Isaiah 64 - Zanniat Bible

¹ Zaimanin van khiah zik in zuktolh lo isi? Tlangte in na hmu tuhai nangmah kih in hlawng tuh derdo i!

² Mai vumai ti a so bangin hlawng tlang tu dek seh. Kawi tulai na ralte hnenah na hathnak huham larruai tulai miphun hmuahhmuah in na hmu fangin hlawng tlang tu dek seh.

³ Vaikhat tu nangmah kawi ai kin ruat awng lohnak a kihkul thilte bawn zo isi; mualtlangta in na hmu fangin kihhnak thawn hlawng tlang biakbo i.

⁴ Amahte Pathian rinsan tlang manin amahte caah hebang thil a bawntu Pathian tu aisu inkhai hmu awng lo ai ling awng lo i.

⁵ Na daih bangin nung tuhin phatak niu in a hihtu le thil hman bawn ai a angtute tu thangphat de isi. Kin vumah thin na raw i, ikhalselai kin sual ngiode thotho i. Thin na raw ze napui khuahlanlai pahin khelh tlang ngiode thotho i ing.

⁶ Kin veksen in mi ningrim lek i ing; kin naper pha ber khai ningdulkul ze zo i. Kin sual manin hlivua ai hmuthnak thinghnah ro bang i ing.

⁷ Na hming ko in sawngentu aisu khai um lo i ing; nangmah ai bawmhnak ngen tuhin aisu khai na hnenah kawi tlang lo i ing. Kin hmu thai loin relh ai kin sualhnak manin kin hlum isi.

⁸ Ikhalselai Bawipa nang tu kin pa isi. Kin tu suntlung bang i ing ai nang tu bel bawntu bang isi. Nangmah ai semsuahhnak i ing ai,

⁹ Kin vumah na thinraw ze malaw; kumzangza ai sualphurtu khai kin cangruai siang hram malaw! Nangmah ai minung i ing ai kin vumah ninghiohnak nai tu hram law.

¹⁰ A cianghlim na khuate tu nelrawn ah cang zo ai Jerusalem khai hnawmborh pumhmun le ramkhing ah cang zo i.

¹¹ Kin pipute ai na thangphathnak a cianghlimmi le a mawi ngai kin Biakinn khai mai in kang sio i. Kin sunsakhnak hmunte tu hnawmborh pumhnak ah cang zo sio i.

¹² Aw Bawipa, hebang thil na hmu fangin zaikhai na poi lo im? Dapthen in um tuh hlen isim? Kin tuar ben nawn lo tianin kin tuarruai tuh isim?