Матфеё 28 - Biblija - Pe Baltitko Romani čib (Romanes) 2019

Otdžidyipen

¹ Pe zlóko, dro pérvo kurkitko dyvés paló sávato, javné Maríia Magdalina i javír Maríia te dykhén maĥila dre koplíca.

² I ake, kerdiápe baró phuvjákiro trinskiriben; pal-dová so Devléskiro Jangólo gijá telé bolybnástyr, i podgii, riskirdiá bar i sys beštó pe léste.

³ Léskiro vydykhiben sys syr bliskavica, i léskiro uribén sys parnó syr iv.

⁴ I rakhibnárja izdranas darátyr angíl léste, i kerdépe, xaj, jone sys mulé.

⁵ I lyjá te rakirél Jangólo, phení džuvlienge: “Na andyršan; me džinóm (džináv), so tumé rodéna Isusós, Saves primarde pe trušúl;

⁶ Les (Jov) nane adái, pal-dová so Jov otdžidyjá, syr Jov i phendiá. Javén, podykhen štéto, kaj Jov sys paštó;

⁷ i džán sygedýr, phenén Léskire sykliaibnytkonénge, so Jov otdžidyjá meribnástyr i Jov džála angíl tuménde dre Galiliéia, odój tumé Les dykhéna, ake, me phendjom tuménge.”

⁸ I vygii sýges koplicatyr, jone prastándyne darása i baré radymása te rosphenén Léskire sykliaibnytkonénge.

⁹ I, ake, Isúso pirilyja len, rakirí: “Radynénpe!” I jone, syr podginé, oblyne ĥerá Léskire i poklonindlepe Léske.

¹⁰ Tedy rakiréla lénge Isúso: “Na andyršan; džán, i phenén Miré pšalénge, sob (kaj) te džán dre Galiliéia; i odój jone dykhéna Man.”

Haladengiri Mavlýn

¹¹ Syr jone džánas, tedy vari-savé xaladéngire rakhibnar'jendyr javné dro fóro i rosphendlé rašángire barydyrénge saró, so kerdiápe.

¹² I kiéli jone skedynépe khetané godephurenca, zrakirdepe maškír péste; jone dyné but rupuvé lové xaladenge,

¹³ rakirí: “Phenén: ‘Léskire sykliaibnýtka javné ratý, čorde Les, kiéli ame sámas suté.’

¹⁴ I kóli davá javéla džindló theméskire barydyréske, ame patiakirása les i zrakhasa tumen piridživipnastyr.”

¹⁵ I jone lyné rupuvé lové i kerdé, syr len sykliakirdé. I kadaja mavlýn (malva) rozgijápe maškír Judénde ke/žýko adadyvesatuno dyvés.

Isúso Sykliaibnytkonénge

¹⁶ Dešujekh ža sykliaibnýtka giné dre Galiliéia pe bérga, karik phendiá lénge Isúso.

¹⁷ I kiéli jone dykhné Les, poklonindlepe Léske; ne vari-savé na patianas.

¹⁸ Na Isúso javdiá i phendiá lénge; “Saró pravo dynó Mánge, syr pe bolybén, adiáke pe phuv.

¹⁹ Paldavá džán, sykliakirén saré nácyi, bolen len dro lav Dadéskiro, Čhavéskiro i Sventoné Duhoskiro (Fanoskiro);

²⁰ sykliakirén len te kerén saró, so Me priphendjom tuménge. I, ake, Me som tuménca ke viekoskiro kónco (jagóro).”