Esther 3 - Zanniat Bible

Haman In Judah Mite Hnawmcan Tumhnak

¹ Can a rai hnuaah kumpibawi Xerxes in Haman tihnak pa heh a kuthnia tlangsuakte hmuahhmuah lakai bawi upa ber ah dah i. Haman tu Hammedatha ai fapa i ai Agag ai tesinfa i.

² Kumpibawi in a kuthnia ai napertu hmuahhmuah hnenah, “Haman heh upat tu ilai a hmaiah khukhlep in ning lu ut tuh i si,” tiin thupe i. Ciamanin amahte veksen in Kumpibawi ai thupehnak bangin bawn tlang de i. Ikhalselai Mordecai in bawn nuam lo i.

³ Kumpibawi napertu a dang bawite in, “Zaimanin kumpibawi thupehnak hlun na nuam lo i?” tiin ti tlang i.

⁴ Ni khat hnua ni khat rel ṭio napui amahte thu ngai nuam thotho lo i. Mordecai in, “Kai tu Judah mi ing ai Haman hmaiah tu i lu ut thil lo ing,” ti i. Ciami thu heh Haman rel tlang ai Mordecai ai umdan heh or ben ni ngai maw, tiin mangbang tlang i.

⁵ Haman hmaiah Mordecai tu khukhlep in a lu ut nuam tuh lo i, ti a ling fangin Haman heh a thinraw ngai i.

⁶ Ciahlaiah Mordecai tu Judah mi i ti a ling fangin Mordecai pakhat lek cawh tuh tu a lungkhim nawn lo i. Persia ram songai Judah mi zongzong rek tuh sio in tum i.

⁷ Kumpibawi Xerxes in kumpibawi a canghnak kum hlaihnih kum, hlakhat hla, Nisan hla ah, mi a engsan tuhhnak ni le hla ling nuam in Haman in “Purim,” tihnak camciafung duk tuhin thupe i. A duk fangin hla hlaihnih hla, Adar hla ni hlaithumhnak duk ngah i.

⁸ Cen Haman in Kumpibawi hnenah, “Bawipa, na uksong le na ramkulh cangah mi phunkhat um ai a thil tidan khai a dang miphunte ai thil tidan thawn bang dun lo i. Ciahlaiah na ukhnak ram songai dan khai hlun nuam tlang lo i. Ciamanin hetihin sik menma tuhin nangmah caah pha lo i.

⁹ Na lungkhim lekhaw hemite heh rek tuh sek in thupe tu. Ciatihin bawn lesikhaw na ram ukhnak hrangah hmang tuhin na tangka inn songah ngun tangka cuai ting hnih le thawng sawmli kaimah hrimhrim in pe thil tuh ing, tiin thu na kham ing,” tiin ti i.

¹⁰ Ciafangin kumpibawi in a thupehnak hmualnai tuhin a hmingkhenhnak kutruk hawk ai Judah mite a huatu Agag tesinfa Hammedatha ai fapa Haman hnenah pe i.

¹¹ Kumpibawi in Haman khiah, “Ciami tangka heh na kut songah na pe ing; minungte khai na pe cih ing. Pha na tihnak bangin na nuamnuam in bawn tu law,” ti i.

¹² Ciamanin hlakhat hla, ni hlaithumhnak nia ah, Haman in kumpibawi ai laingantute ko ai thuthan tuhhnak auh i. Ramsong ramkulh cangah amahte hmanghnak lai in ituseh, miphun cang hnenah amahte pon ṭen in ituseh, kuat ai ramkulh uktu bawi le bawi dangdang hnen ahkhai kuat sio i. Ciami lai heh Kumpibawi Xerxes hming in ngan ai a kutruk in tacik khen i.

¹³ Mi a hlathnakte in a ram song khuahacang ah fehpui i. Hla hlaihnih hla, Adar hla, ni hlaithum nia, ni khat songah Judah mi zongzong heh nupang, pasal ti lo, upa naupang ti loin, rek tuh sek ihang. Ninghiohnak zaikhai um loin cihmit tuh sek i; amahte thilri hmuahhmuah khai sut tuh sio i.

¹⁴ Mi zongzong in ling tlang ai cia nia ah ralring tuhin ciami lai heh ramkulh ṭen ah than tuh liang ihang.

¹⁵ Kumpibawi ai thupehnak bangin mi a hlathnakte tu rang ngai in khuahacang ah ciami thuthan tlang i. Susa khuapui ahkhai ciami thuthan i. Cen ciami thuthanhnak manin Susa khuasong mite tu ngaihsunur in a um tlang laitak ah kumpibawi le Haman tu to in zu ding kawm i.