Ióvo 10 - Biblija - Pe Baltitko Romani čib (Romanes) 2019

Ióvo Kaméla te Mangel Devlés

¹ Miro di khinyja miré džiibnastyr: me dáva vólia péske te tanginavpe (te žalinavpe), me javáva te rakiráv miré dieskire kirkipnastyr.

² Me phenáva Devléske: “Na sendiakir zoralés man. Sykáv mánge, pal so Tu lydžása čingárd (sora) mánca.”

³ Savó ž lačhipén isyn Túke, so Tu tasavesa, so Tu dykhésa vyčipnastyr pe davá, so Tyré vastá sozdyne? I Tu ziainesa manušéngire skedyniatyr?

⁴ Ci isyn Túte jakhá, syr aménde? Ci dykhésa Tu, syr manúš?

⁵ Ci isyn Túte, dasavé-pac' dyvesá, syr manušéste, kon meréla?

⁶ So Tu rodesa doš dre mánde, i so Tu vyphučesa pal grého dre mánde?

⁷ Kon – syr na Tu, džinésa, so me na som fuj, i nane nijékh te zrakhél man Tyré vastéstyr?

⁸ Tyré vastá khudé khetané man i sozdyne man – savó me som; i akaná Tu xasiakiresa man!

⁹ Rípir, so Tu sozdyjan man syr gleja (glina), i Tu ž pirikiresa man pale dro práho.

¹⁰ Ci na Tu vyčhudian man syr thud? I ci na Tu vytolčindian man syr ĥensto kiral?

¹¹ Tu učhakirdian man cypasa i masenca, i Tu pirikhudian man kokalenca i žylenca;

¹² Tu darindian (podyjan) mánge džiibén i Tyrí láska, i dová, so Tu pekesape pal mánde, rakhcian miro dúho (fáno).

¹³ I saró davá Tu garadian dro péskiro iló, me džinóm: davá isys Túte pe godý.

¹⁴ Kóli me keráva gréhi, tén'či Tu zarikiresa len dre godý. I Tu na otčhakiresa man miré čoripnástyr.

¹⁵ Kóli me som fuj manúš, tedy bída pe mánde! Rovnes syr i kóli čačipén isyn pal mánde, me naštý te ĥazdav miro šeró. Me som, dre bipatyv, mánde isyn pherdó bibahtia.

¹⁶ Mirí bibáht barjola: Tu tradesape pal mánde sýrby drieván mižeh ščer (liévo); i nevéstyr Tu sykavesa péskiro zoralypén ke dar pe mánde.

¹⁷ Tu bičhavesa ŭsa nevoné jakhitkonen pe mánde, i Tu barjakiresa péskiri xolý pe mánde, Tu ŭsa paruvesa Péskiro maribén pe mánde.

¹⁸ I vaš so Tu domekhcian, sob (kaj) me te vydžav dákire ločatyr? Mánge javélas kónco (jagóro) i nijékh jakh te na dykhélas man.

¹⁹ Me javavas sýrby me i na sómas nijékhvar, man pirilydžanas ločoviátyr ke mulykano (ke ĥrobo).

²⁰ Ci nábut (kutý) dyvesá, so jačnépe vaš mánge? Pirijač, Dévla! Jačkir man jekhdžines, sob (kaj) mánge nábut te otdžidjovav.

²¹ Angíl dová, syr me džáva i nijékhvar na risjováva pale, – ke c'makiro them (strana) i tel meribnaskiri zer (tien');

²² ke tugitko them kalypnasa, savó isyn syr kalypén kokoró, so kaj nane giiben, kaj dud isyn syr ĥensto kalypén.”