Fa‘ata‘oto 1 - O LE TUSI PA'IA - Ekalesia Katoliko Roma

O le Aogā o Fa‘ata‘oto. ‘Ia ‘Alo ‘ese i ē fai Mea Leaga

¹ O Fa‘ata‘oto a Solomona le atali‘i o Tavita, le tupu o Isaraelu.

² ‘Ina ‘ia iloa ai le poto ma ‘ia a‘oa‘oina; ‘ia lagona ai ‘upu e atamai ai;

³ ‘ia maua ai le a‘oa‘oina i le poto ma le amiotonu, ma le fa‘amasinoga ma le amio sa‘o;

⁴ ‘ia avatu ai le fa‘autauta i ē faigofie; o le poto ma le mafaufau i le taule‘ale‘a.

⁵ E fa‘alogo mai le tagata poto, e tupu ai pea lona poto; o lē ‘ua mafaufau fo‘i e maua e ia le poto e pule ai;

⁶ e lagona ai le fa‘ata‘oto ma lona fa‘amatalaga; o ‘upu a ē popoto ma a latou ‘upu lilo.

O Fautuaga i le ‘Autalavou

⁷ O le mata‘u i le ALI‘I, o le amataga lea o le poto; ‘ae ‘ino‘ino tagata vālelea i le poto ma le a‘oa‘oina.

⁸ Lo‘u atali‘i e, fa‘alogo mai ia i le a‘oa‘o atu a lou tamā; ‘aua fo‘i ‘e te tu‘ulafoa‘iina le ‘upu a lou tinā;

⁹ auā e fai ia mea ma pale matagofie i lou ulu, ma mea e asoa i lou ua.

¹⁰ Lo‘u atali‘i e, ‘āfai e fa‘a‘ole‘ole ‘iā te oe tagata agasala, ‘aua ne‘i e usiusita‘i i ai;

¹¹ ‘āfai latou te fai mai, “Tatou ō; tatou te lamalama i le toto, ‘ia tatou talialaina lē ‘ua fai fua lana amio lelei;

¹² tatou te foloolaina i latou, e pei o le tu‘ugamau; ‘ia ‘ato‘atoa lava e pei o ē ō ifo i le lua.

¹³ Tatou te maua ai ‘oloa tāua uma lava; tatou te fa‘atūtūmu o tatou fale i le vete;

¹⁴ tatou te fai fa‘atasi la tatou vili; ‘ia tasi se taga tupe ‘iā te i tatou uma.”

¹⁵ Lo‘u atali‘i e, ‘aua tou te ō i le ala fa‘atasi ma i latou; tāofi ia ou vae ne‘i ui i lo latou ala;

¹⁶ Auā ‘ua taufetuli o latou vae i le leaga ma fa‘ata‘alise e sasa‘a ai le toto.

¹⁷ Auā e vae fua le ‘upega a ‘ua iloa e le manulele.

¹⁸ A o i latou ‘ua lamalama i latou i o latou lava toto; ‘ua latou talialaina i latou ‘iā i latou lava ‘ia oti.

¹⁹ E fa‘apenā ala o i latou uma o ē matape‘ape‘a i le ‘oloa; e ‘ave‘eseina ai le ola o ē ‘ua i ai.

O le ‘Alaga a le Poto

²⁰ O lo‘o ‘alaga le poto i fafo; ‘ua leo tele i malae.

²¹ ‘Ua vala‘au o ia i le mea e sili ‘ona ta‘alili ai o tagata, o faitoto‘a o le ‘a‘ai; ‘ua fai atu ana ‘upu i le ‘a‘ai.

²² “O ‘outou e faigofie, tou te loto i le amio faigofie se‘ia afea? ma ē tauemu, latou te fiafia i le tauemuga se‘ia afea? ma ē vālelea, latou te ‘ino‘ino i le poto se‘ia afea?

²³ Liliu mai ia i la‘u a‘oa‘iga; fa‘auta, ‘ou te liligi atu lo‘u Agaga ‘iā te ‘outou; ‘ou te fa‘ailoa atu a‘u ‘upu ‘iā te ‘outou.

²⁴ Na ‘ou vala‘au, ‘ae le‘i mafafai ‘outou; na ‘ou fa‘aloaloa lo‘u lima ‘ae leai sē na fa‘alogo mai;

²⁵ na ‘outou te‘ena la‘u pule uma lava ma ‘outou lē mafafai i la‘u a‘oa‘iga;

²⁶ o le mea lea, ‘ou te ‘ata ai a‘u i lo ‘outou malaia; ‘ou te tauemu pe a o‘o mai lo ‘outou fefe;

²⁷ pe a o‘o mai lo ‘outou fefe pei se afā, pe a o‘o mai fo‘i lo ‘outou malaia pei se asiosio; pe a o‘o mai ‘iā te ‘outou le puapuagā ma le atuatuvale.

²⁸ ‘Ona latou vala‘au mai ai lea ‘iā te a‘u, a o a‘u, ‘ou te lē tali atu ai; latou te sā‘ili‘ili mai ‘iā te a‘u, ‘ae latou te lē maua a‘u.

²⁹ Na latou ‘ino‘ino i le poto; ‘ua latou le mana‘o fo‘i i le mata‘u i le ALI‘I;

³⁰ na latou lē mafafai i la‘u pule; ‘ua latou ‘ino‘ino i la‘u a‘oa‘iga uma lava;

³¹ o le mea lava lea latou te ‘a‘ai ai i le fua o a latou amio; e mā‘o‘ona fo‘i i latou ‘iā latou togafiti.

³² Auā o le liliu ‘ese o ē faigofie e fasiotia ai i latou; o le nofo fa‘atalanoa o ē vālelea e fano ai i latou.

³³ A o lē fa‘alogo mai ‘iā te a‘u, e nofo o ia ma le fīfīlemū; e filemū o ia, e lē fefe i se mea leaga.”