Job 11 - Zanniat Bible

Zophar in hetihin rel i.

^1-2 Hemi thulovang ponghnak heh aisu tal in sawn tuh lo ising maw? Mi pongtam ti menma in thiamco tuh im?

³ Job, na sawn ben tuh lo i vuah isim? Na puarthauhnak ponkam in i vit ai dap tuhin i um isim?

⁴ ‘Na ponghnak le na ruathnak heh dik i, Pathian hmaiah ‘I thianghlim i,’ ti isi.

⁵ Pathian in na sawn ve selai i daih bang ngai!

⁶ Fimhnak ahhen thuah tampui a umdan, Minung hluak in ling thil lohnak thil tampui a um zia, Na hnenah phuang tucuk selai, Thungai in tifangin Pathian incen na tuar tuh zah tahin dem deuh in na cawh nakhaw!

⁷ Pathian ai a thawmlian zia heh a ramri rin ling thil nisim? Cungnungber ai huham a liandan heh a sum teh thil nisim?

⁸ A huham tu van tahin sang i, Nang in zaiber ti thil isi? Mithi khua Shoel tahin thuk i, Nang in zaiber ling isi?

⁹ Pathian thawmlian zia heh Laivum pumpuhluk tahin lian deuh ai, Tifingriat tahin kau sawn i.

¹⁰ Pathian in na pom in thawng ah na toh selai, Thukhanhnak zung ah na fehpui selai, aisu in kham thil tuh i.

¹¹ Mihrokhrawl pawl aisu i ti khiah Pathian in ling sio i; A pha lo a naperhnak tepawl khai hmu sio i.

¹² Mivoite fim thil leh nimaw? Hampalak ai laak heh a ngam sa in suak awng nimaw?

¹³ Job na thinlung dik ngai in dah tu, Na ban pharh in Pathian lam hoi tu.

¹⁴ Na inn ai phatlohnak le na kut ai sualhnakte heh lon tusek.

¹⁵ Ciatihin hmai rim loin um tulai, Ralpha ngai le a khokhah ngai in nung tu.

¹⁶ Ciatihin na rimsuhnak tu reh tuh betbo ai, A luanglanhnak tilawi na ling nawn lo bangin hih tuh nawn lo isi.

¹⁷ Ciatihin na nunhnak tu nitleu tahin tleu tuh sawn ai, A thim ngai na tihnak nunhnak tu zing khuavar bangin var tuh i.

¹⁸ Muang ngai le nunnuam ngai in um tuh isi; Pathian in na hup tuhai cawlumhnak na pe tuh i.

¹⁹ Zau tuh huahho ai lauhnak zaikhai nai tuh lo isi, Mi tampui in bawmhnak na ngen tlang tuh i.

²⁰ Ikhalselai hrokhrawl mite tu lungsia in khuahlir tlang tuhai, Luathnak lampui hmu tuh lo i. A hnuataber a haihawh khiah a naihsun umlamhnak i tuh i.