Hosea 14 - O LE TUSI PA'IA - Ekalesia Katoliko Roma

O le Fa‘amafanafanaga

¹ Isaraelu e ‘inā toe fo‘i mai ia i le ALI‘I lou Atua; auā o lau agasala ‘ua e pa‘ū ai.

² ‘Inā sauni atu ia ni a ‘outou ‘upu ma toe fo‘i atu i le ALI‘I. ‘Ia ‘outou fa‘apea atu ‘iā te ia, “‘Ia e ‘ave ‘ese agasala uma ma talileleia mai, matou te avatua lava i taulaga o matou laugutu.

³ E lē fa‘aolaina i matou e Asuria; matou te lē ti‘eti‘e i solofanua; matou te le toe fa‘apea ane lava i galuega a o matou lima, ‘O matou atua ia;’ auā e alofagia e oe lē mātua oti.”

O le Folafolaga a le Ali‘i mo le Ola Fou mo Isaraelu

⁴ ‘Ou te fa‘amālōlōina lo latou liliu ‘ese; ‘ou te alofa fua ‘iā te i latou, auā ‘ua liliu‘eseina lo‘u ita ‘iā te i latou.

⁵ E ‘avea a‘u ma sau ‘iā Isaraelu; e fuga mai o ia e pei o le susana, e sosolo ona a‘a e pei o Lepanona.

⁶ E tutupu a‘e ona tātupu, e pei o le olive lona matagofie; e manogi fo‘i ia e pei o Lepanona.

⁷ O i latou o ē nonofo i lalo ifo o lona paolo, e toe ola mai i latou e pei o saito, e fua mai e pei o le vine; e tāua o ia e pei o le uaina o Lepanona.

⁸ E fa‘apea mai a Efaraima: Se a ‘ea sa‘u toe mea e fai i tupua? ‘Ua ‘ou tali atu ma va‘ava‘ai atu ‘iā te ia; e pei o se perosi lauolaola a‘u nei; e maua lau fua mai ‘iā te a‘u.

Fa‘ai‘uga

⁹ Po o ai se tasi ‘ua poto? e iloa lava e ia na mea; po o ai lē fa‘autauta? e iloa ai e ia; auā ‘ua tonu ala o le ALI‘I, e sāvavali ai e ‘ua amiotonu; a o ē fouvale, e tautevateva ai i latou.