۲یوحنّا 1 - کتاب مقدس به زبان آذربایجانی جنوبی - نسخه ادبی

¹ آغساقّالدان حقئقتده سودئیئم سچئلمئش خانیم و اونون اؤولادلارینا؛ و نه آنجاق من، حقئقتی تانییانلارین هامیسی طرفئندن سوئلن.

² بئزده ساکئن اولان و بئزئمله همئشه‌لئک قالان حقئقتئن خاطئری اوچون.

³ آتا تاریدان و آتانین اوغلو عئسا مسئحدن، حقئقت و محبّتده، فیض، رحمت، و باریش بئزئمله اولاجاق.

⁴ چوخ سوئندئم کی، سنئن اوشاقلارین آراسیندا، آتادان آلدیغیمیز امره موطابئق، حقئقتده یاشادیقلارینا راست گلدئم.

⁵ ائندی ای خانیم، سندن خاهئش ادئرم کی، بئربئرئمئزی سِوَک. سنه یازدیغیم بو، تزه بئر امر دیئل، بو امره بئز اِله او باشلانیشدان مالئکئک.

⁶ و محبّت بودور کی، بئز اونون امرلرئنه موطابئق رفتار ادک. بو، باشلانیشدان اشئتدئیئنئز او امردئر کی، اوندا گرک رفتار اده‌سئنئز.

⁷ چونکی چوخ آلدادانلار دونیایا یاییلیبلار کی، عئسا مسئحئن جئسمده گلدئیئنی قبول اتمئرلر. بونو ادن، همن او آلدادان و مسئحه ضئدّ اولاندیر.

⁸ اؤزونوزدن موواظئب اولون کی، بئزئم عمله یتئشتئردئیئمئزی سئز الدن ورمه‌یئب، کامئل بئر پاداشا نایئل اولاسینیز.

⁹ حدّی آشیب مسئحئن تعلئمئنه باغلی قالمایان هچ کئمسه‌ده تاری یوخدور. تعلئمه باغلی قالان هر کسده هم آتا وار هم ده اوغول.

¹⁰ اگر بئر کئمسه یانینیزا گلئب بو تعلئمی گتئرمئر، اونو اِوه قبول اتمه‌یئن، اونونلا دا سالاملاشمایین.

¹¹ چونکی اونونلا سالاملاشان، اونون شر ائشلرئنده شرئک اولور.

¹² گرچی سئزه یازمالی چوخ سؤزوم وار، آمّا ائسته‌مئرم کی، بونو کاغیذ و مورکّبله ادئم. اومئدئم بودور کی، یانینیزا گلم و اوز-اوزه دانیشام، اله کی، شادلیغیمیز کامئل اولسون.

¹³ سنئن سچئلمئش باجینین اؤولادلاری سنه سالام گؤندَ‌رئرلر.