ആക്കോവു 1 - സാമിദ് സേദി1 സാമിദ്മ് ആണ്ടവാ് ഏസു ക്റ്സ്ത്ത്ദ്മ് പണ്ണ്യക്കാറനാന ആക്കോവു എങ്ക ണാന് എ്ള്ദ്റ എ്ള്ത്ത്. ഉലഗാത്തിലി പല എ്ഡേക്ക്റാഗാമ് സില്ലന്തട്ടിര്ക്ക ഇസ്റേല് ജാദിഗാക്ക് പട്ട പന്നന്റ് കുലാത്തില്യ ഏസുണ ണമ്പിര്ക്ക ആള്ഗാക്ക്ത്തെ എ്ള്ദ്റാദ്. ണിമാക്ക് ണല്ലാദ് ബരുഡൊ. സാമ്യോഡിര്ക്ക ണമ്പിക്കേമ് ബുദ്ദിമ് 2-3 എനാക്ക് മെച്ച്പ്ഡിത്ത ഏസുക്കാറാരെ, ഏസുക്കാറാര് ആയിര്ക്കാദ്ണാലെ ണിമാക്ക് ബര സോദണെ ഗള്യേക്ക് മനേസ്സാറ ണിമ്മ പിര്യപഡുഡൊ. എന്ത്ക്കെന്റ അദ്ണ താങ്ക്റാദ്ക്കുള്ള ദയ്യിര ണിമ്മ് മനേസ്സ്ക്ക് കെ്ഡേത്ത് കൊണ്ടിര്ക്കു. 4 അച്ചെ മനേസ്സ്ക്ക് ദയ്യിര കെ്ഡേത്ത് കൊണ്ടിര്ക്കാദ്ണാലെ ണിമ്മ ഒരു കുറ്റകൊറെ ഇല്ലാത്തവാര്മ് സാമിക്കിര്ക്ക എല്ല ഗുണാമ് കെ്ഡേത്ത് കൊണ്ടിര്ക്കവാര്മ് ആവേര്. 5 ഇദ്ണ തെരിരാദ്ക്കുള്ള ബുദ്ദി ണിമാക്ക് ആര്ക്കാറ്റ് കമ്മ്യായിര്ന്ത സാമിന കേ്ളിരി. എന്ത്ക്കെന്റ ണമാക്ക് ബേ്ഡുമാനദെല്ല സാമി ണല്ല മനേസ്സോഡെ തരുവാ്. അച്ചെ കേ്ക്കാദ്ണാലെ സാമി ണമാണ സണ്ടെ കൊഡുക്കമാട്ടാ്. 6 ണിമ്മ സാമിന കേ്ക്കാട്ടി സന്തേഗപഡാദെ ണിമ്മ കേ്ക്കാദ്ഗെല്ല കെ്ഡേക്കു എന്ത് ണമ്പികൊണ്ട് കേ്ക്കുഡൊ. ആന സന്തേഗത്തോഡെ കേ്ക്കവാ് കാറ്റഡിക്കാട്ടി അഡിമ് മേല്മ് പോര കഡാല് സെലേന പാസെ ഇര്ക്കുവാ്. 7 അച്ച്ള ആള്ഗാക്ക് ആണ്ടവാനോഡിര്ന്ത് എന്താറ്റ് കെ്ഡേക്കു എന്ത് ആസെപഡ ബേ്ഡ. 8 റണ്ട് മനേസ്സ്ക്കാറാ് താന് സെയ്ര ഒരു കാര്യാത്തിലിമ് ഒറേത്ത് ണില്ലമാട്ടാ്. ഏ്ളെമ് പണക്കാറാന്മ് ഒരേ സമ 9 ഏസുക്കാറാ് ആയിര്ക്ക ഒരു ഏ്ളെന സാമി ബെല്ല്യവാനായി കാണ്റാ്. അദ്ണാലെ അവാ് സാമിന പെര്മെപഡ്സുഡൊ. 10 പണക്കാറാന ഏ്ളെ ആക്കിനാദ്ണാലെ അവാ് സാമിന പെര്മെപഡ്സുഡൊ. എന്ത്ക്കെന്റ അയാള്ദ് പണ പൂണ പാസെ കൊട്ടി ഇല്ലാദായെക്കു. 11 കോഡെ ഗള്യേക്ക് പുല്ലു ദള്ദളാമ് ബേസഗേക്ക് ഉണാന്തെക്കാമ് സെയ്യ്ദ്. അദ്താനെമല്ല ണേര കഡാന്ത് ബെക്കെ മുറ്റ്ഗാട്ടി പൂക്കൊട്ടി അദ്ദ് അളാഗെല്ല ഇല്ലാദായി എക്ക്ദ്. ഇദേപാസെത്തെ പണണ ണമ്പി പെ്ളേക്കവാന്ദ് ഗെദിമ്. 12 ഏസുണ ണമ്പിനാദ്ണാലെ ബര സോദണെഗണ താങ്ക്യ ദയ്യിര കെ്ഡേസിര്ക്കവാ് ബാഗ്യക്കാറാ്. എന്ത്ക്കെന്റ സോദണെനെല്ല താങ്കി ണമ്പിക്കേന ബ്ഡാദെ ഒറേത്ത് ണില്ല്റവാന്ക്ക് സാമി ണല്ല പെ്ളേപ്പ് കൊഡുക്കുവാ്. അച്ചെ തന്നോഡെ സീവാ് ബ്ഡ്റവാര്ക്ക് ണല്ല പെ്ളേപ്പ്ണ തരുവാ് എന്ത് ബാക്ക് തന്തിര്ക്കാനല്ല? പാവ സെയ്യ സാമി ആസെപ്ഡ്സ്റാദില്ലെ 13 പാവ സെയ്ര എന്താറ്റ് കാര്യഗ ബര്ഗാട്ടി സാമിത്തെ ഇച്ചെല്ല ബര്സിനാദ് എന്ത് ആര്മ് സൊല്ല ബേ്ഡ. എന്ത്ക്കെന്റ് സൊന്ന പാവ സെയ്രാദ്ക്കുള്ള എ്ണ്ണ സാമി ആര്ക്ക്മ് കൊഡുക്കാദില്ലെ. അച്ച്ള ദിന്സിലി സാമി ആര്ണാമ് ആസെപ്ഡ്സ്റാദില്ലെ. 14 ആന ഒരുത്താ് തന്ന് കെ്ട്ട ആസെഗണാലെത്തെ അച്ച്ള ദിന്സ് ആസെപാഡ്ഗാക്ക് സിക്ക്റാദ്. 15 എച്ചെ ഒരു പെ്ണ്ണ് ബേ്റായി തന്ന് ബേ്റിലി പ്ള്ളെ ബളാന്ത് സീവാ് പെ്ളേക്കാളൊ അദേപാസെത്തെ ഒരുത്താന്ദ് മനേസ്സിലി കെ്ട്ട ആസെ പെര്ഗി പെര്ഗി പാവഗ സെയ്രാദ്. ഇച്ചെ പാവഗ സെയ്ദ് സാവുക്ക് ആളാരാ്. 16 അദ്ണാലെ എനാക്ക് മെച്ച്പ്ഡിത്ത ഏസുക്കാറാരെ, ണിമ്മ ആര്മ് അച്ച്ള ദിന്സ് സോദണേക്കെ സിക്കി ഏമാന്ത് പോഗാദി. സാമി സൊല്ലുക്ക് കെ്ട്ട്പട്ട് ണഡാക്കവാരായി ഇരിരി 17 ണമാക്ക് ബേ്ഡുമാന എല്ല ബരഗണാമ് തരാദ് മേലോഗാത്തിലിര്ക്ക അപ്പനാന സാമിത്തെ. ഈ സാമിലിര്ന്ത് ണല്ലാദ് കെ്ട്ടാദ് മാറി മാറി ബരഗേമാട്ട. അയ്യി സാമ്യോഡെ ഒരു കൊറെഗെ കാണമാട്ടാമ്. 18 സാമി ദ്ട്ടിസിന എല്ലാദ്ണാമ് ബ്ഡ ണമ്മ ഉജാന്തവാരായി ഇര്ക്ക്യ ബേ്ണ്ടി സാമി ആസെപഡ്റാ്. അദ്ണാലെ സാമി തന്ന്ദ് സത്ത്യമാന സൊല്ലുസുലാക്കണ ണമാക്ക് സൊല്ലി തന്ത് ണമാണ പുദ്യ മന്സാനാക്കി തീത്താ്. 19 ണമാണ പുദ്യ മന്സാര് ആക്കിര്ക്കാദ്ണാലെ ണമ്മ സാമി സൊല്ലുസുലാക്കണ കാദ് കൊഡുത്ത് കേ്ക്കുഡൊ. ണമ്മ പേസ്ഗാട്ടി മുട്ടെ്റ്പ്പില്ലാദെ ണിദാനത്തോഡെ പേസുഡൊ. അദ്ണാലെ എനാക്ക് മെച്ച്പ്ഡിത്ത ഏസുക്കാറാരെ, ഇദ്ണ ണിമ്മ സൊക്കാന തെരിന്തിര്ക്കുഡൊ. 20 എന്ത്ക്കെന്റ ണമ്മ മൊനേക്ക് പഡ്റദാനാക്കി അഡ്ത്തവാര്ണ സാമി ആസെപഡ്റ പാസെ ണമാക്ക് ണഡാത്ത്യ മുഡ്യമാട്ട. 21 അദ്ണാലെ ണമ്മോഡെ ഇന്നിമിര്ക്ക കെ്ട്ട പളാക്കണ മുച്ചുഡ തള്ള്യെക്കുഡൊ. ണമാണ പുദ്യ മന്സാര് ആക്കിന സാമി സൊല്ലുസുലാക്കാക്ക് ണിമ്മ കെ്ട്ട്പട്ട് ണഡായിരി. എന്ത്ക്കെന്റ അയ്യി സാമി സൊല്ലുസുലാക്കാക്ക്ത്തെ ണമാണ കാപാറ്റ്യ മുഡ്യു. 22 ആന ണമ്മ സാമി സൊല്ലുസുലാക്കണ കേ്ക്കാദ് താനേമല്ല അദിലി സൊല്ലിര്ക്കാദ്ണ പാസെ സെയ്യാമ് ബേ്ഡു. അദ്ണ ണമ്മ സെയ്യാദെ പോന ണമ്മ ണമാണ താനെ ഏമാത്ത്റാമ്. 23 എന്ത്ക്കെന്റ സാമി സൊല്ലുസുലാക്കണ കേ്ട്ടിര്ന്ത്മ് അദിലി സൊല്ലിര്ക്ക പാസെ സെയ്യാത്തവാ് തന്ന് മൂഞ്ചിന കണ്ണാഡിലി ണോഡുറവാന പാസെത്തെ. 24 അയാള് കണ്ണാഡിലി തന്ന് മൂഞ്ചിന ണോഡിന പ്റ തന്ന് മൂഞ്ചിന മറാന്ത് എക്ക്റവാന പാസെ സാമി സൊല്ലുസുലാക്കണ കേ്ട്ട് അദേപാസെ സെയ്യാത്തവാ് തന്ന് കൊറെഗണ തെരിന്ത്ട്ട്മ് മറാന്തെക്ക്റാ്. 25 ആന ണമ്മ ഒരു കൊറേമ് ഇല്ലാത്ത സാമി സട്ടണ കേ്ട്ട് മറാക്കാദെ അദേപഡി പെ്ളേക്കുഡൊ. അച്ചെ പെ്ളേക്കവാര്ക്ക് അദ്ക്ക് തഗ്ന്ത സാമിദ് പ്ണ്ണ്യ കെ്ഡേക്കു. എന്ത്ക്കെന്റ ണമ്മ് പെ്ളേപ്പില്യ എല്ല കൊറെഗണാമ് തീക്കാദ്ക്കുള്ള ബെജെ സാമി സൊല്ലുസുലാക്കാക്ക് ഇര്ക്ക്ദ്. ണേരാന സാമി ബക്ദി 26 ബായിക്ക് ബന്താദെല്ല സൊല്ലിര്ന്ത് താന് ബക്ദിക്കാറാ് എന്ത് സൊന്ന അദ് സെരിക്കുള്ള ബക്ദി അല്ല. അച്ചെ സൊല്ലുറവാ് തനാണതാനെ ഏമാത്ത്റാ്. 27 ദബാരിഗാക്ക്മ് മ്ണ്ടേസിഗാക്ക്മ് കജട്ടഗ ബര്ഗാട്ടി അവാര്ണ കയ്യിതാങ്ക്റാദ്മ്, ഈ ഉലഗാത്തില്യ കെ്ട്ട കാര്യഗ ഒന്റുമ് സെയ്യാദെ തനാണതാനെ സൂസാരിക്കാദ്മ്ത്തെ സാമി കണ്ണ്ക്ക് മെച്ച്പ്ഡിത്ത ബക്ദി. |
New Life Literature