Ióvo 8 - Biblija - Pe Baltitko Romani čib (Romanes) 2019

Vildado Rakiréla

¹ I otphendiá Vildado Šuahostyr i phendiá:

² “Syr ĥará tu javésa te rakirés adiáke? I tyré lavá, so tu rakirésa, isyn sýrby zoralý balvál?

³ Ci Devél piririskirela séndo, ci Sarezorjákiro Devél piririskirela čačipén?

⁴ Kóli tyré čhavé kerdé gréhi proti Léste, tedy Jov i sendiakirdia len pal léngiro čoripén.

⁵ Kóli tu javésa te rodes xačkirdes Devlés, i te čhuvés péskire mangipena angíl Sarezorjakireste;

⁶ kóli tu san bibangiakiro i devlýtko, tedy, čačó, Jov uštéla pal túte, i Jov keréla adiáke, sob (kaj) te javél mištypén tyré kheréske.

⁷ Mek vagedyr (angledýr) túte sys nábut (kutý), ne dro jagóro (dro kónco) túte javéla drieván but.

⁸ Paldová phučpe, me mangáva tut, pal ródy, so sys vagedyr i obdumin dová, so léngire dadá lathné,

⁹ pal-dová so, ame sam adasavé, sýrby tasiá bijandyjam, i ame nisó na džinása, i amaré dyvesá pe phuv prastána syr zer (tien').

¹⁰ Ci na sykliakirdé prapapy tut, ci na phendlé túke, ci na vyphendle lavá léngire iléstyr?

¹¹ Ci moginéla papiruso te barjol bi dričakiro (bi bolotoskiro)? Ci moginéla sil (kamyšo) te barjol bi panieskiro?

¹² Kiéli daja raslina iščo (inké) zeleny i nany čingirdy, jej vyšutjola sygedýr kažnoné čarjatyr.

¹³ Adiáke-pac' i kodolengire dromá, kon bistrel Devlés i fujé-manušéngiro užakiribén pe lačhipén, adiáke-pac' xasjola,

¹⁴ léngiro zoraló patiaibén xasjola, i dová pe so jov rozginela, isyn syr mizgirjoskiri (paukoskiri) thava (plieva).

¹⁵ Jov podrikiréla pes pal péskiro kher, kher na terdjola, jov uhtylelape pal léste, ne kher na vyrikiréla les.

¹⁶ Kadasavó manúš barjola sýrby dylyny čar tel kham, i lákire randiá piribarjona bar;

¹⁷ lákire kórni (rukhá) khuvenape trusciál barengiri bérgica, jone promarena štéto maškír bará.

¹⁸ Ne kóli Devél vykošela len léngire štetóstyr, tedy pe dová štéto otphenenape léndyr, phení: “Me na dykhcjom tumen!””

¹⁹ Ake, saví isyn rádyma kadalé fujé-manušéngiri dalé džiibnastyr, i prahostyr javír barjona.

²⁰ Ake, Devél na otčhurdela Péstyr bidošengire manušés, syr Jov i na podrikiréla paló vast odolés, kon keréla bibáht.

²¹ Iščo Jov pherdiakirela tyró muj sabnasa, i tyré uštá baré radymása,

²² Jov učhakiréla ladžasa tyré vergén, i šátry, kaj dživéna fuj manušá, xasjona!”