین آداملاری ائدئلر و فارس و ماد پادشاهلیغینین یدّی ریئسی، پادشاهلا اوز-اوزه گؤروشه بئلردئلر و پادشاهلیقدا لاپ اوجا روتبه صاحئبی ائدئلر. 15 پادشاه سوروشدو: «قانونا اَساسن ملکه وَشتئیه نه گرک ادئلسئن؟ او، پادشاه اَخَشوِروشون حرمآغالاری واسئطهسیائله گؤندَردئیی امردن ائطاعت اتمهدی.» 16 مِموکان پادشاهین و ریئسلرئن حوضوروندا ددی: «ملکه وَشتی فقط پادشاها یوخ، بوتون ریئسلرئن و پادشاه اَخَشوِروشون بوتون وئلایتلرئندهکی خالقلارین حاقّیندا یاوا رفتار ادئب. 17 چونکی ملکهنئن بو حرکتی هانسی آروادین قولاغینا چاتسا، اؤز اَرئنه حقارتله باخیب دئیهجک: ”پادشاه اَخَشوِروش امر اتدی کی، ملکه وَشتی اونون حوضورونا گتئرئلسئن، آمّا او ائمتئناع اتدی.“ 18 ملکهنئن بو گون گؤردویو ائشی اشئدن فارس و ماد خانیملاری، پادشاهین بوتون ریئسلری ائله بله رفتار ادهجکلر. بونونلا دا چوخ حقارتلر و قضبلر اولاجاق. 19 اگر پادشاهین گؤزونده خوش گؤرونسه، قوی پادشاه طرفئندن امر ورئلسئن کی، وَشتی بئر داها پادشاه اَخَشوِروشون حوضورونا چیخماسین. پادشاه دا اونون ملکهلئیئنی داها یاخشیسینا ورسئن. قوی بو امر فارسلارین و مادلیلارین قانونلاری آراسینا یازیلسین کی، دَیئشدئرئلمهسئن. 20 پادشاهین وردئیی فرمان اؤز بؤیوک پادشاهلیغینین هر یرئنده اعلان ادئلَنده، بوتون آروادلار، بؤیوکدن کئچئیه قدر، اؤز اَرلرئنه حؤرمتله رفتار ادهجکلر.» 21 بو سؤز پادشاهین و ریئسلرئن خوشونا گلدی، پادشاه مِموکانین تکلئفئنه عمل اتدی. 22 پادشاهین بوتون وئلایتلرئنه یازیلی امرلر گؤندَردی کی، هر کئشی اؤز عایئلهسئنده آغادیر و خالقینین دئلئنده دانیشان دا اودور. بو امرلر هر وئلایته اؤز یازیسی و هر خالقا اؤز دئلی ائله یازیلیب اعلان ادئلدی. |
@ 2022 Korpu Company