Isaia 65 - O LE TUSI PA'IA - Ekalesia Katoliko Roma

O le Finau Vale o le Nu‘u na Fa‘atigāina ai i Latou

¹ ‘Ua ‘ou fa‘alogo atu i ē na lē fesili mai; ‘ua maua a‘u e i latou na lē sā‘ili mai ‘iā te a‘u. Na ‘ou fai atu i le nu‘u na lē igoa i latou i lo‘u igoa, Fa‘auta, “O a‘u lenei!”

² ‘Ua ‘ou fa‘aloaloa atu o‘u lima i aso uma i le nu‘u finau vale, o ē sāvavali i le ala e lē lelei, e tusa ma o latou lava manatu.

³ O le nu‘u e fa‘a‘ono‘ono mai pea lava ‘iā te a‘u i o‘u luma, o lo‘o latou fai taulaga i fa‘ato‘aga ma latou fa‘amū mea manogi i luga o ma‘a‘omea.

⁴ ‘Ua latou nonofo i tu‘ugamau, ‘ua ‘atoa le po o i ai i latou i mea lilo. ‘Ua latou ‘a‘ai i tufa‘aga o pua‘a; o le sua fo‘i o mea leaga ‘ua ‘iā latou ipu ia.

⁵ O ē fai ane, “Alu ‘ese oe; ‘aua ‘e te fa‘alatalata mai ‘iā te a‘u, auā e sili ‘ona pa‘ia o a‘u ‘iā te oe.” O i latou ia o le asu i lo‘u isu; o le afi e mū i aso uma.

⁶ Fa‘auta, ‘ua tusia le ‘upu i o‘u luma: ‘Ou te lē fa‘alologo, ‘ae peita‘i ‘ou te taui atu, ‘ou te taui atu lava i o latou fatafata.

⁷ O a ‘outou amio leaga, fa‘atasi ma le amio leaga a o ‘outou tamā, ‘ua fetalai mai ai le ALI‘I. O i latou o ē na fa‘amūina mea manogi i luga o mauga ma latou fāifaia a‘u i luga o mea maualuluga; ‘ou te fuatia atu fo‘i a latou amioga anamua i o latou fatafata.

⁸ O lo‘o fa‘apea ‘ona fetalai mai o le ALI‘I: E pei ‘ona maua o le suāvine i le fuifui vine, ‘ona latou fai ane lea, “‘Aua le fa‘amaumauina, auā o lo‘o i ai le manuia.” E fa‘apea ‘ona ‘ou faia ‘ona o a‘u ‘au‘auna, e lē fa‘amaumauina i latou uma.

⁹ ‘Ou te fa‘atupuina fo‘i le fānau ‘iā Iakopo, mai ‘iā Iuta fo‘i lē na te fai mōna o‘u mauga. O ē na filifilia e a‘u latou te fai ia mo latou; o a‘u ‘au‘auna fo‘i latou te nonofo ai.

¹⁰ E faia Sarona ma lotoā o lafu mamoe ma le vanu o Akori e faia lea ma mea e ta‘o‘oto ai lafu manu, mo lo‘u nu‘u o ē na sā‘ili mai ‘iā te a‘u.

¹¹ A o ‘outou o ē lafoa‘i i le ALI‘I, ma fa‘agalogalo i lo‘u mauga pa‘ia. O ē laulau le ‘ai mo Kato ma fa‘atumu le taulaga i mea e inu mo Meni.

¹² ‘Ou te faitauina atu ‘outou mo le pelu, tou te punonou uma lava ‘ia fasia. Auā na ‘ou vala‘au, a ‘ua ‘outou le tali mai; na ‘ou fai atu, a ‘ua ‘outou lē fa‘alogo mai. ‘Ua ‘outou faia fo‘i le mea ‘ua leaga ‘iā te a‘u ma ‘outou filifilia le mea ‘ou te lē fiafia i ai.

¹³ O le mea lea, o lo‘o fa‘apea ‘ona fetalai mai ai o le Ali‘i le ATUA, Fa‘auta mai, e ‘a‘ai a‘u ‘au‘auna, a o ‘outou tou te fia ‘a‘ai. Fa‘auta, e feinu a‘u ‘au‘auna, a o ‘outou tou te fia inu. Fa‘auta, e ‘oli‘oli a‘u ‘au‘auna, a o ‘outou tou te mamā.

¹⁴ Fa‘auta e ‘alalaga a‘u ‘au‘auna ‘ona o le loto fiafia, a o ‘outou tou te fa‘ataiō ‘ona o le loto tigā, ma ‘outou uiō ‘ona o le loto momomo.

¹⁵ E tu‘u fo‘i o ‘outou igoa e fai a‘i fetu‘u a ē ‘ua filifilia e a‘u. E fasiotia fo‘i ‘outou e le Ali‘i le ATUA; ‘ae fa‘aigoa e ia o ana ‘au‘auna i se tasi igoa.

¹⁶ O lē fa‘amanuia o ia e ia i le nu‘u na te fa‘amanuia o ia ‘iā te ia i le Atua e fa‘amaoni; ma lē na te tautō i le nu‘u e tautō o ia i le Atua e fa‘amaoni. Auā ‘ua galo mua‘i puapuagā, auā fo‘i ‘ua lilo ia mea ‘iā te a‘u.

O le Foafoaga Fou

¹⁷ Auā fa‘auta mai, ‘ou te faia le lagi fou ma le lalolagi fou. E lē toe manatua mea na muamua, e lē alu a‘e fo‘i i le loto.

¹⁸ ‘Ae peita‘i ‘ia ‘outou ‘oli‘oli ma fiafia e fa‘avavau i le mea ‘ou te faia. Auā fa‘auta, ‘ou te faia Ierusalema ma fa‘afiafia, ‘ou te faia fo‘i lona nu‘u ma fa‘a‘oli‘oli.

¹⁹ ‘Ou te fiafia fo‘i i Ierusalema ma a‘u ‘oli‘oli i lo‘u nu‘u; e lē toe lagona ai le leo o sē tagi ma le leo o sē ‘alaga.

²⁰ E lē toe i ai i lea mea le tama meamea, po o le toeaina ‘ua lē ‘ato‘atoa ona aso. Auā e oti le taule‘ale‘a ‘ua selau ona tausaga; a o lē ‘ua agasala ‘ua selau ona tausaga, e fetu‘uina o ia.

²¹ Latou te faia fale ma latou mau ai; latou te totō tōvine ma latou ‘a‘ai i o latou fua.

²² Latou te lē fai fale ‘ina ‘ia mau ai nisi; latou te lē totō ‘ina ‘ia ‘ai ai nisi. Auā e pei o aso o le la‘au aso o lo‘u nu‘u; e uma lava i ē ‘ua filifilia e a‘u o mea na faia e o latou lima.

²³ Latou te lē galulue fua, latou te fānanau, ‘ae lē tupu ai le atuatuvale. Auā o le fānau ‘ua fa‘amanuia e le ALI‘I i latou, ‘atoa ma i latou e tutupu mai ‘iā te i latou.

²⁴ A o le‘i vala‘au lava i latou, ‘ou te tali atu. A o tautala mai i latou, ‘ou te fa‘alogo atu lava.

²⁵ E ‘a‘ai fa‘atasi le luko ma le tama‘i mamoe, e ‘aina ‘au o saito e le leona e pei o le povi. A o le gata e fai māna mea e ‘ai le efuefu; latou te lē faia se mea leaga, latou te lē fa‘aumatia fo‘i se mea i lo‘u mauga pa‘ia uma lava, ‘ua fetalai mai ai le ALI‘I.