Esther 2 - Zanniat Bible

Esther Kumpibawinu Canghnak

¹ Cia hnuaah, a thinrawhnak dap leh fangin, kumpibawi tu Vashti thil bawnhnak le a vumah thu a pehnak ruat lehsal i.

² Ciafangin a ruathnak petute hrekkhat in, “Zaimanin nangmah caah fenu mawi pakhat si lo ising?

³ Na uk song ramkulh cangah na kuthnia ai tlangsuakte hlat tulai fenu mawi hmuahhmuah he kumpibawi umhnak Susa khuapui ah kumpibawi nuzawlte umhnak inn ah fehpui selai nupang kiltu tilretmi Hegai sikruai tu. Ciata ah par tlang tu liang seh.

⁴ Cen na daihhnak ber fenu heh lang tulai Vashti tumrul in kumpibawinu tuhin bawn tu,” tiin ti i. Ciami heh kumpibawi daihdan i ai amahte tihnak bangin bawn i.

⁵ Ciami Susa khuapui ah Mordecai tihnak Judah mi pakhat um i. Mordecai tu Jair ai fapa i ai Benjamin phun, Kish le Shimei ai tesinfa i.

⁶ Kumpibawi Nebuchadnezzar in Judah kumpibawi Jehoiachin le a minungte Babylon ah sal tuhin a fehpui fangin Mordecai khai tel ve i.

⁷ Mordecai hnenah a pakhatta ai fanu Esther tihnak um i; Esther ai Hebrew hming tu Hadassah i. A nu le a pa a thi hnuaah Esther tu Mordecai in cawm ai a fanu ngaingai bangin sik i. Esther tu fenu mawi bik i ai a ruangrai khai pha bik i.

⁸ Ciamanin kumpibawi thusuahhnak thuthan tlang ai fenu tampui Susa Khuapui ah fehpui fangin Esther khai fehpui ve i. Esther tu kumpibawi inn nupang umhnak khan ah dah ai Hegai in kil i.

⁹ Hegai in Esther tu daih ngai ai pha deuh in sik i. Parhnak a phunphun pe i; a taksa hmet sah ai rong khai pha cuangin pe de i. Esther kiltu tuhin kumpibawi inn in a rilmi fenute pasarih dah i.

¹⁰ Cen Esther in Judah mi a ihnak khiah phuang awng lo i; Mordecai in phuang tuh loin ruai manin Esther in thup ngio i.

¹¹ Nisiar in Mordecai tu Esther akontih in um i ti le akontih in um leh nimaw, ti ling nuam in kumpibawi nuzawlte umhnak inn tualvan hmai in vak de i.

¹² Ciatihin fenute par tuhin kum khat rai i. Hla ruk song mura yihmui thawn a taksa hmet sah ai, a dang hlaruk song balsam yihmui thawn taksa hmet sah lala i. Cia hnuaah fenute tu pakhat pakhat in kumpibawi Xerxes hmaiah fehpui tuh ihang.

¹³ A umhnak inn in kumpibawi inn ah a feh fangin amahte daihhnak zaibang khai sil thai i.

¹⁴ Kumpibawi inn ahcen zan lamah feh tuh i ai a thangha fangin a dang nupangte umhnak inn ah feh tuh i. Ciata ah tu kumpibawi nuzawlte kiltu Shaashgaz in sik tuh i. Kumpibawi in daih ai a hming in a ko leh lomi tu fenu aisu khai kumpibawi hnenah feh leh tuh nawn lo ihang.

¹⁵ Ni khat ah Esther feh can hleng ihang, Esther, Mordecai pakhatta Abihail ai fanu, Mordecai in amah ai fanu ngaingai bangin a cawmmi khiah a hmutu hmuahhmuah in uar i. Kumpibawi hnenah a feh fangin kumpibawi nuzawlte umhnak innkiltu Hegai ai relhnak hnikpon sil i.

¹⁶ Ciatihin Xerxes Kumpibawi a canghnak kum sarih kum, hla hra hla, Tebeth hla ah Kumpibawi inn song kumpibawi Xerxes hmaiah Esther heh hleng ihang.

¹⁷ Kumpibawi in a dang fanute tahin Esther heh daih cuang i; mithmai pe ai a ithnak a dang fanute tahin khai Esther heh it sawn i. Ciamanin kumpibawi lukhuk heh Esther khuruai ai Vashti tumrul in Esther khiah kumpibawinu tuhin bawn i.

¹⁸ Cen kumpibawi in Esther upathnak ah rong aih puai lian ngai bawn ai a kuthnia ai tlangsuakte hmuahhmuah le ramkulh uktu bawite hmuahhmuah ko liang i. A uksong hmuahhmuah cawlum can pe ai a thil naihnak bangin siang ngai in lehsawng zem diamdo i.

Mordecai In Kumpibawi O Ngah I

¹⁹ Cen fenute a vel hnihhnak khawm tlang fangin, Mordecai heh naper pakhat kumpibawi in pe i.

²⁰ Mordecai in a rel awng bangin Esther in Judah mi a ihnak khiah phuang awng lo i. Phuang tuh loin Mordecai in tiam ai a naupangniu lai in a thu ngai awng bangin tun ahkhai Mordecai ai thu ngai i.

²¹ Mordecai tu kumpibawi zung ah napertu pakhat a i laiah kumpibawi inn khan dawngkhamte kiltu tilret sa pawl pahnih Bigthana le Teresh in Kumpibawi Xerxes heh ngaih kawm lo manin tawngcai ai rek tum i.

²² Ciami heh Mordecai in ling ai kumpibawinu Esther rel i. Esther in ciami thu heh kumpibawi rel salawn i.

²³ Zong tlang fangin thudik i ti ling ai tungkhuam vumah tar ai rek i. Ciami thu hmuahhmuah heh kumpibawi ai thupehnak bangin a khimniu in kumpibawi ramsong thu hnikhnaihhnak laibu songah khum i.