Ióvo 3 - Biblija - Pe Baltitko Romani čib (Romanes) 2019

Ióvo Žalinelape Devléske

¹ Paló davá Ióvo psiradia péskiro muj i prokostia (kerdiá armania) dyvés, dro savó jov bijándyja.

² I otphendiá Ióvo lavénca:

³ “Mek te xasjol dyvés, dro savó me bijandyjom, i rat, so rakiréna tedy: ‘O muršoro lathelape.’

⁴ Dová dyvés – mek jov te javél ciamlo; mek Devél te na ripirel pal dová dyvés, ci mek dud te na ziainel pe dová dyvés.

⁵ Mek kalypén i meribnaskiri zer (tien') te učhakirel dová dyvés, mek óbloki te jačénpe ŭsády (sak) pe léste, mek dyvesengiro kalypén te strahakirel dová dyvés.

⁶ I pe kodoia rat, sob (kaj) cjomnyma te zauhtylel la, mek te na čhuvén andré kodoia rat khetané beršeskire dyvesenca; mek joj te na zadžál dro čhonengiro ginybén.

⁷ Mek te javél čhučí (pusto) kodoia rat, mek radymakiri gódla te na javél nijékhvar dro kodoia rat.

⁸ Mek odolé, kon prokošela (keréla armania) dyvés, te prokošen (te kerén armania) pe doiá rat, savé isyn skedyné te ĥazdén Lieviafanos;

⁹ mek te murdjon tasiarlakire (rankoskire) čergeniá; mek kodoia rat te užakirel dud (svéto), ne les nane, i mek joj te na dykhél rankoskire cymbly (riesnicy):

¹⁰ pal-dová, syr joj na zaphandia pe klydyn vudará miré-dákire ločoviátyr, so lydžiné man, syr i na garadia pharipén miré jakhéndyr.

¹¹ Sóske me na myiem dre dákire masá, – syr me vydžavas dákire ločoviátyr i te na pharadjovav?

¹² Sóske, mirí daj lyjá man pe čangá? I vaš so treindiá mánge te žuiskirav dakiri ciuci?

¹³ Vaš dová, sob (kaj) me te pasjovav štylés péske, me javavas sutó péske: me otkhinjovavas péske,

¹⁴ khetané kral'jenca i godý-dyibnaskirenca, kon sys pe phuv, savé ĥazdyné fielatinia péske pe naobdživdle štéty,

¹⁵ ci thagar'jenca, konéste sys suvnakái, savé pherdiakirde péskire kherá rupésa:

¹⁶ ci sóske me na jacjom sýrby vyčhurdypnytko čhavoró ci sýrby tyknomas, savó nijékhvar na dykhciá dud (svéto).

¹⁷ Odój bibahtalé pirijačena te kerén doš, i odój khiniakirde otkhinjona (otphurdena).

¹⁸ Odój štaribnaskire manušá otkhinjona khetané, jone na javéna te šunén zan, kon pritasavelas len.

¹⁹ Tykné i drieván baré isyn odój, i pishárja isyn vol'na péskire randyr.

²⁰ Vaš so isyn manušéske dud (svéto), savéste isyn bari bída, i džiibén odolénge, konéske isyn kirko pe di,

²¹ i odolénge, kon tyrdelape, sob (kaj) te merén, ne meribén na javéla, i odolénge, kon rodéla meribén zoraledýr syr rodéna garadé barvalypena,

²² i savé zoralés radynenaspe i javénas ráda, kóli jone lathenas kónco (maĥila)? –

²³ ci konéskiro drom isyn garadó, i konés Devél učhakirdiá javriéstyr, syr tynosa.

²⁴ Pal-odová me dáva gondia angíl, syr te xav, i miré godlia, syr me dáva gondia (uzdyhinava), čhuvenape syr paniá.

²⁵ Pal-odová so doiá-pac' dar, – sóstyr me darandyjom, i pyjá pe mánde i dová-pac', – sóstyr me trašadyjom, – dová javdiá ke me.

²⁶ Me som dre dar, me na som štyl, me na otkhinyjom, i bari bída javdiá.”