Ióvo 4 - Biblija - Pe Baltitko Romani čib (Romanes) 2019

Elifazoskiro Rakiribén

¹ O, Elifazo Fiemaninostyr, otphendiá i rakirdiá:

² “Kóli javéna te rakirén lav ke tu, sob (kaj) tu tedy te na peres dro dúho (fáno)? Ne kon sataki moginéla te obrikirel javirés te rakirél?

³ Čačó, so tu sykliakiresas buten, i tu zoraliakirdian bizorjákire vastá.

⁴ Tyré lavá podrikirenas odolén, kon obštavelape, i tu zoraliakirdian kodolén, savénde čangá bandine.

⁵ Ne akaná bibáht pyjá pe túte, i tu peresa dro dúho (fáno); joj čiladiá tut i túke akaná isyn pharó.

⁶ Ci tyrí vaga (bari patýv) ke Devél na déla túke zoraló patiaibén; ci tyré bidošengire džiibnastyr naštý te užakires lačhipén?

⁷ Priripir péske, ci xasijá vari-kon, kon sys bibangipnaskiro? I, ci sys adiáke, sob (kaj) devlytkoné manušén te čhurdén te xasjon.

⁸ So me mogindjom te dykháv, sys dová, so kon pharavela fuj phuvjá, i kon rosčhurdela bibáht syr ziárki dre phuv, odolé-pac' manušá i odová-pac' čhinena telé.

⁹ Jone xasjona Devléskire phurdypnastyr, Léskire-duhoskiri xolý pohala len sarésa.

¹⁰ Mek jone te rykinen syr ščerá (liévy), i te rykinen jone syr drieván mižeh ščericy, saroiekh terné – ščerenčire dandá phadjona.

¹¹ Phuranó ščer muljola, pal-dová so léske na uhtyléla (nádosi) so te riskirél dandenca, a ščericakire ščenken rosčhurdena.

¹² Akaná jekh lav čorahanés javdiá ke me, i miro kan šundiá, so jov gundiarindia (šepčyndia) mánge:

¹³ dre nábut trašane zdanki, so manúš dykhéla dro sunó ratý, kiéli xor soiben léla manušés:

¹⁴ dar pyjá pe mánde, i me izdrava adiáke, so saré miré kokalý trinskirenape;

¹⁵ i o dúho progijá pašýl mánde, i miré balá pe šeró terdiné.

¹⁶ Jov uštyjá i me na mogindjom te rozdykhav, syr jov vydycjola: léskiro stáno sys angíl miré jakhá; i me šundiem lokhi zan (glos), so phendiá:

¹⁷ Ci saštý te javél sob (kaj) manúš te javél čačunedyr Devléstyr? Ci saštý te javél, sob (kaj) manúš te javél butýr bibangipnaskiro syr Devél?

¹⁸ Dykh, Jov na dopatiala Péskire (bolybnáskire) dynar'jénge, i, Jov ginéla, so Léskire Jangóly isyn nagode,

¹⁹ i pe kicý butýr Jov na dopatiala manušénge, kon dživéla dre kherá blatatyr, so kirnjona, kon vyginé prahostyr, kon rospharavelape syr mol' (mel')!

²⁰ Jone pharadjona maribnastyr pe koterá zlokostyr (rankostyr) ke bel'vél', jone xasjona pe-usady (pe sak), so nijékh i na podykhela pe davá.

²¹ Ci na košenape léngire šatrakire šele (ci na xasjola léngiro lačhipén)? Jone meréna, i na džinéna godypén.