۲قورئنتلیلره 5 - کتاب مقدس به زبان آذربایجانی جنوبی - نسخه ادبی1 بئلئرئک کی، اگر بو یرده اولان چادیر اِوئمئز ییخیلسا، گؤیلرده تاریدان بئر عئمارتئمئز وار؛ اَلله تئکئلمهمئش ابدی بئر اِوئمئز. 2 چونکی بو اِوده آه چکئرئک و آرزولاییریق کی، گؤیدن اولان مسکنئمئزی گِیئنک. 3 نه قدر کی، اونو گِیئنمئشئک، لوت گؤرونمهیهجهیئک. 4 دوغرودان دا بئز بو چادیردا اولارکن، آغیر بئر یوک آلتیندا آه چکئرئک، چونکی سویونماق یوخ، گِیئنمک ائستهیئرئک کی، فانی اولانی حیات اودسون. 5 بئزی بو مقصد اوچون حاضیرلایان تاریدیر کی، موقدّس روحون بِیئنی بئزه وردی. 6 بونا گؤره همئشه جسوروق و بئلئرئک ده کی، بدنده یاشادیقجا ربدن اوزاقداییق. 7 چونکی گؤرونوشله یوخ، ائمانلا رفتار ادئرئک. 8 دیئرم بئز جسوروق و بدندن کؤچوب، ربّئن یانیندا مسکن اتمهیی داها چوخ ائستهیئرئک. 9 اونون اوچون ده چالیشیریق کی، ائستر اِوده ائستر قوربتده، اونا مقبول اولاق. 10 چونکی بئزئم هامیمیزا لازیمدیر کی، مسئحئن حؤکم تختئنئن قاباغیندا ظاهئر اولاق کی، هر بئرئمئز بدنده یاشایارکن گؤردویوموز یاخشی و یا پئس ائشلرئن عوضئنی آلاق. 11 بونا گؤره ربدن قورخماغین نه اولدوغونو بئلهرک بئز، ائنسانلاری قانع اتمهیه چالیشیریق؛ لاکئن نه اولدوغوموز تارییا آشکاردیر و اومئد ادئرم کی، سئزئن وئجدانینیزا دا آشکاردیر. 12 اؤزوموزو گئنه سئزئن یانینیزدا تعرئفلهمئرئک؛ لاکئن سئزه فورصت ورئرئک کی، بئزدن اؤتری فخر اِدهسئنئز، اله کی، اورَکده یوخ، ظاهئرده فخر ادنلره بئر جاوابینیز اولسون. 13 اگر بئز عاغلیمیزی ائتئرمئش اولساق، بو تاری اوچوندور. یوخ، اگر عاغلیمیز باشیمیزدا اولسا، بو سئزئن اوچوندور. 14 چونکی مسئحئن سوگئسی بئزی زورلاییر و بئز قانع اولوروق کی، هامی اوچون بئری اؤلدو، بلهجه هامی اؤلدولر. 15 و او هامی اوچون اؤلدو کی، یاشایانلار آرتیق اؤزلری اوچون یوخ، اونلارین یولوندا اؤلن و دئرئلن اوچون یاشاسینلار. 16 بونا گؤره بئز ائندئدن بله هچ کئمی جئسمانی باخیمدان تانیمیریق؛ اگر مسئحی جئسمانی باخیمدان تانیمیش اولساق دا، آرتیق ائندی اِله تانیمیریق. 17 بونون اوچون کئم مسئحدهدئر، تزه مخلوقدور. کؤهنه شیلر کچدی؛ باخ ائندی هر شی تزه اولوب. 18 بونلارین هامیسی تاریداندیر. او تاریدان کی، بئزی مسئحئن واسئطهسیائله اؤزو ائله باریشدیردی و بئزه باریشدیرما خئدمتئنی وردی. 19 یعنی، تاری مسئحده اولوب، دونیانی اؤزو ائله باریشدیریردی و تقصئرلرئنی اونلارا سایماییردی و باریشدیرما کلامینی بئزئم ائچئمئزده قویوب. 20 دمهلی بئز مسئحئن الچئلرئیئک. اله بئل کی، تاری بئزئم واسئطهمئزله ائرتئباط قورور. مسئحئن عوضئنده سئزه یالواریریق کی، تاری ائله باریشاسینیز. 21 او، گوناهی بئلمهینی، بئزئم عوضئمئزده گوناه اتدی کی، بئز اوندا تارینین صالحلئیی اولاق. |
@ 2022 Korpu Company