Titoske 1 - Biblija - Pe Baltitko Romani čib (Romanes) 2019

¹ Pavlístyr, Devléskire pisharistyr i Isusóskire Xristosóskire Apostolostyr. Me sómas bičhadó te rozlydžav manušéngiro patiaibén, savén Devél vykedyjá, i te janav len ke čačipén, sob (kaj) jone te dživén darása angíl Devléste;

² davá čačipén déla nadiéia pe viéčno džiibén, pal savó Devél dyjá lav aménge angíl, syr svéto sys sozdynó, a Devél nijékhvar na xohavela,

³ a, kiéli javdiá Léskiro časo, Jov sykadiá Léskiro lav dro phendló lav, savó sys dopatiandlo mánge pir Devléskiro uphenybén, amaré Zrakhibnariskiro Devléskiro, –

⁴ Titoske, miré čačuné čhavéske pir patiaibén, savó sys jekh khetané mánca, te javél bahtalypén láska i ramánjo Devléstyr – Dadéstyr i Rástyr-Devléstyr, Isusóstyr Xristosostyr amaré Zrakhibnaristyr.

Titoskiri Butý Vaš Devléske pe Krito

⁵ Me jačkirdjom tut pe Krito vaš dová, sob (kaj) tu duredýr te dokeres butý, saví tu na kerdián ke kónco (ke jagor) i te čhuvés phuredýr pšalén dro kažno fóro, syr me túke priphendjom:

⁶ sob (kaj) kadasavó manúš te javél bidošakiro, jekhe-romniakiro rom, sob (kaj) te javén léste čhavé, savé patiána Devléske, savé isyn narozmekne, i savé kandéna.

⁷ Pal-dová so phurydyré pšaléske trej te javél bidošakireske, syr Devléskire-kheritkoné barydyréske, sob (kaj) jov te na ginel pes drieván god'varesa, te na javél xolynakiro, matymari, phut'kirdo, rozmaribnari, te na javél jov ĥálko ke barvalypén;

⁸ a te prilel manušén ilésa, savénde nane péskiro kher i te javél drógo léske lačhipén, te džinél te rikirél pes dre vastá, te javél jov čačunó, savó obrikirela pes,

⁹ savó rikirelpe patiaibnytkone lavéske, syr les sykliakirdé, sob (kaj) jov moginelas te sykliakirél javire manušén čačuné sykliakiribnaske, i te sykavél kadalé manušén, savé isyn proti čačunó sykliakiribén.

¹⁰ Pal-dová so isyn but manušá Judendyr, savé rakiréna čhučé lavá i xohavena javirén,

¹¹ trej, sob (kaj) tumé te zaphanden muj lénge, savé zmarena čačuné droméstyr but sem'i (irjá), a vaš péskiro biladžaipnytko tyrdypén ke lové jone sykliakiréna odová, so na trej.

¹² Jekh léndyr léngiro proróko phendiá: “Kritiani isyn ŭsády (sak) xohaniúki, fuj, búsa (dika) murdalá i kirne-masengire manušá, savé xanas, syr na dre péste.”

¹³ Kadavá dophenybén isyn čačunó; pir davá bangiakir šylales len, sob (kaj) léngiro patiaibén te javél čačunó,

¹⁴ te na šunén Judéngire paramysí (skazki) i manušéngire priphenybená, savé durjona čačipnastyr.

¹⁵ Vaš žužé manušénge – saró isyn žužó, ne vaš manušénge, savé isyn nažužé pir grého, i savé na patiána Devléske, vaš lénge nisó nane žužó, pal-dová so léngiri godý i ladž isyn nažužé.

¹⁶ Jone rakiréna, so jone džinéna Devlés, ne péskire rendénca jone sykavéna, so jone otphenenape Léstyr, jone isyn džungalé i na kandéna, jone nane lačhé ni ke savó lačhé réndo.