Ióvo 6 - Biblija - Pe Baltitko Romani čib (Romanes) 2019

Ióvo Otphenéla

¹ I otphendiá Ióvo lavénca:

² “O, te čhuvén pe ubladýtka (viésy) miro saró kalypén, i te čhuvén sarí mirí bari bída pe biz'mieny?

³ Pal-odová so akaná daja bída javélas pharedyr morjoskire (derjavéskire) prahostyr, paldavá miré lavá isyn dasavé sygna.

⁴ Pal-odová so Sarezorjakire–Devléskire maribnýtka bustiá (striély) isyn andrál mánde, miré masá p'jena léngiri truta (otrava): trašaibén angíl Devléste terdijá dre stonka pe mánde.

⁵ Ci godlela buso (diko) óslo (miegári) pašýl čar, ci brylinela guruv paš léskiro xahaiben (miesivo)?

⁶ Ci saštý te xas bi smakoskiro xabén bi londeskiro? Ci isyn vari-savó smako dro parnoreskiro bialtko?

⁷ Dová, so miro di otphenelape te xal, paldavá isyn miro namišto xabén;

⁸ O, sob (kaj) féni me mogindjomas te pomangav, i sob (kaj) Devél te javél dro jekhipén miré mysliasa:

⁹ sob (kaj) féni te zakamel Devél, sob (kaj) Jov te rostasavel man, sob (kaj) Jov te protyrdel Péskiro vast i te xasiakirél man.

¹⁰ Tedy javélas mánge ramanipen (spokojstvijo); i me zoralés radynavaspe až dre mirí dukh, so na žalinela man, so me na otphendjompe Sventoné Devléskire lavéndyr.

¹¹ Kaj te lav zor mánge, sob (kaj) te užakirav lačhipén? I savó isyn miro kónco (jagóro), sob (kaj) mánge iščo (inké) te vyrikirav?

¹² Ci isyn mirí zor dasaví, syr zoralé bará isyn? Ci isyn miré masá dasavé, syr xarkóma (mied')?

¹³ Ci davá ráda me kokoró péske? Ci godypén jačkirdiá man?

¹⁴ Kodoléske, kon isyn zamenčyndlo, trej te užakirel lačhipén malendyr? Kóli jov féni (tóka) te na jačkirel dar angíl Sarezorjakire Devléste.

¹⁵ Miré pšála obginepe mánca xohanés sýrby rékica (lenorí), sýrby rekicengiro thadyipen, so lydžála paní duredýr,

¹⁶ savó isyn ciamlo ljodostyr, i dro savó iv garadjola:

¹⁷ kiéli jone vyšucjona, tedy jone tyknjona; kiéli xačkiribén déla dre lénde, jone xasjona péskire šteténdyr:

¹⁸ jone bandjona pir bergakire rigá, jone thadena pe čhučí phuv i xasjona.

¹⁹ Femanakire karavany dykhéna pe lénde, a lodyipnaskire manušá Savejatyr (Šebatyr) rozginena (rikiréna nadiéia) pe lénde:

²⁰ jone ladžana péskire patiaibnastyr; jone javéna odój, i lénde saró piripentyndiape dre godý.

²¹ Adiáke-pac' i tumé akaná san sýrby kodolé rekicy: tumé dykhéna vari-so darano i tumé akaná daréna.

²² Ci phendjom me: “Janén vari-so mánge!” Ci: – “Kerén dáro mánge tumaré barvalypnastyr!”

²³ Ci: – “Zrakhen man vergoskire vastéstyr!” Ci: – “Vyrakhen man pritasaibnaskire vastéstyr!”

²⁴ Sykliakirén man i me javáva te rikirav čib, i kerén adiáke, sob (kaj) me te ĥaljovav, dro so me dyjompe dukhá (xohadjompe).

²⁵ Saví zor isyn dre čačuné lavá! Ne savó ž isyn lačhipén, so tumé čingardenape mánca?

²⁶ Ci tumé priduminena, sob (kaj) te bangiakiren man dre lavá, džinén – balvalitka isyn manušéskire lavá, konéske isyn pharó.

²⁷ Dykhén: tumé čhurdena žriébije, sob (kaj) sirota (piroto) te javél tumaró pishári, i ganavena ĥanbín (jama) tumaré maléske.

²⁸ Akaná, dykhén pe mánde: i angíl tumaré muiá, sob (kaj) me te xohavav?

²⁹ Risjon, me mangáva tumen, fuj na javéla; risjon iščo (inké), sob (kaj) tumé te dykhén miro čačipén.

³⁰ Ci isyn savó načačipén miré čibatyr? Ci na rozĥaljovava me lačhés, kaj isyn fuipén?