Матфеё 6 - Biblija - Pe Baltitko Romani čib (Romanes) 2019

Isúso Sykliakiréla te Kerél Lačhipén

¹ Dykhén, i na sykavén péskiro patiaibén pe jakhá manušénge; kóli na adiáke, na javéla tuménge otdyibén Bolybnáskire Dadéstyr.

² Ne kóli tu désa odolénge, savénde isyn trébima, na phurde zoralés šaribnasa dro rógo (truba) angíl péste, syr keréna dujemuitka manušá dre sinagogi i pe vulícy (gásy), sob (kaj) te slavinén len manušá. Čačes, rakiráva tuménge: jone uže doresné péskiro otdyibén.

³ Ne kiéli tu désa odolénge, savénde sys trébima, mek tyró zérvo (liévo) vast na džinéla, so keréla čačó (pravo).

⁴ Sob (kaj) tyró dyibén te na javél dyc'lo; i Dad tyró, Savó dykhéla saró, otdéla túke tyró otdyibén.

Isúso Sykliakiréla te Mangélpe Devléske

⁵ Kiéli tu mangesape, na jav syr kadalé dujemuitka, savé kaména te terdjon pe véngly javrí i dre sinagogi, sob (kaj) len te dykhén manušá. Čačes, Me rakiráva tuménge: jone uže doresné péskiro otdyibén.

⁶ Kiéli tu mangesape, zadžá dre andratuný štúba péskiri, phande vudár, i mangpe Dadéske tyréske, Savó isyn nadyc'lo; i Dad tyró, Savó dykhéla tut, so javirénge na dyc'lo, otdéla túke.

⁷ Kiéli tu mangesape, na rákir but lavá, syr Náiudy, savé duminéna, so len ušunena pal léngire dlenge mangipena.

⁸ Na javén, syr jone isyn, pal-dová so Dad tumaró džinéla, so tuménge trej angíl, syr tumé pomangena Léstyr.

⁹ Mangénpe že adiáke: ‘Dad amaró Bolybnáskiro, Savó isyn dro Bolybnáskiro Rajo! Mek te slavinelpe Tyró lav;

¹⁰ Mek te javél Tyró Kralipén, Mek te spolninélpe Tyrí vólia pe phuv, Syr i pe bolybén;

¹¹ Pode aménge maró so dyvés;

¹² I primang aménge dlugi amaré, Syr ame primangasa odolénge, Save isyn vužle aménge;

¹³ I na domek amen ke čoripén; ne zrákh amen nalačhestyr; pal-dová so isyn Tyró Kralipén i zor i sláva pe viéki. Amín'.’

¹⁴ Pal-dová, kóli tumé primangena manušénge pal léngire gréhi, tumaró Bolybnáskiro Dad primangela tuménge,

¹⁵ ne kóli na javéna te primangen gréhi manušénge, tumaró Bolybnáskiro Dad na primangela gréhi tumaré.

Pal Posto

¹⁶ Kiéli tumé postinena, na kerén rondlé muiá, syr keréna dujemuitka, pal-dová so jone garavena péskire čačuné muiá, sob (kaj) manušá te dykhén, so jone postinena. Čačes, Me rakiráva tuménge: ‘Jone uže doresné péskiro otdyibén.’

¹⁷ Kiéli tu postinesa, pomakh péskiro šeró i vymor muj péskiro,

¹⁸ sob (kaj) te na sykavespe javirénge, so tu postinesa, ne jekhe Dadéske tyréske, Savó isyn nadyc'lo; i Dad tyró, Savó dykhéla dová, so na dykhéna javír manušá, otdéla túke lačhipnása.

Pal Barvalypén dro Bolybnáskiro Rajo

¹⁹ Na keden péske kučipena pe phuv, kaj mol' i orža xasiakirena, i čora podĥanavenape i čorena;

²⁰ ne keden péske kučipén vaš Bolybnáskiro Rajo, kaj ni mol', ni orža na xasiakiréla, ni čora na podĥanavenape; i na čorena;

²¹ pal-dová so, kaj tyró kučipén isyn, odój tyró iló javéla.

Pal Jag vaš Masá

²² Jakhá isyn syr momolýtko (svietíl'niko) vaš masá. Paldavá, kóli jakh tyrí javéla žužy (čysto), tedy tyré masá javéna žužé.

²³ Kóli jakh tyrí na javéla žužy, tedy saré masá tyré javéna dro ciamlypén. Paldavá, kóli jag, saví isyn dre túte, jaciá ciamlypnasa, savó ž baró tedy isyn davá kalypén (ciamlypén).

Pal Devléste i pal Barvalypén

²⁴ Nikón na moginéla te dynarinél duje range, ci jekhéske javéla te sykavél patýv, ne javír javéla na pir iló; ci javéla čačunó ke jekh, a ke javír javéla na pir iló. Tuménge naštý te dynarinén (te služynen) Devléske i barvalypnaske.

²⁵ Paldavá Me rakiráva tuménge: na piridživen pal tumaró džiibén, so tuménge te xan ci te p'jen; ci pal tumaré masá, so te ur'jen. Naúšto (xaj) džiibén isyn na drogedyr xabnastyr, naúšto masá isyn na drogedyr uribnastyr?

²⁶ Podykhen pe bolybnytkone čirikliende; jone na sieinena, na sčhinena, na čhuvéna sčhindlo dre šúrna; i Dad tumaró Bolybnáskiro čaravela len. Naúšto tumé na san pe but drogedyr léndyr?

²⁷ Ne kon tuméndyr, piridživi pal džiibén, moginéla te kerél dlengedyr pe nábut péskiro džiibén?

²⁸ Ne so tumé piridživena pal uribén? Dykhén pe feldýtka lilii, syr jone barjona; na keréna butý, na khuvena thava,

²⁹ ne Me phenáva tuménge, so i Solomóno péskire barvalypnasa na ur'jelaspe adiáke, syr kažno léndyr.

³⁰ Kóli ž dasavo uribén Devél déla feldytkone čarjake, saví adadyvés isyn, ne atasiá javéla čhurdyi dro bov, tedy so ž na fedýr Jov déla tuménge uribén, tumé ž san nabaré – patiaibnaskire manušá?

³¹ Tedy na piridživen, i na rakirén: ‘So aménge te xas?’ ci ‘So te pjas, ci dro so te urjavaspe?’

³² Pal-dová so saró davá rodéna Náiudy, i pal-dová so Dad tumaró Bolybnáskiro džinéla, so tuménde isyn trébima dro davá saró.

³³ Rodén ža angíl Devléskiro Kralipén dro Bolybnáskiro Rajo i čačipén Léskiro, saró javír javéla dynó tuménge upralestyr.

³⁴ Paldová na piridživen pal atasiatuno dyvés, pal-dová so atasiatuno dyvés kokoró javéla te duminel pal péste; uhtýlla (dósi) pharipén vaš kažno dyvés.