Job 10 - Zanniat Bible

¹ Nun heh i rim i kham ihang, A siakha roh i phuncamhnak heh ngai tucuk! Lungsia roh in rel tuh ing.

² Aw Pathian, mi mawh isi iti siang rih mah; Zaibang sual i hluk isi, i rel tucuk!

³ Ninghio nai loin i cawh heh a dik i ti isim, Na kutzung ai na bawnhnak nautat heh a dik i, ti isim? Mihrokhrawl pawl ai tumtekhnak hnihsan menma khiah pha i ti isim?

⁴ Minung ai hmudan bangin thil hmu ve isim?

⁵ I nunhnak a com bangin na nunhnak a com ve im?

⁶ Zaimanin i sualhnak lek si ai, I mawhhnak a cik ber niu khai phorh sek isi?

⁷ Mawhhnak nai lo heh i ling isi, Ikhalselai aisu inkhai na kut songin i o thil tuh lo i tikhai ling isi.

⁸ Na kut in i bawn ai i sem isi; Tun tu ciami na kut in i siatsuah isi.

⁹ Nawngbek in i bawn khiah hai mah; Laivut ah i cangruai tuhin i rial tum ihang sim?

¹⁰ I pa heh kaimah suakthilhnak tuhin thazang pe ai, i nu pum songah i khangruai isi.

¹¹ I ruangpum tu ruh le tha thawn bawn ai, I ruh heh taksa le vun thawn peh sio isi.

¹² Nunhnak i pe ai ithnak khai i nairuai isi. I kilkhawl manin i nung i.

¹³ Ikhalselai na thinlung songah a thupniu in na dahhnak, Na thin songah na dahthuphnak heh ling ngah ing:

¹⁴ Zaifangin sual nitur maw tiin i bawh ngio isi; I sualhnak tu tlawmniu khai ngaithiam tuh tum hrimhrim lo isi.

¹⁵ Mawhhnak i nai sawngpah in miharsa le mibawngsia ah i cang i. Thil pha bawn inkhai lawmhnak tawk cuang lo ing. I awloksong in zakthi in um ing.

¹⁶ Hlawhtlinghnak hnihkhat nai ita inkhai chintit bangin i si ngio isi. Kaimah tuahmawh nuam in ngaihsunurkul khai bawn isi.

¹⁷ I thu lingpuitu nai ṭiode isi; I vumai na thinrawhnak tu luar amam i; I vumah na huham hleng ai a not a not in i nuai dek isi.

¹⁸ Pathian, zaimanin i nu pum songin i teruai isi. Aisu inkhai i hmu hlanah thi talio ing lai.

¹⁹ I nu pum songin hlanmual ah lan ta teu inglai, pha tuh deuh ngaingai napui i, a sem awng lo bangin.

²⁰ I nunhnak heh a bo dawn ngawn ilo im? Hnai i hnok nuam mah! Can tlawmniu i naihnak tu thindap in hmang tuh ing.

²¹ Feh cing tuh ing, ‘Let leh tuh lohnak ramah’! Lungsiahnak ram le khuathimhnak ramah feh tuh ing.

²² Thimhnak le thihhnak hla le buaihnak thawn a dimhnak, Tleuhnak rin a thim thotho a thimhnak ram ah feh tuh ing.