Judas 1 - Zanniat Bible

¹ Jesuh Khrih ai cengfa James ai nau kaimah Jude in Pathian ai kohnak, Pathian kin Pa ai ithnak le Jesuh Khrih ai huphimhnak songai a um mite ning hnenah he lai ning kuat ing.

² Pathian ai ninghiohnak le daphnak le ithnak heh a semkhim liang ningmah ca i tu hram seh.

Zirh Sualtute

³ I ithnak u le naute, kin veksen in kin cohnak nunohnak thu heh ning hnenah lai in i thiam tawk in ngan ing; Pathian in a mi thiang hnenah kumzangza hrang in a pehnak sanghnak thu ah roh ngai in ṭang tu ilai zuam tu ih tiin a hlaice in ning forh i hiam i.

⁴ Zaimantifangin kin lakah Pathian zaisiar lo mite kin lin loniu in lut tlang ai amahte ziaza pha lohnak thupdunhnak ah Pathian ninghiohnak thuthang heh a pingpeng in rel tlang ai kin caah Lal le Bawi Jesuh Khrih tu hnawl tlang i. Hemi bang minungte tu hnawmhnak tawk tu i tiin Lai Thianghlim in hlanlaipui in rel cia zo i.

⁵ Bawipa in Israel mite Egypt ram in suah ai leh hnuaah a sang lotute hnawmcanhnak ah hlengruai i ti khiah ning lingciahnak i napui ning ling lehsal tuhin i daih i.

⁶ A thunaihnak songah um hiam loin amahte umhnak hmun a zamtu vancungmite khiah hih tu ngio ih. Anite tu laihnia khuathim songah kumzangza in thir cikcin in khit ai a thawmlian mi Nia ah Pathian in a thukhan leh tuh i.

⁷ Ciami vancungmite bang thotho in Sodom le Gomorrah khua le a hiang cingkim khuate in nupa sualhnak bawn tlang ai amahte tisa hiamhnak riamruai tlang ti khiah hai mah ih: anite ai kumzangza mai ai cawh tuarhnak heh mi zongzong caah ralring pehnak i, ti fiang i.

⁸ Ciabang thotho in tun san minungte khai i ve i: hmuhnak nai i ing ti tlang ai amahte taksa ningrimtiar tlang i; Pathian thunaihnak heh nautat tlang ai van ai a ummi misonglawi tepawl zohsuam tlang i.

⁹ Vancungmi lakah upa ber Michael inrin ciatihin bawn lo i. Moses luang aisu in co tuh i tiin Satan thawn thu el dun kawm fangin nautathnak ponkam thawn Satan heh camriam ngam lo i; “Bawipa in na hau i!” tiin ti menma i.

¹⁰ Ikhalselai he minungte in amahte ling thil lohnak thu cangcang heh nautathnak thawn relsia tlang i. Cen ramsa bangin a taksa hiamhnak in lingthilhnak thilte heh amahte lala siatsuahtu ah cang tlang i.

¹¹ Amahte hmai lam a pit ze i! A hlunhnak lampui tu Cain ai hlun awnghnak lampui i. Paisa daih manin Balaam ai bawn awnghnak sualhnak ah amahte taksa pum pe dun i. Korah bangin ral tho tlang ai Korah bangin hnawmhnak ah hleng tlang ve i.

¹² Pawlkomhnak rong ning ai tlang fangin zakthihnak tlawmniu khai nai loin ai le ding tlang manin hmel ning siaruaitute i. Amahte ca lek ruat tlang i. Hlivua ai zuangpui hnelhno napui ruahti a tel lo khuanim bang i. Fur fangin khai thai a nai lo thingkung bang i; a ham in phai ai a thimi thingkung bang i.

¹³ A kihkul tilep pui bang i; zakthikul amahte ziaza pha lo heh tiphul bangin buan buahbo i; arsi zuang bang i ai a thuk ber khuathimhnak hmunah kumzangza um tuhin Pathian in umhnak ruat sah zo i.

¹⁴ Adam in panin san sanrukhnak Enoch in hemite thula rel awng zo i. “Pathian tu vancungmi, mi thiang thawng tampui thawn,

¹⁵ mi zongzong thukhan tuhin le Pathian kihzahhnak zaikhai nai lo misualte in tihikkul ponka siava thawn Amah a relsiattute thukhan tuhin hleng tuh i,” ti i.

¹⁶ Hemite tu cam ṭiode ai catloin midang relsia tlang i, a pha lomi taksa hiamhnak hlun tlang i; amahte veve khaisang dun ai amahte thuthu in zaizongza feh thil tuhin midang porh tlang dekdo i.

Ralringhnak Le Zirhdunhnak

¹⁷ Ikhalselai i ithnakte, kin Bawipa Jesuh Khrih ai nalangte in ning zirh awnghnak heh hih tu ngio ih.

¹⁸ Ning hnenah amahte relhnak tu, Ni tawphnak a hleng fangin ning hnihsantu le Pathian kihzahhnak nai loin amahte ai tisa daihhnak a hluntu suak tuh i,” tihnak i.

¹⁹ Hemite tu khekdunhnak a suakruaitu le tisa daihhnak ai ukmi le Rauhla a nai lo mite i.

²⁰ Ikhalselai i ithnak ningte tu a thianghlimmi ning sanghnak vumah khangso tu amam ih. Rauhla Thianghlim hathnak thawn sawngen tu ilai,

²¹ kin Bawipa Jesuh Khrih in a ninghiohnak thawn kumkhua nunhnak ning pe tuh nia ning iang laiah Pathian ai ithnak songah kho tu ngio ih.

²² Sangsamhnak a naimi vumah ninghiohnak nai tuh;

²³ midangte heh mai songin suah tu ilai o tu ih; cen a dangte vumah ninghiohnak le kihhnak larruai tu ih, ikhalselai amahte tisa hiam sualhnak in a nawi ngahhnak hnikponte tu hua tu ih.

Hmuifu Pehnak

²⁴ Tlu loin na kilkhawl ai sualmawhhnak nai loin anghnak thawn a songlawi mi a umhnak ah na hlengruaithaitu,

²⁵ amah ian kin Pathian le Nunotu hnenah, kin Bawipa Jesuh Khrih thawmin a bociahnak can ah ituseh, tun le hmai lam can ah ituseh songlawihnak, thawmlianhnak, hathnak le thunaihnak tu kumzangza in kumzangza tian um tu ngio selaw. Amen.