Esther 6 - Zanniat Bible

Kumpibawi In Mordecai Upathnak Pe I

¹ Ciami zan tu kumpibawi mitmu thil lo i; ciamanin a ukhnak ram songai naperhnak thu hnikhnaihhnak laibu heh siarruai i.

² A siarhnak songah kumpibawi innkhante a kiltu tilret sa pawl pahnih Bigthana le Teresh in kumpibawi heh rek tuhin phiar kawm i; ikhalselai ciami heh Mordecai in ling ai phuang i, tihnak thu tel i.

³ Ciafangin kumpibawi in, “Hemi bang thil pha a bawnhnak manin Mordecai heh upathnak lehsawng zaital pe aw sing im?” tiin zawt i. A hnenumte in, “Amah caah zaikhai bawnsahhnak um lo i,” tiin ti i.

⁴ Cen kumpibawi in, “Tunah i inn ah i kuthnia bawi pakhat tal um awm?” tiin zawt i. Cialak ah, Haman tu kumpibawi hnenah Mordecai rek tuhhnak thu ngen tuhin kumpibawi inn tualrawn ah hleng ve i; Mordecai tarhnak tuhin tiin hawngdik ai rektarhnak khuam bawn zo i.

⁵ Cen a hnenumte in, “Haman um i; nangmah na tawk nuam i,” tiin Kumpibawi heh ti i. Kumpibawi in, “Lut tuseh,” ti i.

⁶ Haman khai lut ai, kumpibawi in a hnenah, “Upat i pe nuammi pakhat um i. Amah ca ziang bawt tuh ing?” tiin zawt i. Ciafangin Haman in, “Kumpibawi in hebang lawmlam in upat a pe nuammi tu aisu heh ini? Kaimah siarlo aisu um pa ngai,” tiin a thinlung niu in ruat i.

^7-8 Ciamanin kumpibawi hnenah, “Bawipa, upat na pe hiammi pa ca na kumpibawi thilthuam le nangmah ai na tohnak de siphuh le na sui lukhuk lang tuhin thupe tu.

⁹ Cen na kuthnia tlangsuakte lakah upa ber pakhat in ciami pa heh na thilthuam thawn thuamruai tu selai na siphuh vumah toruai in khuasong ah siphuh heh fehpui tuseh. Cen na kuthnia bawipa in a vak kongin, ‘Kumpibawi in upat a pe hiammi vumah upathnak a pedan heh sik tu ih,’ tiin au kong tuseh,” tiin ti i.

¹⁰ Ciafangin kumpibawi in Haman hnenah, “Rang ngai in feh tulai i thilthuam le i siphuh heh lang tulai Judah mi Mordecai pe tu. Tunai na relhnak bangin Mordecai ca bawn tu sio law. Kumpibawi inn kotka hiangah Mordecai um tuh i,” ti i.

¹¹ Haman in kumpibawi thilthuam le siphuh lang ai thilthuam heh Mordecai silruai i. Siphuh vumah Mordecai toruai ai Haman in khuasong ah siphuh fehpui ai a vak kongin, “Kumpibawi in upat a pe hiammi vumah upathnak a pedan sik tu ih,” tiin au kong betbo i.

¹² Mordecai tu kumpibawi inn ah let ai Haman tu zakthi hmaihup kong in a inn ah tlung i.

¹³ Ciami thula hmuahhmuah heh a nupui le a rualpuite hnenah rel i. Ciafangin a nupui le mifim ngai a rualpuite in a hnenah, Mordecai in na lan ibang hang! Ani tu Judah mi i ai akontih in khai ti thil tuh nawn lo ihang si. Na neh tuh rori i,” tiin ti tlang i.

¹⁴ Ciatihin a pong tlang laitak ah kumpibawi inn ai tilret sa pawl kawi tlang ai Haman khiah Esther ai zanfak dohnak ah rang ngai in fehpui i.