Ióvo 12 - Biblija - Pe Baltitko Romani čib (Romanes) 2019

Ióvo Nevés Otphenéla

¹ I otphendiá Ióvo lavénca:

² “Čačó, tumé san manušá i godypén meréla tuménca.

³ Ne me adiáke-pac' but ĥaljovava, syr i tumé, me na som teledýr tuméndyr; i, čačó, kon na džinéla saró davá, so tumé phendlé?

⁴ Me som jekh manúš, pe konéste drúgo (mal) dykhéla bangé mósa, – me, kon kharéla Devlés, i konéske Jov otphenéla: Me, devlýtko i čačunó manúš, jacjom sabnasa vaš javirénge.

⁵ Vol'na manušá dre godý sýrby dykhéna bangé mósa pe odolénde, savengire ĥerá bandine sýrby bída.

⁶ Rozmaribnytkonengire šátry ziainena mištypnasa, i kodolé, savé prezentynena Devlés, dživéna bidarakiro, – davá déla lénge Devél Péskire vastésa.

⁷ Ne akaná phučenpe kheritkoné murdaléndyr (skotóstyr), i jone javéna te sykliakirén tumen i bolybnáskire čirikliendyr, i jone phenéna tuménge;

⁸ ci rakirén phuvjása, i joj vysykliakirela tumen, ci morjoskire (derjavéskire) mačhé phenéna tuménge.

⁹ Kon džinéla davá, so Devléskiro vast sozdyjá len;

¹⁰ so Léskiro vast rikiréla džiibén pe kažno (sváko) džidó di.

¹¹ Ci na sprobinena tumaré kaná lavá, syr i muj čuinela xabén?

¹² Godypén isyn phuré manušénde, i manúš léla te ĥaljol butýr džiibnáskire dyveséndyr.

¹³ Ne Devléste isyn godypén i zoralypén, Jov déla godý i ĥaljola.

¹⁴ Ĥáda, Jov phagiréla, i dová uže na kerésa nevéstyr (znoko): Jov phandela manušés dro štaribén i nane otmekiben pe vólia.

¹⁵ Ĥáda, Jov pririkirela paniá, i jone vyšutjona: i Jov bičhavéla len angle, i jone riskirena telé phuv.

¹⁶ Devléste isyn zoralypén i godypnaskiro džinybén, xohade manušá i xohaibnaskire isyn dre Léskiri zor.

¹⁷ Jov lydžála godý-dyibnaskiren te kerén doša, Jov keréla sendar'jen dylynenca.

¹⁸ Jov léla krig zor kral'jéndyr, Jov phandela kustyka pe léngire trušula (čriéslo).

¹⁹ Jov lydžála rašán te kerén doša, i ravela telé zoralypnaskiren,

²⁰ Jov léla krig čib šukár-rakiribnaskirendyr (vielieriečyvonendyr) i keréla adiáke, so phuré pirijačena lačhés te rozĥaljon;

²¹ Jov vyčhuvela nakutiakiriben pe thagar'jénde i Jov rozvastakirela zoralypnaskiren;

²² Jov rosčhakirela xor koterá ciamlypnastyr i Jov janéla meribnaskiri zer (tien') pe dud;

²³ Jov pribarjakirela manušýtka nácyi i vymarela len; Jov rosčhurdela manušýtka nácyi i kedela len khetané.

²⁴ Jov léla krig godý manušéngire šeralendyr pe phuv, i keréla adiáke, so jone psiréna adiáke, syr pir bidromeskiri čhučí phuv.

²⁵ Jone psiréna, čilavi vasténca dro kalypén, kaj dud nane, i Jov keréla adiáke, so jone kuninenape (šatynenape) syr mate.