Esther 7 - Zanniat Bible

Haman Rek I

¹ Ciatihin kumpibawi le Haman tu rong ai tuhin Esther hnenah,

² a vel hnihhnak kawi kawm i. Cabitti ding kongin kumpibawi in Esther khiah, “Tunin kumpibawinu Esther, na daihhnak heh i rel tulai na pe tuh ing. I ram ukhnak a hrekkhat khai na pe tuh ing,” tiin ti i.

³ Ciafangin kumpibawinu Esther in, “Aw kumpibawi, thinniamhnak thawn i ngenhnak i pe tuh ilesikhaw, i nunhnak le i miphunte ai nunhnak heh zuah tu hram law, ti na ngen ing.

⁴ I miphunte le kaimah heh rek tuh sio in engsantu um i; kinmah heh siatsuah tuh sek le kin ci kin hmit tuh sio ihang. Sal tuhin zuar tuh lek iselai tu kumpibawi zaikhai hnaihnokhnak pe loin dapthen in um tuh napui ing, tun tu ciatihin ilo i; kin ci kin hmit tuh sek ihang,” ti i.

⁵ Ciafangin kumpibawi Xerxes in, “Ciabang thil bawn a tum ngamtu heh aisu i? Akonah um i?” tiin Esther heh zawt i.

⁶ Esther in, “Kin raltu le kin reemtu heh mihrokhrawl pa Haman i,” tiin ti i. Ciami a za fangin Haman tu hlawng ai zaikhai pong ben lo i.

⁷ Cen kumpibawi tu a thinraw in tho ai sumpua ai vuan ah feh i. Kumpibawi in i zuah tuh lo i, ti khiah Haman in lingfiang i. Ciamanin a tohnak ah to thil tuh hlen ai a nunhnak hup tuhin Kumpibawi nu Esther khiah ngen i.

⁸ Kumpibawi tu vuan in rong ai hmun khan songah a lut leh fangin, ninghio ngen kongin Haman khiah Esther ai tohkham vumah bok zurzo i. Ciafangin kumpibawi in, “Hemi pa heh i inn songah le i mithmuh rori ah kumpibawinu buan in sualpui tum im?” tiin au dekdo i. Ciami rin kumpibawi in a pong ben hlanah amah kiltute in Haman ai hmai heh hup sah i.

⁹ Cen amahte lakai pakhatpa Harbonah in, “Kumpibawi nunhnak a hupsuaktu Mordecai tarhnak tuhin tiin Haman in a inn ah hawngdik ai rektarhnak khuam rin bawn cialep nakhaw. Ciami khuam heh pi sawmsarih le pi nga sang i,” tiin ti i. Kumpibawi in “Ciata ah Haman tar tu ih” tiin thupe i.

¹⁰ Ciamanin Haman tu Mordecai hawngdik ai rektarhnak tuhin a bawnhnak khuam ah tar ai rek i. Cen kumpibawi ai thinrawhnak tu dap leh i.