Salāmo 2 - O LE TUSI PA'IA - Ekalesia Katoliko Roma

O le Valo‘aga i le Mālō o le Mesia

¹ Se a le mea ‘ua fa‘anunununu ai nu‘u ‘ese, ma mafaufau ai nu‘u i le mea e lē aogā?

² ‘Ua tutū mai tupu o le lalolagi, ‘ua pulega fa‘atasi fo‘i ali‘i, e tete‘e atu i le ALI‘I ma lē na ia fa‘au‘uina,

³ “Se‘i tatou motusi ‘ese a lā‘ua noataga, ma lafoa‘i‘eseina a lā‘ua maea ‘iā te i tatou.”

⁴ E soisoi lē o afio i le lagi; e tauemu le ALI‘I ‘iā te i latou.

⁵ ‘Ona fetalai atu ai lea o ia ‘iā te i latou i lona to‘asā, na te fa‘aatuatuvaleina fo‘i i latou i lona to‘asā tele.

⁶ “A o a‘u, ‘ua ‘ou fa‘au‘uina la‘u Tupu, i luga o Siona lo‘u mauga pa‘ia.”

⁷ ‘Ou te ta‘uina atu le tulafono; ‘ua fetalai mai le ALI‘I ‘iā te a‘u, “O lo‘u Atali‘i oe, o le aso nei ‘ua ‘ou fānauina ai oe.

⁸ ‘Ia e fai mai ‘iā te a‘u, ‘ona ‘ou foa‘iina atu ai lea ‘iā te oe o nu‘u ‘ese e fai mou tofi, ma tulu‘iga o le lalolagi e fai mou.

⁹ ‘E te fasi gaugauina i latou i le to‘oto‘o u‘amea; e pei o le ipu a le fai ipu ‘omea ‘e te nutilili‘i ‘iā te i latou.”

¹⁰ O lenei, ‘outou tupu e, ‘ia ‘outou atamamai; ‘ia a‘oa‘oina fo‘i ‘outou fa‘amasino o le lalolagi.

¹¹ ‘Ia ‘au‘auna i le ALI‘I ma le mata‘u, ‘ia fiafia fo‘i ma le gatete.

¹² ‘Inā sogi ia i ona vae ne‘i to‘asā mai o ia, ma ‘outou fano ai i le ala; auā e fa‘afuase‘i ‘ona tupu o lona to‘asā. ‘Amu‘ia i latou uma o ē fa‘atuatua ‘iā te ia.