Vygiiben 1 - Biblija - Pe Baltitko Romani čib (Romanes) 2019

Izrailjoskire Čhavén Pritasavena

¹ Ĥáda (Ake), isyn Izrailjoskire-čhavéngire lavá, savé zaginé Jakovosa dro Jegípto, zaginé kažno péskire kheresa:

² Ruvimo, Simieono, Lievijo i Juda,

³ Isaharo, Zavulono i Vieniamino,

⁴ Dano i Niefalimo, Gado i Asiro.

⁵ Sarén manušén, savé vyginé Jakovostyr, sys eftadešá, a Joza (Iosifo) sys angledýr ke Jegípto.

⁶ I myjá Joza (Iosifo) i saré léskire pšála, i saró léskiro ródo;

⁷ a Izrailjoskire čhavé jačné but, i jone rozbarinepe i jačné jone drieván zoralé, i doiá phuv pherdija lénca.

⁸ I terdijá dro Jegípto nevó králi, savó na džindiá Jozas (Iosifos),

⁹ i phendiá péskire manušénge: “Ĥáda, Izrailjoskire-čhavéngire manušá, len isyn drieván but i jone isyn zoraledýr améndyr;

¹⁰ ake, xohavasa len, sob (kaj) len te na javél but, pal-dová so, kiéli javéla maribén, to khetaniakirenape jone amaré vergenca (vrogenca), i džána pe aménde, i vydžána amaré phuvjátyr.”

¹¹ I čhudé pe lénde barydyrén pe butý, sob (kaj) te menčynen len pharé butienca. I jone kerdé faraonóske Pifomo i Raamsieso, fórja, vaš prigaraiben (zapasy).

¹² Ne so len butýr menčyndle, to len butýr bijandjona, i butýr jone barjona adiáke, so jone, Jegiptiáni, darándyne Izrailjoskire čhavéndyr.

¹³ I paldavá Jegiptiáni začhuvenas bi tangipnaskiro (bi žalostiakiro) Izrailjoskire čhavén te kerén pharé butiá

¹⁴ i léngiro džiibén kerdé kirkesa pharé butiátyr pe ĥlina (gleja) i bará, i kažnoné feldakire butiátyr, ke kažno butý, ke saví začhude len te kerén maribnása.

¹⁵ Jegiptóskiro králi priphendiá phur'jenge, savé babinenas tyknemasen (bijatén) Judycende, léndyr jekhakiro lav sys Šyfra, a javirjakiro Fua,

¹⁶ i phendiá: “Kiéli tumé javéna te babinen čhavorén Judycende, to tumé dykhén, syr jone bijanena: kóli javéla čhavó, tedy muliakirén les; a kóli čhaj, tedy mek te dživél.”

¹⁷ Ne phurja, savé babindle tyknemasen, syr džuvlý bijanéla, darándyne Devléstyr, i na kerdé adiáke, syr rakirdiá lénge Jegiptóskiro králi, i jačkirenas čhavorén džidenca.

¹⁸ Jegiptóskiro králi khardiá khetané phur'jen, savé babindle tyknemasen i phendiá lénge: “Vaš so tumé keréna dasavo réndo (diélo), so mekéna čhavorén džiden?”

¹⁹ Phurja, savé babinenas tyknemasen, otphendlé faraonóske: “Judéngire džuvliá na adiáke, syr Jegiptóskire; jone isyn zoralé, pal-dová so angledýr, syr javéla ke jone phuri, saví babinela tyknemases, jone uže bijandle.”

²⁰ Devél paldavá kerdiá lačhipén phur'jenge, savé babinenas tyknemasen; a manušá jačenas but i jone drieván zoraljonas.

²¹ I adiáke syr phurja, savé babindle tyknemasen, darándyne Devléstyr, to Jov kerdiá lénge kherá.

²² Tedy faraóno priphendiá sarénge péskire manušénge: “Kažnones čhavés, savó bijandjola Judénde, čhurdén dre reka (len'); a kažnona čha jačkiren te dživél.”