Isaiah 58 - Zanniat Bible

A Dikmi Rong Ulhnak

¹ Bawipa in, “Cawm ngai in au tu ih! Israel i minungte heh a sualdan rel tu ih!

² Nisiar in i bia tlang ai i dan hlun ah le a dikmi bawn ah ruat dun i. Anite hmuifu pe tuhin le dan pha pe tuhin i ngen tlang i,” ti i.

³ Mizapui in, “Bawipa in kin hmu lo ilekhaw zaimanin rong ul hnelhno ising. Ziang inkhai siar lo ilekhaw zaimanin rong loin tuar kin nuam hnelhno i?” tiin zawt i. Bawipa in anite hnenah, “A hmanniu in kin ti fangin, rong ulhnak tu ningmah ai daihhnak sihnak tuhin le ning napertute naunehhnak tuhin hmang tlang i si.

⁴ Mi thihnai suakruai ning kih lo i; tawng dun ai hau tlang i si. Hemi bang ning rong ulhnak manin ning sawngenhnak ngai tuh i vuah i sim?

⁵ Rong ning ul fangin rimsu pe dun i si; hampa kung bangin ning lu ut tlang i si; ning ihphah ah buri pon le vutkuang phah tlang i si. Ciami maw rong ul i ing ti i si? Ciami vumah lungawi tuhin i ruat i sim?

⁶ “Kaimah in i daihhnak rong ulhnak tu hetihin i. Thir cikcin bang ai ning mi naunehhnak le hak bangin mi a orhtu a hman loin mi ning bawnhnak heh lon tusek ilai ning nauneh mite heh luat tuhang seh.

⁷ Ning ti le rong khiah rikam mite thawn kawm tlang tu ilai ning inn khai inn nai lo mifarah caah hong tu ih. Hnikpon sil tuh a nai lotu hnenah hnikpon pe tu ilai ning songkhat bawm tuh khai el mah ih!

⁸ “Ciafangin i tleuhnak tu ning vumah zing lam nisuak bangin tlang tuhai ning hmaihma khai a rang ngai in pot tuh i. Ning hnenah um tuh ngio ai ning o tuh ing.

⁹ Saw ning ngen fangin ning sawn tuh ing; i ko fangin ning awi tuh ing. “Mi ning naunehhnak heh lon tuh sio ai mi ning zohsuamhnak le ning ponkam pha lote ning boruai lek zolo in,

¹⁰ Rikam mite rongkham in pe ai mitlasamte a kulhnak pe le i sikhaw na kulhtu khuathimhnak heh sun nitleu ah cang tuh i.

¹¹ Cen kong na hoi tuh ngio ai laivum ai thilpha in na khimruai tuh ing. Na cakruai tuhai na hatruai tuh ing. Ti a tampui vuan bang i tuh i si. A kang awng lo cirhti bang i tuh i si.

¹² A hnawm cia sio le hnawmborh pup ai a cang zohnak tu ning minungte in a ham hlun vumah sa tlang leh tuh i. A ekciahnak remmlehtu le a hnawm cia sio innte a salehtu tiin hihhlenhnak minung ning cang tuh i,” tiin ti i.

Nizarh Nia Ul Man

¹³ Bawipa in, “Sabbath nia tu nizarh tuhin ningmah in bawn ai ningmah ai daihhnak si nia ah khualtlawng lo, naper loin le zohsuam in pong loin um ai hemi kaimah nia heh cianghlimruai ai songlawiruai le i sikhaw,

¹⁴ Kaimah ning i ruaihhnak songin a suakmi anghnak tu co tlang tuh i si. Laivum pumpuhluk ah upathnak minung cang tuhin ning bawn tuh ing. Ning pu Jacob hnenai i pehnak ram heh lungawi aipuang in khur tuh i si. Bawipa kaimah in rel zo ing,” tiin ti i.