Ruuta 1 - The Book or Ruth in Guge

Elimelek da yaakəy anə hanyin ŋga Mo'ab 1.1-22 Yi ŋga Elimelek də Mo'ab

¹ Ma saa'itə nji mala guŋwanyin a ɗa ŋwaŋuunatii, kə ɗii maɗəfən an hanyin ka shaŋ. Tə'i əndə Bayitilaama an hanyin ŋga Yahuda. Ma cə da minaakəy da manjevənaakəy uuji ŋguyirən bəra'i, kə gi cə aanə hanyin ŋga Mo'ab ka banen.

² Ma əndəkəy, Elimelek nə ləməkəy, Na'omi nə ləm ŋga minaakəy. Mahəlon da Kiliyon nə manjevənatii. Əndə Efəratə də Bayitilaama an hanyin ŋga Yahuda nə cə. Makə mbu'i tii aanə hanyin ŋga Mo'ab, kə ndzaa tii asəkə əndə'i vəran davə.

³ Ma Elimelek ŋgurii Na'omi, kə mbu'i saa'yaakəy, kə əntəgi cə, ca bwase ka ki da manjevənatə bəra'i.

⁴ Kə fə'i uuji ŋguyiriitə bəra'i makki Mo'ab. Orəpa nə ləm ŋga rəŋwə, əndə'i əs Rutə nə ləmətə. Kə ndzaa tii davə ka ɗan fəzə pu'u.

⁵ Ma daba'əkəy ha'ə, i Mahəlon da Kiliyon a məətəgi natii əs, Na'omi a ənəgi daanətə yadə ŋgurii da manjevənatə bəra'i.

Dzən ŋga i Na'omi da Rutə aa Bayitilaama

⁶ Makə fii Na'omi o'i kə buurətə Yaawe ənjaakəy, kə vii cə ka tii zəma, wata təya maɗətə da maɗaɗiinatə an hanyin ŋga Mo'ab, təya ənə aanə hanyinatə.

⁷ Kə maɗətə tii pat ka hatə nji tii da maɗaɗiinatə bəra'i, təya ŋgərə rəgwa ŋga ənəgin aanə hanyin ŋga Yahuda.

⁸ Ma tii agi dzən, wata əŋki Na'omi ka maɗaɗiinatə: «Taa wu pat, wa kya ənəgərə aasii aaɓii məcə! Wa Yaawe a ɗa kon ŋga'əən makə sənə ɗii un ka ənjənə məətəgi da ka nyi əs.

⁹ Wa Yaawe a vii kon ndzaan ka maka ma'yan, ca vii ka taa wu pat kuvatə.» Wata kya gaapətə tə tii kaa təya təkəgi. Makkiitə a ŋgəre ka uuratii, təya tuu.

¹⁰ Əŋki tii ka ki: «Poshə ka ɗan ha'ə! Ka dzən niin atsaku aagi ənjaaku.»

¹¹ Əŋki Na'omi ka tii: «Ənəm səgon, manjevənaaki! Ka ɗa mi nuun ka shin atsakya? Ma nuun ka nəhən ma'ə nyi ka pon bahə uupa manjeviitə na ŋgərə tuun kwa?

¹² Ənəm səgon manjevənaaki, ənəm səgon kə uugi nyi iirən, poshə nyi bahə ŋgərə ŋgurə ma'ə. Taa kə bii nyi ka nəki kaa nya guŋu da ŋgurə ənshin, nya uupa manjevən ma'ə,

¹³ aa ka naanagin nuun ka fəɗə ŋguyirən kona gəra tə tii təya gərə zəku'i kwa? Aa'a'ə poshə ka ɗan ha'ə manjevənaaki. Maɓətəsəkaaki pale ka non, acii kə bwase Yaawe ka nyi daanəki.»

¹⁴ Wata makkiitə a ənə ka ŋgəre ka uuratii, təya tuu. Ma daba'əkəy, Orəpa a dzə, kya gapətə tə sərəhwatii, amma ma Rutə, kə ənəgi ki aɓiitə.

¹⁵ Na'omi a ba ka ki: tsaamuu, kə ənyi ŋuzhi kuŋu əjimaaku aagi ənjatə da əntaŋfənyinatə. Nə'u tə ŋuzhi kuŋu əjimaaku!

¹⁶ Amma Rutə a ba ka ki: «gaha ciŋ ka ban ka nyi palən nya bwase ka hə. Hatə gi hə aadəvə pat, ka dzən nə nyi aadəvə. Hatə nii kwa baa pat, ka baan nə nyi davə. Ma ənjaaku, ənjaaki ndzaa nə tii. Ma Əntaŋfwaaku, Əntaŋfwaaki ndzaanəkəy.

¹⁷ Hatə nii kwa əntə, nyi maa davə nii kya əntə. Ənja ŋgəɗəgi tə nyi davə. Wa Yaawe a dzalə tə nyi də maɗuun dzalən, maɗa kə bwase nyi ka hə. Acii poshə uushə ca təke kaaŋwə maɗaam wa.»

¹⁸ Makə fii Na'omi waɓəətsa, wata kya bwase ka ban ka Rutə dzən satə.

¹⁹ Wata təya palə kyakya'ə bəra'i kura'ə aa Bayitilaama. Mbu'unatii aadəvə, kə hunne ka ənjə vəranəkəy. Makkin a ləgwa, əŋki tii: «Ya saŋ Na'omi ətsə tanyi nii?»

²⁰ Kya jikə ka tii: «gona 'wa tə nyi Na'omi (mitə moɗasəkə) ma'ə, 'wam tə nyi Mara, (mitə maɓətəsəka) acii kə kavə Əndə Baawəɗa tə nyi aagi maɗuun ŋgəra'wa.

²¹ Da məghərəvənaaki dzəggi nyi gan, amma Yaawe a ənyapaagi də nyi ciin zaɓə, yadə taa mi. Aa ŋga mi ɗii nə 'wan tə nyi Na'omi ma'ə, makə kə ɗii Əndə Baawəɗa ka nyi bwaya bwayaan, ca kagərə tə nyi aagi ŋgəra'wa?»

²² Də ha'ə ənyagi i Na'omi da maɗanatə Rutə, mitə Mo'ab, an hanyin ŋga Mo'ab. Saa'i ŋga slən cifan ŋga matsakətsakə aləkəmaarə mbu'i tii aa Bayitilaama.