Isaiah 37 - Zanniat Bible

Kumpibawi In Isaiah Thuron I

¹ Kumpibawi Hezekiah in a hnenai amahte relhnak thu za fangin lungsia in a hnikpon zik ai buri hnikpon sil in Bawipa ai Biakinn ah feh i.

² Cen Amoz ai fapa Isaiah hnenah kumpibawi innkiltu hotu Eliakim, zung cazipui Shebna le suangbawi upate hlat i. Anite inkhai buri hnikpon sil tlang ve i.

³ Isaiah hnenah rel tuhin hetihin thucah i, “Tunnia tu kinmah caah kin tuar nia i. Cawhhnak tuar tlang ai zakthihnak tawk ising. Nupang pakhat in nau te dawn napui a nu a tha tlawm ze hlaihlawr manin a te thil lo bang ising.

⁴ Assyria ram kumpimangbawi in a nungmi Pathian zohsuam tuhin a kuthnia ai tlangsuak upa ber pakhat hlat i. Bawipa na Pathian in hetihin amahte zohsuamhnak tu za tu hram selai a pongtu heh cawh tuseh. Ciamanin kin minung a tangsunte caah saw kin nget tu hram law,” ti i.

⁵ Isaiah in kumpibawi Hezekiah ai thucahhnak a za fangin

⁶ hetihin thukhirh i, “Assyria mite ai Pathian zohsuamhnak ponkam pong tlang manin na lungsia tuh lo isi, tiin Bawipa in ti i.

⁷ Bawipa in Assyria Kumpimangbawi tu thu vaivuan zaruai tuhai ciami manin a ramah let tuh i; cen amah ai ram minungte ai kut in thi tuh i,” tiin ti i.

Assyria Mite In Sim Tum Lala I

⁸ Assyria ralbawipa tu let ai, amahte Kumpimangbawi tu Lakhish ah feh ai a hiangai umhnak Libnah khua tawng i ti a za fangin kumpibawi tawk tuhin ciata ah feh i.

⁹ Cialai ah Ethiopia ram kumpibawi Tirhakah ho in Egypt ralkapte tu Assyria ralkapte tawng tuhin kawi tlang i, tiin thuthang i. Ciami tu Assyria Kumpimangbawi in a za fangin Judah ram kumpibawi Hezekiah hnenah lai kuat ai a hnenah,

¹⁰ “Na rinsanhnak na Pathian in i kut songah hleng tuh loin thu na rel i; ikhalselai ciami in na zawl maseh!

¹¹ Assyria Kumpimangbawi in ram pakhatkhat vumah siatsuah tuh ing, tiin a ruatcat hnuaah akontih in bawn de i ti khiah na lingciahnak i. I luat tuh i tiin ruat isim?

¹² I pupate in Gozan, Haran le Rezeph khuate hnawmcan sek ai Betheden mite Telassar ai a umtute rek berh i. Amahte khuavangte inkhai o ben lo i.

¹³ Hamath, Arpad, Sepharviam, Hena le Ivvah khuate uktu kumpibawite akonah sio i? tiin ngan i.

¹⁴ Kumpibawi Hezekiah ai ciami laikuathnak tu a hlathnakte ai kut in lang ai siar i. Cen Biakinn ah feh ai Bawipa ai hmaiah lai heh dah le,

¹⁵ sawngen ai,

¹⁶ “Aw Cungnungber Bawipa, Israel ai Pathian, na kumpibawi tohkham vumai to tu, nangmah lek heh Pathian isi ai laivum ram hmuahhmuah uktu isi. Nangmah in lai le van heh semsuah isi.

¹⁷ Aw Bawipa, tunah i ngai tulai i sik tu hram law! Sennacherib in a nungmi Pathian na vumah zohsuam ponghnak hmuahhmuah ngai tu sio law.

¹⁸ Aw Bawipa, Assyria Kumpimangbawite in ram tampui siatsuah zo ai khingruai sio i ti khiah ling zo i ing.

¹⁹ Pathian lo amahte ai khuavangte, thing le lungto ai bawn fawmhnak milimte khai mai in tai sio i ti ling zo i ing.

²⁰ Ciamanin aw Bawipa, kin Pathian, Assyria mite kut songin kin hum tu hram law; ciatihin laivum miphuncang in nangmah ian Pathian isi ti khiah na ling tuh i,” tiin sawngen i.

Kumpibawi Hnenah Isaiah Thucah

²¹ Cen kumpibawi Hezekiah sawngenhnak Bawipa in a sawnhnak khiah Isaiah in a za fangin Isaiah in Hezekiah hnenah thuthan tuhin palai hlat i. Bawipa in,

²² “Aw Sennacherib, Jerusalem khuapui an hnih na san ai hnihsarelhnak in na hmang i.

²³ Na zohsuamhnak le na cukcamhnak heh aisu i tiin ruat isi? Israel ai Pathian Thianghlim kaimah nangkhaw!

²⁴ Na cengfate i hnenah hlat ai, i siphuhlengte thawn tlang sang ber neh ing ai Lebanon tlangpardir khai lang ing,’ tiin tluangkhawng isi. ‘A sang ber cedar thing lakai a sang ber khai vawng ben ai a pha ber farthing vawng ben ing ai tupui songai a hlahnak ber khai hleng ben ing,’ tiin porh dun isi.

²⁵ ‘Miphundangte ram songah tikhur co ai ti ding ing; i ralkapte in Nile Runpui tu ro thai sio in fon ing,’ tiin porh dun dekdo isi.

²⁶ “Hemite tu hlanlaipui in kaimah in i ruatciahnak i ti ling lo isim? I tum cia awnghnak tu tunin bawnsuak ing. Kaimah in hathnak huham na pe manin vingpui ai kulhhnak khuapuite tu hnawmborh pumhnak ah cangruai sio isi.

²⁷ Ciata ai a um awngtute tu zaikhai thiltibenhnak nai tlang lo i. Thinlau le multing in um tlang menma i. Nisuah lamin hlisia zuang ai a hmuthnak lo song hampa le diphun ai a pohnak hampa bang i.

²⁸ Ikhalselai na thu tu a veksen in ling ing. Na bawnhnak le na fehhnak khai ling sio ing. I vumai na thinrawdan khai ling ing.

²⁹ Na thinrawhnak thula ling zo ai na tluangkhawnghnak khai za zo manin tun tu na hnar ah sio na khaih tuh ing; na ka na kharh tuhai na kawihnak lampui in na letruai tuh ing,” tiin ti i.

³⁰ Cen Isaiah in kumpibawi Hezekiah hnenah, “A cang tuhhnak thilte hnikhnaihhnak tu hetih i tuh i. Tun kum le hmai kum tu amah hlanlam ai pohnak fangcang ai tuh i si; ikhalselai a hmai kum ahcen ningmah in fang cing thil tuhai rong nai tuh i si; cabit kuang bir tuhai cabit thai ai tlang tuh i si.

³¹ Judah miphun songin a tangsun tu ning khangso tuh i; laipua thukpui song tian hnuk hla ai thai a thaimi thingkung bang i tuh i si.

³² Jerusalem le Zion Mual ah a tangsun mi tlawmniu um tuh i, zaimantifangin Cungnungber Bawipa in ciatihin cang tuhin a tumtekhnak hrimhrim i,” tiin ti i.

³³ Assyria Kumpimangbawi thu ahcen Bawipa in hetihin rel zo i: “Hemi khuapui songah lut tuh lo i; he khuapui songah conkiang pakhat khai sai tuh lo i. Hemi khuapui hiang cingkim ah lum awhtu ralkap pakhat khai kawi tuh lo i; cen hemi khuapui tawnghnak tuhin vingpui pualam ah laipua sang a cingkim in tiang tuh lo i.

³⁴ Hemi khuapui song tu fon tuh hrimhrim lo i; a kawihnak lampui in let tuh i. Kaimah Bawipa in rel zo ing!

³⁵ Hemi khuapui tu ṭan tuhai hup tuh ing; i hmingthanghnak ah le i cengfa David hnenai thukhamhnak i bawn zo manin he khuapui tu khakber tuhai hup tuh ing,” ti i.

³⁶ Bawipa ai vancungmi pakhat tu Assyria ralkapte zancam hmunah kawi ai a ralkapte ting khat thawng sawmriat le thawng nga rek i. A thangha khua a var fangin ralkap ciazah tu leu tlang bial i; thi sek i!

³⁷ Ciafangin Assyria Kumpimangbawi Sennacherib tu khel lamah let ai Nineveh khua ah let i.

³⁸ Nikhat ah Sennacherib tu a khuavang Nisroch biakinn songai a khuavang a bia laitak ah, a fapate pahnih Adrammelech le Sharezer in amahte ralvang in dawt ai cia hnuaah Ararat ramah tlan kawm i. A dang fapa pakhat Esarhaddon amah sawngtu in kumpibawi cang i.