Pese 1 - O LE TUSI PA'IA - Ekalesia Katoliko Roma

¹ O le pese silisili a Solomona.

O le Ulua‘i Pese Tama‘ita‘i.

² ‘Ia sogi mai o ia ‘iā te a‘u i sogi o lona fofoga; auā e sili ‘ona lelei o lou alofa i le uaina.

³ O le nanamu o ou u‘u lelei ‘ua ‘avea ai lou suafa e pei o le u‘u ‘ua liligiina; o le mea lea ‘ua manana‘o ai taupou ‘iā te oe.

⁴ ‘Ia e tōsina atu o a‘u, matou te taufetuli ma mulimuli atu ‘iā te oe. ‘Ua ta‘ita‘iina o a‘u e le tupu i ona potu; matou te fiafia ma ‘oli‘oli ‘iā te oe. E tele lo matou fiafia i lou alofa mai, ‘ae itiiti i le uaina; ‘ua manana‘o tagata amiotonu ‘iā te oe.

⁵ Tama fafine a Ierusalema e, e uliuli a‘u, ‘ae lālelei, e pei o fale ‘ie o Kitara, e pei o ‘ie puipui o Solomona.

⁶ ‘Aua tou te va‘ava‘ai mai ‘iā te a‘u, ‘ina ‘ua uliuli o a‘u; auā ‘ua lāina a‘u. Na ita mai ‘iā te a‘u o fānau a lo‘u tinā; na latou tofia a‘u e fai ma leoleo tōvine; a o lo‘u lava tōvine ‘ou te le‘i leoleoina.

⁷ O oe na ‘ua mana‘o i ai lo‘u loto, ‘inā ta‘u mai ia ‘iā te a‘u le mea ‘e te fafaga ai i a‘u mamoe, o le mea ‘e te ‘ave ai lo‘u lafu e ta‘oto ai i le aoauli. Auā se a le mea e ‘avea ai a‘u e pei o sē ‘ua lailoa, i fealualua‘i i lafu o ē ‘ua fa‘atasi ma oe?

Ali‘i.

⁸ ‘Āfai ‘e te lē iloa, o oe na le sili ‘ona lālelei i fafine, ‘inā alu atu ia oe i tulagāvae o le lafu, ma fafaga i a‘u tama‘i ‘oti fafine, o latalata ane i mea e nonofo ai leoleo mamoe.

⁹ La‘u uō e, ‘ua fa‘atusaina oe i solofanua i kariota o Farao.

¹⁰ ‘Ua matagofie ou alafau i sei; o lou ua fo‘i i asoa.

¹¹ Matou te faia mo oe, ni pale auro e ema i ario.

Tama‘ita‘i.

¹² ‘Ua pua‘iina le manogi o lo‘u nato, ‘ina o afio le tupu i lana tautega.

¹³ O le ‘ofu‘ofu pulu muro lo‘u manamea ‘iā te a‘u; e asoa ia i lo‘u ua i le po ‘atoa.

¹⁴ O le fuifui kofero lo‘u manamea, ‘iā te a‘u i tōvine o Enokati.

Ali‘i.

¹⁵ Fa‘auta, la‘u uō e, ‘ua e lālelei, fa‘auta, ‘ua lālelei oe, ‘ua ni mata o se lupe ou mata.

Tama‘ita‘i.

¹⁶ Fa‘auta, lo‘u manamea e, e lālelei oe, e matagofie lava; ‘ua uluuluola lo tā moega.

¹⁷ O utupoto o lo tā fale o arasi ia, o lo tā falealuga ‘ua faia i perosi.