Левито 2 - Biblija - Pe Baltitko Romani čib (Romanes) 2019

Pal Marunó Janybén

¹ Kóli vari-konéste pe iló te janel Ráske-Devléske marunó svénto dyibén, mek te janel jaržó parné givestyr, i čhuvéla pe léste jeliejo (olivítko dzet), i čhuvéla pe léste livano,

² i janéla les ke Aaronóskire čhavé, ke rašaja, i léla pherdý burnyk (žmienia) jaržó jeliejosa i saré livanosa, i shačkiréla rašáj davá syr ripiribén pe altárjo; davá isyn svénto dyibén, gudló thuv, Ráske-Devléske;

³ a so jačéla marune janybnastyr, dová javéla Aaronóske i léskire čhavénge: davá isyn naj baredýr sventyma Ráskire-Devléskire sventoné dyibnástyr (žertvendyr).

⁴ Kóli janesa svénto dyibén syr marunó janybén, savó isyn pekno dro bov, tedy jan pšienična maré priesna, pirimiešyndle jeliejosa, ci priesna mariklia, pomakhne jeliejosa.

⁵ Kóli tyró svénto dyibén isyn marunó janybén skoroviedatyr (xičatyr), to tedy davá trej te javél pšenično jaržó, pirimiešyndlo jeliejosa, priesno;

⁶ rosphagir les pe koterá (kuski), i čhuv pe léste jeliejo: davá isyn marunó janybén.

⁷ Kóli tyró svénto dyibén isyn marunó janybén pirjatyr, to tedy trej te kerél les pšeničnone jaržestyr jeliejosa (olivitkone dzetesa),

⁸ i jan marunó janybén, savó sčhudo daléstyr, Ráske-Devléske; otdé les rašáske, a jov les janéla ke altárjo;

⁹ i léla rašáj dalé sventoné dyibnástyr paš syr ripiribén, i shačkiréla pe altárjo: davá isyn svénto dyibén, gudló thuv, Ráske-Devléske;

¹⁰ a so jačélape marune janybnastyr, to mek te javél Aaronóske i léskire čhavénge: daja isyn bari sventyma sventoné dyibnástyr (žertvendyr) Ráske-Devléske.

¹¹ Ni savó marunó janybén, savó janéna Ráske-Devléske, na kerén kvašeno pe droždžy, pal-dová so ni kvašeno, ni avgín naštý tumé te xačkirén dro svénto dyibén Ráske-Devléske;

¹² syr janybén pervoné barjakirdendyr (plodendyr) janéna len Ráske-Devléske, a pe altárjo naštý te čhuvén len vaš gudló thuv.

¹³ Kažno tyró marunó janybén lond'kir londesa, i na jačkir tyró svénto dyibén bi londeskiro tyré Devléskire zavietostyr: kažnoné tyré janybnasa jan lond.

¹⁴ Kóli janesa Ráske-Devléske pervoné barjakirldendyr marunó janybén, jan dro dáro tyré anglatuné barjakirdendyr, savé isyn kolosendyr, savé vyšut'kirde pe jag, rostasade ziárki,

¹⁵ i čhuv pe lénde jeliejo, i čhuv pe lénde livano: davá isyn marunó janybén;

¹⁶ i shačkiréla rašáj syr ripiribén paš ziárki i jeliejo saré livanosa: davá isyn svénto dyibén (žértva) Ráske-Devléske.