Isaiah 63 - Zanniat Bible

Miphunte Vumah Bawipa Ai Nehhnak

¹ Edom ram Bozrah khua an a kawi lai thliahthlo mipa heh aisu ini? Pon san ngai in thuam dun ai a thawmlian zia a hathnak thawn a kawitu heh aisu ini? Bawipa i! Mi o tuhin a hat ngai i ai a mi nehhnak thuthan tuhin kawi i!

² Zaimanin a hnikpon tu cabit hmettu ai hnikpon bangin san sio ini?

³ Bawipa in, “Miphunte khiah cabit bangin hmet ai kaimah bawm tuhin aisu khai suak lo i. I thinraw in hmet dekdo ai amahte thisan in i hnikpon peu bial i.

⁴ I minungte ohnak can hleng ai a ralte cawhhnak can hleng zo i, tiin ruatcat zo ing.

⁵ I hiang cingkim sik ai aisu khai bawmtu i nai lo khiah i hmu fangin ngaihsun i ur ngai i. Ikhalselai i thinrawhnak in i hatruai ai kaimah hlanlam in nehhnak ngah ing.

⁶ Thin i raw manin miphunte tu cil dek ai piakruai sek ing. Amahte nunhnak thisan tu laipua ah bung sek ing,” tiin ti i.

Israel Vumah Bawipa Ai Phathnak

⁷ A pelh awng lo Bawipa ai ithnak thu rel tuh ing; Kaimah ca a bawnhnak manin amah thangphat ing. A ninghiohnak le a thleng awng kel lo a ithnak manin. Israel mite tu a semkhim liang in hmuifu pe i.

⁸ Bawipa in, “Anite tu i minungte i; zaikom inkhai i zawl tuh lo i,” ti i. Ciamanin a tuarhnak in o i.

⁹ Anite otu heh vancungmi ilo i. Bawipa amah rori i. A ithnak le a ngaihharhnak manin o i. A liam sa can ah kilkhawl awng hnelhno napui,

¹⁰ Amah tawngcai ai a Rauhla Thianghlim tu lungsiahnak in dimruai i. Ciamanin Bawipa tu ral ah cang ai amah in tawng i.

¹¹ Ikhalselai a liam sa can, Bawipa ai cengfa Moses san lai khiah hih tlang leh ai, “A minung hotute tifingriat in a otu Bawipa tu akonah i? Moses hnenah hathnak huham a hlaice ai a petu Bawipa tu akonah i?

¹² Kumzangza in a hmingthanghnak a thawmlian thil bawn ai a minungte hmaiah tifingriat a khanruaitu Bawipa tu akonah um i,” tiin zawt i.

¹³ Bawipa in ti thuk songin a hoi fangin amahte ke tu hampalak siphuh ai ke bangin khoruai ai bah awng lo i.

¹⁴ Kawlpawrual khiah hampa phahnak zawllai ah a hoi de bangin Bawipa in a minungte tu cawlumhnak pe i. Ciatihin hoi ai amah ai hmingphahnak ah cang i.

Ninghiohnak Le Bawmhnak Sawngen

¹⁵ Aw Bawipa, thianghlimhnak le songlawihnak thawn na umhnak vancung khua an kin sik tu hram law. Kin ca panhlahhnak na naihnak akonah i? Na hathnak huham tu akonah um i? Akonah i na kin ithnak le na kin ngaihharhnak tu? Zulhzau in kin dah hram malaw!

¹⁶ Nangmah tu kin Pa isi. Kin pu Abraham le Jacob inrin kin bawm ben lo i; ikhalselai Bawipa, nang tu kin Pa isi. Nang tu kin o ṭiotu isi.

¹⁷ Zaimanin na lampui in kin pialruai isi? Akontih in milungruh le na hnenin a pialmi kin cang siang isi? Nangmah naruaihtute manin le nangmah ai ngio na minungte manin let tu hram law.

¹⁸ Kin ralte in na minungte tu hnawt ben dawn sio zo ai Biakinn khai ningrimtiar zo i.

¹⁹ Kin uktu i awng lo bangin um si ai kinmah khai heh na minung i awng lo bangin kin bawn isi.