Paruka 5 - O LE TUSI PA'IA - Ekalesia Katoliko Roma

O le Tatalo a Siona i le Atua

¹ Le ALI‘I e, ‘ia e manatua le mea ‘ua o‘o ‘iā te i matou; ‘inā e silasila mai ia, ma ‘ia e silafia le fa‘alumaina o i matou.

² ‘Ua ‘avea lo matou tofi mo tagata ‘ese ma o matou fale mo nu‘u ‘ese.

³ ‘Ua mātuaoti i matou, ‘ua leai ni tamā; o matou tinā ‘ua pei o fafine ‘ua oti a latou tane.

⁴ ‘Ua matou feinu i vai ‘ua fa‘atauina i tupe; o la matou fafie ‘ua ‘aumaia i le fa‘atali.

⁵ ‘Ua fa‘asauāina i matou i le amo i o matou ua; ‘ua lailoa i matou, ‘ua leai sina mapu ‘iā te i matou.

⁶ ‘Ua matou tu‘uina atu le lima ‘iā Aikupito ma Asuria, ‘ina ‘ia mā‘o‘ona ai i mea e ‘ai.

⁷ ‘Ua agasala o matou tamā, ‘ua leai fo‘i i latou; a o i matou, ‘ua tau‘ave e i matou a latou sala.

⁸ ‘Ua pule ‘au‘auna ‘iā te i matou; ‘ua leai se tasi e lavea‘i ‘iā te i matou a‘i o latou lima.

⁹ O le tōa‘i ‘ua matou maua ai la matou mea e ‘ai, ‘ona o le pelu ‘ua i le vao.

¹⁰ ‘Ua mū o matou pa‘u e peiseaī se ‘ogāumu, ‘ona ‘ua velavela o le oge.

¹¹ ‘Ua latou fetoso fafine i Siona, o taupou fo‘i i ‘a‘ai o Iuta.

¹² Na fa‘atautauina ali‘i i o latou lima; sa le āva i toeaina.

¹³ Na latou ‘aveina atu taulele‘a i ‘olo i ma‘aolo; na taupa‘ū fo‘i tama i ‘avegāfafie.

¹⁴ ‘Ua tu‘ua e toeaina o le faitoto‘a, o taulele‘a fo‘i ‘ua tu‘u a latou pese.

¹⁵ ‘Ua mavae le fiafia o matou loto; ‘ua liua la matou siva ma fa‘anoanoa.

¹⁶ ‘Ua pa‘ū le paleali‘i i lo matou ulu, ‘oi talofa ‘iā te i matou nei, auā ‘ua agasala i matou.

¹⁷ O le mea lea ‘ua vaivai ai o matou loto; o mea ia na fa‘apouliuligia ai o matou mata.

¹⁸ Auā o le mauga o Siona ‘ua tu‘ufua, ‘ua feoa‘i ai alope.

¹⁹ O oe, le ALI‘I e, e tumau oe e fa‘avavau; o lou nofoāli‘i e auga tupulaga lea.

²⁰ Po o le a ‘ea le mea ‘e te fa‘agalogaloina ai i matou e fa‘avavau? ‘E te tu‘ua ‘ea o i matou i aso e tele?

²¹ Le ALI‘I e, ‘ia e fa‘aliliuina o i matou ‘iā te oe, ‘ona fa‘aliliuina ai lea o i matou; ‘ia e fa‘afouina o matou aso e pei o anamua.

²² Auā ‘ua e matuā lafoa‘i ‘iā te i matou; ‘ua to‘asā tele lava oe ‘iā te i matou.