Esther 5 - Zanniat Bible

Esther In Kumpibawi le Haman Rong Ai Ko I

¹ Ni thum song rong a ul hnuaah Esther tu kumpibawinu thuam in thuam dun ai kumpibawi inn songta khan ah lut ai kumpibawi tohkham lam hoi in ding i. Kumpibawi tu dawngkham lam hoi in kumpibawi tohkham vumah to i.

² Kumpibawi in kumpibawinu Esther dawngkham pualam ah ding ngio khiah a hmu fangin mithmai pha pe ai a sui faikiang khiah tung i. Esther in nong ai a faikiang hmur dai i.

³ Ciafangin kumpibawi in, “Ziang na daih i, kumpibawinu Esther? Na daihhnak i rel tulai i ram ukhnak a hrek ita inkhai na pe tuh ing,” tiin ti i.

⁴ Esther in, “Kumpibawi lung na khim lekhaw, kaimah in rong suang tuhai tun zan nangmah le Haman heh i hnenah zanfak ai tuhin ning sawm ing,” tiin ti i.

⁵ Ciafangin Esther daihhnak khimruai tuhin kumpibawi in Haman heh rang ngai in ko tuhin thupe i. Ciami zan tu Esther hnenah zanfak ai kawm i.

⁶ Cabitti ding ben fangin kumpibawi in, “Na daihhnak i rel tuhang, na pe tuh ing. Na ngenhnak tu, i ram ukhnak a hrek ita inkhai na pe tuh ing,” tiin Esther khiah ti i.

⁷ Cen Esther in,

⁸ “Kumpibawi lung na khim ai i ngenhnak i pe tum lesikhaw thaizan khai Haman thawn zanfak ai kawm tuhin ning sawm lala ing. Ciafangin i ngen nuamhnak na rel tuh ing,” tiin ti i.

Haman In Mordecai Rek Tum I

⁹ Haman tu zanfak a ai hmun an ang le thinnuam in a inn ah tlung i. Kumpibawi inn kotka hiangah Mordecai hmu ai a hiangah a vak fangin Mordecai in upathnak zaikhai pe lo ai tho khai tho lo i; ciamanin Haman tu a thinraw i.

¹⁰ Ikhalselai a thinsup in a inn ah tlung i. A inn ah a rualpuite sawm ai a nupui Zeresh khai ko ai,

¹¹ anite hnenah a lianhnak le fapa tampui a naihnak, kumpibawi in bawi upa ber ai a dahhnak le a dang bawite tahin amah a thupui dante rel ai tluangkhawng dekdo i.

¹² “Hemi hmuahhmuah vumah kumpibawinu Esther in kumpibawi le kaimah lek zanfak ai kin do i; thaizan khai a hnenah zanfak ai tuhlai ing.

¹³ Ikhalselai khiami Judah pa Mordecai, kumpibawi kotka hiangah a to i hmu song ahcen he i relhnak tepawl khai heh kaimah ca thulovang ah cang sio i,” ti i.

¹⁴ Ciamanin a nupui le a rualpuite in, “Zaimanin minung rek tuhin a tarhnak khuam pi sawmsarih le pi nga sang in bawn lo isi? Thangha ah Mordecai tar tuhin kumpibawi rel tulai zan lamah thinnuam ngai in zanfak sim leh bang ngasi,” tiin ti i. Ciatihin amahte relhnak heh Haman in ruathnak pha ze i, tiin ruat manin hawngdik ai rektarhnak khuam bawn i.