Матфеё 9 - Biblija - Pe Baltitko Romani čib (Romanes) 2019

Isúso Vysastiakirela Manušés, Saves Rozmardiá Praličo

¹ I zagii dre bárka, Jov tradyjá pale i javdiá dro Péskiro fóro.

² I, ake, lydžánas ke Jov nasvale manušés, savó sys paštó pe matraco. I syr Isúso dykhciá léngiro patiaibén, phendiá nasvaleske: “Jav murškanó, čhavó Miro, otmekne gréhi tyré!”

³ Tedy phendlé lylvarítka jekh jekhéske: “Kadavá manúš teliakirela Devlés!”

⁴ I Isúso, džiný, so jone dumindle, phendiá: “Sóske iščo (inké) tumé duminéna fuipén dre péskire ile?

⁵ ne so lokhedýr te phenés: ‘Tyré gréhi otmekne’, ci: ‘Uštý i psir?’

⁶ A sob (kaj) tumé te džinén, so Čhavéste Manušeskireste isyn zor pe phuv te otmekél gréhi,” tedy Jov rakiréla nasvaleske: “Uštý, le matraco péskiro, i džá dro péskiro kher.”

⁷ I jov uštyjá, i gijá dro péskiro kher.

⁸ Kiéli manušá dykhné davá, jone divindlépe i slavindle Devlés, so Jov dyjá dasaví zor manušénge.

Isúso Prikharela Matfiejos

⁹ I syr Isúso džálas pašýl odothýr, Jov dykhciá manušés, savó sys beštó dro mytytko (nalogitko) kher, Matfiejos, i rakírla Léske: “Jav Mánca”, i jov uštyjá i gijá pal Léste.

¹⁰ I syr prigijape Léske te bešél pal skamínd i, ake, but mytoskire skedyibnarja i grehengire javné i bešné pal skamínd Lésa, i Léskire sykliaibnytkonénca.

¹¹ I kiéli Farisiéi dykhné davá, to phendlé Léskire sykliaibnytkonénge: “Sóske Sykliakiribnáskiro tumaró xála grehengirenca i mytoskire skedyibnar'jenca?”

¹² Ne Jov šundiá davá i phendiá: “Na saste manušénge trej sastypnari, a nasvalenge,

¹³ ne džán, sykljon, so davá značynéla, so Biblija rakírla: “Mánge trej lačhé-ilýtkima dre manušénde, a na svénta dyibená”, paldavá Me javdjom te kharav ke Pe na čačuné manušén, a grehengiren”

Isúso Sykliakirla pal Posto

¹⁴ Tén'ci javné ke Jov Ianoskire sykliaibnýtka i rakirna: “Sóske ame i Farisiéi postinasa, ne Tyré sykliaibnýtka na postinena?”

¹⁵ I phendiá lénge Isúso: “Naúšto moginéna Terneskire gosti te javén smentna (piečal'na) dre bjavitko štúba, paka Ternó isyn lénca? Dyvesá javéna, kiéli Ternó javéla lynó léndyr, i tedy jone javéna te postinen.

¹⁶ Nikón na čhuvéla kotér (kusko) nevó than pe phuranó uribén; pal-dová so prisudo kotér rozriskirla i ljoha (dira) javéla iščo (inké) baredýr.

¹⁷ Nikón na čhuvéla neví mol (vino) dre phurané goné, pal-dová so kušenape phurané, i mol vyčhuvelape i goné xasjona. Ne neví mol čhuvéna dre neve goné, i zrakhenape jekh i javír.”

Isúso Otdžidiakirela Barydyreskire Čha, i Sastiakirela Džuvliá, Saví Čiladia Léskiro Uribén

¹⁸ Syr Jov rakirdiá davá, Judýtko barydyró podgíia, i, pyi pe čangá, phendiá: “Čhaj mirí akaná myjá; ne Tu jav, čhuv vast Tyró pe láte, i joj otdžidjola.”

¹⁹ I uštyjá Isúso i gijá pal léste, i adiáke-pac' Léskire sykliaibnýtka.

²⁰ I, ake, džuvlý, saví sys drieván nasvaly dešudúj berš thadune ratvalypnasa, zagii palál léstyr, joj čiladiá jagóro (krajo) Léskire uribnaskiro,

²¹ pal-dová so joj rakirdiá kokori péske: “Kóli me féni (tóka) čilavavas uribén Léskiro, to me sastjovavas.”

²² I Isúso risijá pale, dykhí la, phendiá: “Jav murškany, čháie, tyró patiaibén zrakhciá tut.” I jekhátyr (srázu) adáia džuvlý jaciá sasty.

²³ Kiéli Isúso zagijá dro barydyreskiro kher, dykhciá bašaibnaskiren pe svirol'ki i but javire manušén, savé šumindle godlenca,

²⁴ I Jov phendiá: “Džán javrí, saré! Terný patyvalý džuvlý isyn namuly, ne joj isyn suty.” I jone sandlepe Léstyr.

²⁵ I kiéli manušá sys bičhadé javrí, Jov gijá dre štúba, lyjá la pal vast, i uštyjá terný patyvalý džuvlý.

²⁶ I mavlýn (malva) pal davá rozgijápe pir sarí doiá phuv.

Isúso Sastiakirla Duje Kororé Manušén

²⁷ I kiéli Isúso džálas odothýr, duj kororé manušá giné pal Léste, dyi gódla: “Potangine (požalin) amen, Čhavó Davidóskiro!”

²⁸ I kiéli Jov zagijá dro kher, kororé manušá podginé ke Jov, i Jov phendiá lénge: “Iščo patiána, so Me mogináva davá te keráv?” Jone rakirna Léske: “Čačó, Rajo Dévla.”

²⁹ Tén'ci Jov čiladiá jakhá léngire i phendiá: “Mek te javél tuménge pir tumaró patiaibén.”

³⁰ I otkerdepe léngire jakhá. I Isúso zorjása uphendia lénge: “Sob (kaj) nikón te na džinél.”

³¹ Ne kiéli jone giné péske, rosphendlé pal Léste pir sarí kodoia phuv.

Isúso Sastiakirla Kašuke Manušés

³² Kiéli ž jone džánas, javrí ke Jov jandlé niemone (mutone) manušés nalačhé duhósa.

³³ I kiéli nálačho dúho sys tradyno javrí, niemo (muto) lyjá te rakirél. I divindlépe manušá, rakirí: “Nijékhvar na sys dasavo dro Izrailjo!”

³⁴ Ne Farisiéi rakirénas: “Davá isyn nalačhé-duhengiro xulái, savjása zorjása Jov tradéla javrí nalačhé dúhi.”

Isúso Tanginela Manušén

³⁵ I psirelas Isúso pir fórja i gavá, sykliakiri dre léngire sinagogi Devléskiri bahtalý zan (zvies') i sastiakirdia kažno nasvalypen i dukh dre manušénde.

³⁶ Kiéli Jov dykhciá but manušén, tedy drieván potangindia len, pal-dová so jone pyné dro dúho i sys kažno péske, syr bakriá bi čhupnariskiro.

³⁷ Tén'ci Jov rakiréla Péskire sykliaibnytkonénge (učenikenge): “Čačó, ubijandypen isyn barvaló, a butiarné isyn nábut;

³⁸ mangén paldavá Ras-Devlés, Kon isyn Xuláj pe féldy, sob (kaj) jov te bičhavel butiarnen pe ubijandypen Péskiro.”