Esther 1 - Zanniat Bible

Vashti In Kumpibawi Xerxes Thu Elhnak

^1-2 Xerxes tu kumpibawi i ai Persia ram khuapui Susa ai a kumpibawi tohkham in India in Ethiopia tian ramkulhte za le kul hluansarih uk i.

³ Kumpibawi a cang kum thumhnak ah a kuthnia ai tlangsuakte le a ramkulh uktu bawite caah rong aih puai lianpui pakhat bawn awng i. Ciami puai ah Persia le Media ralkapte le ram kulh uktu bawite le phun upa tampui tel tlang i.

⁴ A thilri naidan le a liandan heh mi in sik tuhin hla ruk song rori hmuh i.

⁵ Cia hnuaah kumpibawi in Susa khua songai a umtu pasal hmuahhmuah, milian ituseh, mifarah ituseh, a veksen ca rong aih puai bawn awng i. Kumpibawi inn tualvan ah zarh khat song puai bawn i.

⁶ Tualvan heh vo ponzar ngo le a mepian in par liang ai ciami ponte tu ponpar in lungngo khuam vumai ngunkual ah khit sio i. Tualvan khiah lungngo, lungsan, lungvar, lung mepian le lunghing pawl phah ai cia vumah sui le ngun in bawnhnak tohkheng tampui dah i.

⁷ Cabitti tu sui khuat a phunphun in pe i. Kumpibawi a i bangin cabitti tu hmunthiam ngai in pe i.

⁸ Amahte din tuhhnak tu a laitek bawn lo i. Amahte duhzah in ding tlang tuseh, tiin Kumpibawi in a napertute heh thupe i.

⁹ Cialai ahcen Kumpibawi inn ah Kumpibawinu Vashti in nupangte ca rong aih puai bawn ve i.

¹⁰ Rong aih puai bawnhnak ni sarih nia ah kumpibawi tu a cabitti dinghnak in a thinlung puarruai i. Ciamanin tilretmi amah pumpak naruaihtute pasarih Mehuman, Biztha, Harbona, Bigtha, Abagtha, Zethar le Karkas ko ai,

¹¹ “Kumpibawinu Vashti heh a sui lukhuk khu in a hnenah koih tuhin thupe i. Kumpibawinu tu mimawi ngai i ai a sawmhnak le a kuthnia ai tlangsuakte hmaiah a nupui mawidan heh uardunhnak thawn hmuh nuam i.

¹² Ikhalselai kumpibawinu hnenah rel fangin kumpibawi thu heh el ai kawi nuam lo i. Ciafangin Kumpibawi khiah a thin raw ngai i; a thin rawdan tu a so in so i.

¹³ Cen thil thupui le thil harsa a um fangin kumpibawi ruathnak petute ai ruathnak heh zawt hmasa de i. Ciamanin amah ruathnak petute, ziang bawn lengkhaw pha tuh i ti a lingtute zawt i.

¹⁴ Amahte ruathnak a zawt dehnak ber pawl tu: Karshena, Shethar, Admatha, Tarshish, Meres, Marsena le Memukan i. Hemi tlangsuakte pasarih tu Persia le Media ramah tlangsuak upa ber pawl i ai kumpibawi tawk thilhnak naitute i.

¹⁵ Kumpibawi in anite hnenah, “Kaimah kumpibawi Xerxes in i hnenumte hlat ai kumpibawinu kawi tuseh, tiin thupe ing. Ikhalselai kawi nuam lo i. Ciamanin dan bangin ziang bawn tuh ing?” ti i.

¹⁶ Ciafangin Memukan in kumpibawi le a kuthnia ai tlangsuakte hnenah, “Kumpibawinu Vashti in kumpibawi zohsuam i; Kumpibawi zohsuam lek zolo in a kuthnia ai umtu tlangsuakte le a ram songai umtu hmuahhmuah khai zoh kin suam ve sio i.

¹⁷ Kumpibawinu ai nuncan heh a ling tlang fangin na ukhnak songai a umtu nupang hmuahhmuah in amahte pasal ṭen heh zaikhai siar tuh nawn lo i. Nupang hmuahhmuah in, ‘Kumpibawi Xerxes in kumpibawinu ko napui kawi nuam lo i,’ ti tlang tuh i.

¹⁸ Persia le Media ram songai a umtu fenu hmuahhmuah in kumpibawinu ai nuncan heh tunnia ni a tla hlanah na kuthnia tlangsuakte hnenah rel tlang tuh sio i. Ciatihin na thu ngai lohnak le hnaihnokhnak heh zaikom inkhai pai thil tuh nawn lo i.

¹⁹ Ciamanin kumpibawi lung na khim lekhaw, ‘Kumpibawi tu zaikom inkhai Vashti in tawk thil tuh nawn lo i,’ tiin Persia ram le Media ram dan laibu songah nganruai tu. Cen a tumrul in a pha deuh kumpibawinu si tu.

²⁰ Hetluk a lian le a kaumi na ukhnak ram songah heh na thupehnak a thang sio fangin nupangte hmuahhmuah in amahte pasal heh, milian ita inkhai ituseh, mifarah ita inkhai ituseh, upat tlang tuh ṭen i,” tiin ti i.

²¹ Ciami thu heh kumpibawi le a kuthnia ai tlangsuakte in a za tlang fangin lungkhim sio ai Memukan relhnak bangin kumpibawi in bawn i.

²² A ram songah lai kuat sio ai innsang pakhat songah pasalte hmuahhmuah heh hotu le thunaitu ber tuh i, tiin amahte peng le ram ṭen ah amahte pon ṭen in thuthan i.