Esther 8 - Zanniat Bible

Judah Mite In Tawng Tuh Ve In Sim Tlang I

¹ Ciami nia ah kumpibawi Xerxes in Judah mi a huatu Haman ai thilri hmuahhmuah heh kumpibawinu Esther hnenah pe i. Esther in Mordecai thawn songkhat a ihnak khiah Kumpibawi hnenah rel i. Ciami ai panin Mordecai tu kumpibawi umhnak ah lut thil ihang.

² Kumpibawi in a hmingkhenhnak, (Haman hnenai a langhnak) a kutruk heh hawk ai Mordecai hnenah pe i. Cen Esther in Mordecai heh Haman ai thilri kiltu tuhin dah i.

³ Cen Esther in kumpibawi keham ah bok zurzo ai kap kongin kumpibawi pon i. Agag ai tesinfa Haman in Judah mi a engsanhnak thil sual heh kham tuhin kumpibawi khiah ngen dekdo i.

⁴ Kumpibawi in a sui faikiang khiah tung ai Esther khai ding i; cen a hnenah,

⁵ “Aw kumpibawi, lung na khim ai i ngaihhar in thudik i tiin ruat ve lesikhaw na ninghiohnak in Agag ai tesinfa le Hammedatha ai fapa Haman in na ukhnak ram song hmuahhmuah ah Judah mi amahte veksen in rek tuh sio in thu a suahhnak bangin bawnsuak tuh loin thuthan tu hram law.

⁶ I phunpuite pairal le i songkhatte rek tuh sek heh akontih in tuar ben tuh ing?” ti i.

⁷ Ciafangin kumpibawi Xerxes in kumpibawinu Esther le Judah mi Mordecai hnenah, “Judah mite a engsan manin Haman heh rek zo ing. A thilrite khai Esther pe zo sek ing.

⁸ Ikhalselai kumpibawi hming in le kumpibawi hmingkhenhnak ai khen cia thuthanhnak heh bal leh thil nawn lo i. Ikhalselai ning daih lekhaw Judah mite hnenah ngan tu ih; i hming in ngan tu ilai i hmingkhenhnak in khen tu ih,” tiin ti i.

⁹ Ciami nia tu hla thum hla, Sivan hla, ni kul hluanthum nia i. Mordecai in kumpibawi laingantu hmuahhmuah ko sio ai, India in Ethiopia tian a kauhnak ram, ramkulh za le kul hluansarih uktu bawite le ram uktu bawite le Judah mite hnenah kuat tuhhnak lai khiah auh i. Ciami lai tu ram kulh cangcang ah amahte hmanghnak pon ṭen in le Judah mite hnenah Judah pon in ngan i.

¹⁰ Mordecai in ciami lai heh kumpibawi Xerxes hming in ngan ai kumpibawi hmingkhenhnak in khen i. Mi a hlathnakte in kumpibawi siphuh inn ai a umhnak siphuhte to in ciami lai nganhnak khiah khuahacang ah fehpui i.

¹¹ Ciami lai songah, kumpibawi in khua cangcang ai a ummi Judah mite tu kom in ṭangthilhnak thupe i. Konteng ramkulh le aisu miphun ita inkhai ralthuam thawn Judah mite tawng lekhaw Judah mite in tawng thun tuh ve in thupe i. Tawng thun ve lek zolo in a nupuite le amahte fate tianin rek tuh sio in le mi pakhat khai luat loin rek tuh berh in le amahte thilri hmuahhmuah khai lang tuh sio in thupe i.

¹² Ciami thupehnak tu Persia ram song hmuahhmuah ah Judah mite rek tuh nia, hla hlaihnih hla, Adar hla, ni hlaithum nia ah bawn tuhhnak i.

¹³ Ciami thu heh hlunkulhnak dan cang tuhai ciami a khim fangin Judah mite ṭang thil tuh ve in ramkulh cangcang ah than tuh i.

¹⁴ Kumpibawi thupehnak bangin, siphuh totute tu kumpibawi siphuh to in rang ngai in dawp tlang i. Ciami thu heh kumpibawi umhnak Susa khua ahkhai than i.

¹⁵ Mordecai tu kumpibawi inn in kumpibawi hnikpon a ngo le a mepian, rifem ai takhnak ponsan sil in le a mawi ngai sui lukhuk khu in suak i. Ciafangin Susa Khuapui lampui ah mi tampui tu lungawi aipuang in au tlang i.

¹⁶ Zaimantifangin Judah mite ca ahcen anghnak le hmuifuhnak, thinnuamhnak le nehhnak thinlung um i.

¹⁷ Kumpibawi thupe a thanhnak ram cangah le khua cangah Judah mite tu anghnak puai bawn tlang dekdo i. Judah mite kih deuh manin mi tampui Judah mi ah cang tlang i.