Hosea 7 - Zanniat Bible

¹ “I minung Israel cakruai i nuam ai khangsoruai leh i nuam napui amahte phatlohnak le thil sual bawnhnak ian hmu ing. Samaria ah pakhat le pakhat zawl dun; inn bal ai thil ru tlang i; lamlak ah mi thil long i.

² Amahte thil sual bawnhnak heh hih tuh ngiode ing ti khiah ruat ban hrimhrim lo i; amahte sualhnak in a kulh sio khiah hmu loin um thil fawn lo ing,” ti i.

Kumpibawi Inn Ah Engsanhnak

³ Bawipa in, “Mipui in amahte kumpibawi le bawite zawl in engsan tlang ai thinnuamruai de i.

⁴ Amahte veksen in kangkawm sualhnak bawntute i ai rintlak lo ciang i. Sangbawntu in sang hmet ai mailing ngai vumah sang em ai a ling ngai bangin a mi huahnak tu ling ṭiode i.

⁵ Kumpibawi in puai a bawn nia ah kumpibawi le a kuthnia ai tlangsuakte tu zu ri tlang ai mivoite bang i.

⁶ Amahte mi engsanhnak tu mai bangin ling i. Amahte thinrawhnak tu zanvar sa ai zing lam fangin mai bangin liau i.

⁷ “Amahte thin sa ze ai uktute rek i. Amahte kumpibawi tu pakhat hnua pakhat rek napui bawmhnak ngen in aisu khai i hnenah sawngen lo i.

Israel Le A Dang Miphunte

⁸ Bawipa in, “Israel mite tu a tlamhmat ian a hminmi sang thawn bang dun i. Amahte hiangai a dang miphunte rinsan ai,

⁹ ramdang mi rinsan manin thazang kin nau i ti khiah ling lo i. Raipui nung tuh nawn lo i; cia khai ling cuang lo i.

¹⁰ Amahte puarthauhnak tu amahte sualhnak larruaitu i. Hemi bangtluk thil a cang sek hnuaah khai Bawipa a Pathian kaimah hnenah let nuam lo i.

¹¹ Israel tu ruathnak nai lo laileng voi bangin vak i; hmasa ah bawmhnak ngen in Egypt ah feh i; hnuata ah Assyria hnenah tlan i.

¹² Ikhalselai anite pomhnak tuhin sur siah tuhai a vak kongin vaniu bangin awk tuh ing. Thilsual bawn tlang manin cawh tuh ing.

¹³ “Mi bawngsia i! I zam zo ai ral i cai zo i. Amahte khiah siatsuah tuh berh i. A hup i nuam napui kaimah lehlam i thangsiat tlang i.

¹⁴ Thinlung tak in sawngen tlang lo i; sawngen tumrul in laipua ah lon dun ai Pathian ling lo mite bangin au tlang i. Rong le cabit hrangah saw a ngen fangin Pathian ling lo mite bangin dawt dun dekdo i. Zaitluk raltho phun i!

¹⁵ Amahte cawmtu le a hatruaitu heh kaimah inapui kaimah zuartu sawn ah cang i.

¹⁶ Hathnak zaikhai a nai lomi khuavang hnenah i pial san leklo de i. Anite tu thal kawn bangin rintlak lo pawl i. A hotute tu puarthau ngai in pong tlang manin sarthih in thi tlang tuhai Egypt mite in hnihsan tuh i,” tiin ti i.