Матфеё 8 - Biblija - Pe Baltitko Romani čib (Romanes) 2019

Isúso Sastiakirela Manušés

¹ I kiéli Jov gijá telé bergátyr, but manušá giné pal Léste.

² I ake, prokazytko manúš podgíia i pyjá pe čangá angíl Léste, rakirí: “Rajo Dévla, kóli Túke isyn pir iló, vysastia'kir man”

³ Isúso protyrdyjá vast, čiladiá (čypindia) les i phendiá: “Pir iló isyn, tu kakaná san žužó (čysto).” I adáj že jov sys vysastiakirdo prokazatyr.

⁴ I rakírla léske Isúso: “Dykh že; ni konéske na rákir, ne džá, sykáv pes rašáske, jan dáro, so priphendiá Mójza, syr dophenybén manušénge.”

Isúso Sastiakirela Rimóskire-Šelengire Dynaris

⁵ Syr Jov gijá dro Kapiernaumo, podgíia ke Jov šelengire-xaladytko barydyró i mangdiá Les te pomoginel,

⁶ i phendiá: “Rajo Dévla miro dynári (sluga), isyn paštó rozmardo praličosa kheré i drieván men'čynelape dukhendyr.”

⁷ Isúso rakiréla léske: “Me javáva i vysastiakirava les.”

⁸ Ne šelengiro otphendiá: “Rajo Dévla, me na som mol, sob (kaj) Tu te zadžas dro miro kher, ne Tu jekh phen lav i javéla miro dynári nevéstyr sastó.

⁹ I me adiáke-pac' som manúš, pe konéste isyn barydyrá, mánde isyn xaladé, savé kandéna man, i me phenáva jekhéske: ‘Džá’, i džála; i javireske: ‘Jav’, i javéla, i kadaleske dynaríske miréske: ‘Ker davá’, i keréla.”

¹⁰ I syr Isúso šundiá davá, divindiape i phendiá manušénge, savé giné pal Léste: “Čačes, Me phenáva tuménge: Me na lathjom dasavo patiaibén i dro Izrailjo.

¹¹ Me phenáva tuménge, so but javír javéna vastokóstyr i zapadostyr (pal-paniendyr) i bešena pal skamínd Avraamosa, Isakosa i Jakovosa dro Kralipén dro Bolybnáskiro Rajo,

¹² ne manušén, savén vykedyné vaš Kralipén, Devél tradéla javrí dre kalypén; odój javéla roibén i dandengiri skriežyma”

¹³ I phendiá Isúso šelengireske: “Džá, pal tyró patiaibén javéla túke kerdó” I dynári vysastija dre kodová-pac' mardó (štúnda).

Isúso Sastiakirela Buté Manušén

¹⁴ I javdiá Isúso dro Petriskiro kher, i dykhciá, so léskiri sasuj sys pašty xačkiribnasa:

¹⁵ i Jov čiladiá lákiro vast, i xačkiribén jačkirdiá la, i joj uštyjá i dynarindiá lénge.

¹⁶ Kiéli javdiá bel'vél', janénas ke Jov buté manušén, savénde sys nálačho dúho (fáno), i Jov tradyjá javrí dúhi (fany) laveskire zorjása, i Jov vysastiakirdiá sarén, savé sys nasvale;

¹⁷ sob (kaj) te kerélpe dová, so phendiá proróko Isajo: “Jov lyjá pe Péste amaró bizorjakiriben i lydžijá saré amaré nasvalypena.”

Manušá, Save Dyné Lav Isusóske te Džán Lésa

¹⁸ Kiéli Isúso dykhciá but manušén pašýl Péste, Jov priphendiá Péskire sykliaibnytkonénge te džán pe javír brégo.

¹⁹ I podgíia ke Jov jekh lylvarítko i phendiá: “Sykliakiribnáskiro (Učytieljo)! Me džáva Túsa, karik i Tu džása.”

²⁰ I rakiréla léske Isúso: “Lokhniende (lisende) isyn nory, bolybnáskire čirikliende isyn gniázdy (kúfy), a Manušéskire Čhavéske nane kaj šeró te čhuvél.”

²¹ Ne javír phendiá Léske: “Rajo Dévla, mek man angíl te garavav miré dadés.”

²² Ne Isúso rakiréla léske: “Jav Mánca; mek mulé te garaven péskire mulen.”

Isúso Štyliakirela Štormo

²³ Kiéli gijá Isúso andré bárka, but Léskire sykliaibnýtka giné pal Léste

²⁴ i, ake, ĥazdyjápe baró štormo adiáke, so bárka začhuvelaspe valnenca; ne Jov sys sutó.

²⁵ Ke Jov podginé sykliaibnýtka, džangade Les, rakirí: “Rajo Dévla, zrákh, ame tasadjovasa.”

²⁶ I Jov rakiréla lénge: “Sóske tumé san darandytka, tumé san manušá nabaré patiaibnása!” Tén'ci uštyi, Jov priphendiá balvaliake i morjoske, i kerdiápe baró štylypen.

²⁷ I manušá divindlépe i rakirdé: “Kon adavá Manúš isyn, so až balvál i mórjo (derjáv) Les kandéna?”

Isúso Tradéla Javrí Nalačhé Dúhi Duje Manušéndyr

²⁸ I kiéli Jov javdiá pe javír brégo pe Gadarinoskiri phuv, pirilyne Les duj manušá nalačhé duhenca (fanenca), savé džánas javrí maĥilytkone pieščerendyr (ĥiebarendyr) dasavé xoliamé, so nikón na moginelas te džal pir dová drom.

²⁹ I, ake, jone dénas gódla, rakirí: “So Túke trej améndyr, Čhavó Devléskiro? Javdian Tu adarík angíl uphendló mardó (štúnda) te men'čynes amen?”

³⁰ Sys ĥurto balyčen, savé xanas čar nádur léndyr.

³¹ I nalačhé dúhi (fany) mangenas Les: “Kóli Tu tradesas javrí amen, bičháv amen dro ĥurto balyčengiro”

³² I Jov phendiá lénge: “Džán.” I jone mekné manušén i zaginé dre balyčende, i, ake, saró ĥurto balyčengiro čhurdyjape bregoskire krutymatyr dro mórjo (derjáv) i jone tasadyne dro paní.

³³ Čhupnárja (pastúhi) balyčengire našné, i javné dro fóro, i rosphendlé saró, i pal manušénde nalačhé duhenca.

³⁴ I, ake, saró fóro vygijá te pirilel Isusós, i, syr dykhné Les, mangné Les te durjol léngire phuvjátyr.