۲تسالونئکلیلره 2 - کتاب مقدس به زبان آذربایجانی جنوبی - نسخه ادبی1 ائندی قارداشلار، ربّئمئز عئسا مسئحئن گلئشی و بئزئم اونون یانیندا ییغیلماغیمیز بارهده سئزدن خاهئش ادئرئک کی، 2 «ربّئن گونو چاتیب» دئین هر هانسی بئر روح، بئر کلام، و یا گویا بئزدن گلن بئر مکتوب، فئکرئنئزی تز لرزهیه سالدیرماسین، یا دا پرئشان اتمهسئن. 3 قویمایین هچ کئم سئزی هچ بئر نحوله آلداتسین. چونکی اوّلجه، ائماندان دؤنمه زامانی گلمهمئش و هلاکت اوغولو اولان او شرئعتسئز آدام ظوهور اتمهمئش، او گون گلمیهجکدئر. 4 او آدام هر تاری و یا عئبادت ادئلن شیه ضئدّ دوروب، اؤزونو اوجالداجاق، اِله کی، تارینین معبدئنده اَیلهشئب، اؤزونو تاری کئمی گؤرسدهجک. 5 مگر خاطیرلامیرسینیز کی، حله یانینیزدا اولارکن بو شیلری سئزه دیئردئم؟! 6 و بئلئرسئنئز کی، اونا ائندی نه مانع اولور، اِله کی، اؤز واختیندا ظوهور اتسئن. 7 چونکی شرئعتسئزلئیئن سئرّی ائندی بله ائشدهدئر؛ آنجاق اونا ائندی مانع اولان بله ادهجک، او زاماناجاق کی، آرادان قالدیریلسین. 8 او زامان او «شرئعتسئز» آدام ظوهور ادهجک و رب اونو آغزینین نفسی ائله اؤلدوروب، گلئشئنئن ظوهورو ائله محو ادهجکدئر. 9 یعنی، او ظوهور ادن آدام شیطانین فعالئیّتئنه اَساسلاناراق، بوتون قودرت و علامتلر و یالانچی عجایئبلرله، 10 و هلاک اولانلارین آراسیندا هر جور پئسلئیئن حئیلهسی ائله گلهجکدئر. چونکی حقئقتئن محبّتئنی قبول اتمهدئلر کی، بلهجه نئجات تاپسینلار. 11 بو سببدن تاری اونلارین اوستونه سهوه چکن بئر گوج گؤندَرهجک کی، یالان اولانا ائنانینسینلار 12 اِله کی، حقئقته ائنانمایاییب پئسلئکدن لذّت آپارانلارین هامیسی موحاکئمهیه چکئلسئنلر. 13 لاکئن بئز، ای ربّئن سوگئلئلری اولان قارداشلار، سئزه گؤره گرک همئشه تارییا شوکور ادک. چونکی تاری باشلانیشدان سئزی موقدّس روحون تقدئسی و حقئقته اولان ائمانین واسئطهسیائله نئجات اوچون سچئب. 14 و بونون اوچون ائدی کی، سئزی بئزئم خوش خبرئمئزئن واسئطهسیائله دعوت اتدی. اِله کی، ربّئمئز عئسا مسئحئن شؤوکتئنی قازاناسینیز. 15 بونا گؤره، قارداشلار، مؤحکم دورون و او تعلئملره کی، ائستر سؤز، ائستر مکتوب وسئلهسیائله بئزدن اؤیرندئنئز، باغلی قالین. 16 قوی ائندی عئسا مسئحئن اؤزو کی، بئزی سوئب و بئزه ابدی تسلّی و فیضی ائله یاخشی اومئد ورئب، و آتامیز تاری 17 هر یاخشی عمل و سؤزده اورَکلرئنئزه تسلّی ورئب، قووّتلندئرسئن. |
@ 2022 Korpu Company