Esther 4 - Zanniat Bible

Mordecai In Esther Bawmhnak Ngen I

¹ Cen ciatih ai thu tawlrelhnak khiah Mordecai in a ling fangin a thinpit in a hnikpon zik sek i. Cen buri hnikpon sil ai a lu ah vutkuang phulh dun in kap kongin le rung kongin khuapui songah feh i.

² Kumpibawi inn kotka hleng i; ikhalselai a song ahcen lut lo i, zaimantifangin thilthuam pha in thuam dun loin aisu khai lutdan lo i.

³ Persia ram song khuahacang ah, kumpibawi ai thupe a thanhnak hmuncang ah Judah mite tu kap le rung in um sio i. Kap le rung kong in rong ul ai buri hnikpon sil in vutkuang lakah it tlang i.

⁴ Mordecai ciatihin a um khiah Esther hnenum nupangte le amah kiltu tilret sa pawl in Esther khiah rel tlang fangin a thin hnaihnok roh i. Mordecai hnenah hnikpon thlenghnak tuh Esther in kuat napui Mordecai in lang nuam fawn lo i.

⁵ Ciafangin kumpibawi in amah kiltu tuhin a dahhnak tilretmi pa Hathach heh Esther in ko ai Mordecai ciatihin a umhnak thula zawt tuhin hlat i.

⁶ Hathach tu Mordecai hnenah kumpibawi inn kotka hmai ai tualrawn ah feh i.

⁷ Ciafangin Mordecai in thula hmuahhmuah heh rel ai Judah mi zongzong rek berh lekhaw kumpibawi tangka inn ah Haman in tangka pe tuhin a thukhamhnak zah khai rel sio i.

⁸ Judah mi siatsuah tuh sek in thusuahhnak Susa khuapui ai amahte suahhnak khai Hathach hnenah pakhat pe i. Mordecai in ciami lai heh Esther pe in thu umdan khai relfiang tuhin le kumpibawi hnenah Esther feh in a phunpuite caah ninghio ngen tuhin Esther heh thucah i.

⁹ Mordecai thupeciahnak bangin Hathach in bawn sio i.

¹⁰ Ciafangin Esther in Hathach heh Mordecai hnenah hlat leh ai,

¹¹ “Mi pakhatkhat, nupang ituseh, pasal ituseh, kumpibawi kohnak loin kumpibawi umhnak khan songah lut lekhaw rek tuar tuseh, tihnak tu amahte dan i. Kumpibawi ruathnak petute ai panin ramkulh songai mi zongzong in ciami dan heh ling sio i. Hemi dan in luatthilhnak tuhin lampui zaikhai um lo i; Kumpibawi in sui faikiang a tung fang ian in ciami pa, ihlahle ciami nu heh thihhnak in luat thil i. Kaimah khai kumpibawi in i ko lohnak hla khat khim zo i,” tiin rel tuhin ruai i.

¹² Mordecai in Esther ai thucahhnak a ling fangin,

¹³ Esther hnenah hetihin ralringhnak pe i: “Kumpibawi inn ah na um manin Judah mite tahin i him deuh tuh i tiin ruat mah.

¹⁴ Hemi bang tikcucan ah dapthen in um lesikhaw, van in Judah mite bawmhnak heh kawi tuhai kin o tuh i; ikhalselai nang tu na thi tuhai na pa ai innsang heh pai tuh i. Hemi bang can hrangah kumpibawinu ai na canghnak khai heh i tuh lo im? Aisu in ling i?” tiin ti i.

¹⁵ Ciamanin Esther in Mordecai hnenah thucah leh ai,

¹⁶ “Feh tulai Susa Khuapui ai Judah mite hmuahhmuah ko tu; rong ul tu ilai kaimah ca sawngen tu ih. Ni thum le zan thum song zaikhai ai lo le ding loin um tu ih. Kai le i hnenai um tu nupangte khai ciatihin um tuh ve i ing. Cia hnuaah, dan ilo napui, Kumpibawi hnenah kawi tuh ing. Ciamanin i thi lekhaw thi tuh ing,” tiin ti i.

¹⁷ Cen Mordecai khai feh ai Esther ai thucahhnak bangin bawn sio i.