Ióvo 11 - Biblija - Pe Baltitko Romani čib (Romanes) 2019

Sofaro začhuvela Iovos te Pridžinel Grehi

¹ Tén'ci Sofaro Naamostyr otphendiá lavénca:

² “Ci naštý te otphenes pe but phučibena? Ci buté-rakiribnytkone manušénge javír manušá isyn bangé te phenén, so léskiro isyn čačipén?

³ Ci so tyró xohanó rakiribén začhuvela manušén te javén dro ramánjo (miro)? Ci syr tu sasape xoliames, tedy so ž naštý te ladžakiren tut?

⁴ Pal-dová so tu ž phendián: “Miré-patiaibnaskiro sykliakiribén isyn bibangiakiri, i me som bidošéngiro dre tumaré jakhá.”

⁵ Ne, sob (kaj) Devél te lel te rakirél i te otkerel Péskire uštá pe túte;

⁶ i, sob (kaj) Jov te sykavél túke godypnaskire čorahanybena, syr davá isyn, so jone dre duj móly piridžana dová, so Tyrí godý saštý te poduminel. Džin, so Devél otmekéla túke but tyré čoripnástyr.

⁷ Ci moginésa tu te rozĥaljos saró xoripén, Savó Devél isyn?

⁸ Ci moginésa tu te ĥaljos Sarezorjakire Devlés ke pherdypen?

⁹ Džinybén pal Devléste isyn dlengedyr phuvjátyr i isyn buĥledyr morjostyr (derjavestyr).

¹⁰ Kóli Jov prodžála pašýl, Jov phandela dre zandirjá (cépi/kovy) i Jov kharéla pe séndo, kon moginéla (saštý) te terdjol proti Léste?

¹¹ Pal-dová so Jov džinéla godiakire manušén; Jov adiáke-pac' dykhéla fuipén tedy, kiéli manúš naštý až i te poduminel;

¹² ne bigodypnaskiro manúš naštý te javél godytko, rovnes adiáke-pac' syr i manúš saštý te bijandjol dasavo sýrby khuroro busone (dikone) oslicatyr.

¹³ Kóli tu riskiresa mištés tyró iló i protyrdesa péskire vastá ke Jov,

¹⁴ i čhuvésa čoripén dur péskire vasténdyr i tu na domekesa, sob (kaj) fuipén te dživén dre tyré šátry,

¹⁵ tedy tu bi kunipnaskiro moginesas te ĥazdes péskiro bidošéngiro šeró, i tu javésa nabadiakiribnytko, i tu na daresas nisostyr,

¹⁶ pal-dová so tu bistresa pal tyrí bari bída, i pririkiresa pal láte sýrby pal paniá, so našné krig,

¹⁷ i tyró džiibén javéla jasnedyr parné dyveséstyr, mek i sys ciamlo túte dre jakhá, na javéla jasno syr zlóko (ránko).

¹⁸ I javéla túte zoraló patiaibén, pal-dová so túte javéla nadiéia, i kaj tu na rozdykhesa paš péste, javésa te otkhinjos bi darákiro.

¹⁹ I javésa tu te pasjos, i nijékh na javéla te darakirel tut, i but manušá javéna te phenén pomija (pljotki), sob (kaj) te pokerenpe túke.

²⁰ Ne fujé-manušéngiro dykhibén xasjola, i jone na našéna bidatyr, i léngiri nadiéia pirijačéla te dyhinel syr i léngiro džiibén.”