Džiibén 1 - Biblija - Pe Baltitko Romani čib (Romanes) 2019

Syr Devél Sozdyjá Svéto (Lot)

¹ Angledýr saréstyr Devél sozdyjá bolybén i phuv.

² Phuv sys biformákiri i čhučí (pusto), kalypén sys pe saró xoripén (biézdna), i Devléskiro Dúho (Fáno) kharélaspe (dviginelaspe) uprál paniá.

³ I phendiá Devél: “Mek te javél dud (svéto).” I dud jaciá.

⁴ I dykhciá Devél dud, so jov sys šukár; i roskerdiá (rosčhudiá) Devél dud kalypnástyr.

⁵ I dyjá lav Devél dudéske Dyvés, a kalypnáske Rat. I sys bel'vél' i sys zlóko (ránko)-pérvo dyvés.

⁶ I phendiá Devél: “Mek te javél svódo (tvierd') maškír paní, i mek jov te roskerél paní paniéstyr.”

⁷ I kerdiá Devél svódo, i roskerdiá paní, savó sys tel buĥló svódo dolé paniéstyr, i savó sys uprál, kaj sys buĥló svódo. I jaciá adiáke.

⁸ I dyjá lav Devél svodóske Bolybén. I sys bel'vél', i sys zlóko (ránko) – javír dyvés.

⁹ I phendiá Devél: “Mek te skedénpe paniá, savé sys tel bolybén, dro jekh štéto, i mek te jačél šukí phuv.” I jaciá adiáke.

¹⁰ I dyjá lav Devél šuké phuvjake, Phuv, a paniénge, savé sys skedyné, Móri (Derjavá). I dykhciá Devél, so davá sys šukár.

¹¹ I phendiá Devél: “Mek te barjakirel phuv zelenyben, čar, saví déla siemi (viringli); i kašt (drévo), savó déla barjakirdó (plódo) pir péskiro ródo, saveskire siémi isyn pe phuv.” I jaciá adiáke.

¹² I barjakirdia phuv zelenyben; čar, saví déla siemjo; i kašt (drévo), savó déla barjakirdó (plódo) pir péskiro ródo, saveskire siemi isyn pe phuv. I dykhciá Devél, so davá sys šukár.

¹³ I sys bel'vél', i sys zlóko (ránko) – tríto dyvés.

¹⁴ Tén'ci phendiá Devél: “Mek te javén duda (svietily) pe svódo pir bolybén, sob (kaj) jone te roskeren dyvés ratiatyr, sob (kaj) jone te javén syr znamiénii (ĥiertyká) vaš časy (cyry), dyvesá i beršá;

¹⁵ i mek te javén duda pe svódo pir bolybén, sob (kaj) te den dud pe phuv.” I jaciá adiáke.

¹⁶ I kerdiá Devél duj baré duda: jekh baredýr dud, sob (kaj) te rikirél zor pe dyvesá, jekh tyknedýr dud, sob (kaj) te rikirél zor pe ratia, adiáke-pac' i čergeniá.

¹⁷ I čhudiá Devél len pe svódo pir bolybén, sob (kaj) jone te den dud pe phuv,

¹⁸ i te rikirén zor pe dyvesá i ratia, i te roskeren (te rosčhuven) dud (svéto) kalypnástyr. I dykhciá Devél, so davá sys šukár.

¹⁹ I sys bel'vél' i sys zlóko (ránko) – štárto dyvés.

²⁰ I phendiá Devél: “Mek te javén paniá pherdé odolenca [mek te sozden paniá odolén-r.s.], savé polzynena, savé isyn džidé, i mek te vurnian čirikliá uprál phuv pir bolybén.”

²¹ I sozdyjá Devél baren morjoskire (derjavéskire) mačhen, i každo džidó di, savó kharélape, savénca paniá isyn pherdé pir péskiro ródo, i rázna čirikliá phakenca pir péskiro ródo. I dykhciá Devél, so davá sys šukár.

²² I bahtiakirdiá Devél len, rakirí: “Bijanen i te javén tumen but-but, i pherdiakiren paniá dre móri (derjavá), mek te bijandjon but čirikliá pe phuv.”

²³ I sys bel'vél', i sys zlóko (ránko)-pándžto dyvés.

²⁴ I phendiá Devél: “Mek phuv te del džiibén džidé dieske pir péskiro ródo; kheritkoné murdalénge (skotoske) i capnienge, polzučone džidypnenge i murdalénge pir phuv, kažnonéske pir péskiro ródo.” I jaciá adiáke.

²⁵ I sozdyjá Devél phuvitkone murdalén pir léngiro ródo, i kheritkoné murdalén pir léngiro ródo, i kažnona capnia pe phuv pir péskiro ródo. I dykhciá Devél, so davá sys šukár.

²⁶ I phendiá Devél: “Sozdasa manušés, sob (kaj) jov te udelpe pir Amarí patrín (óbrazo), sob (kaj) jov te javél kadasavó-pac' syr Ame sam; i mek jov te xulainél pe morjoskire (derjavéskire) mačhende, pe bolybnáskire čirikliende, i pe kheritkoné murdalénde i pe sarí phuv, i pe saré capniende, savé polzynena pir phuv.”

²⁷ I sozdyjá Devél manušés pir Péskiri patrín (óbrazo), pir Devléskiri patrín (óbrazo) Jov sozdyjá les: muršés i džuvliá sozdyjá Jov.

²⁸ I bahtiakirdiá Devél len, i Devél phendiá lénge: “Bijanen i te javén tumen but-but, i pherdiakiren phuv i te len zor pe láte, i te xulainen tumé pe morjoskire (derjavéskire) mačhende, i pe bolybnáskire čirikliénde i pe kažnoné murdaléste, savó kharélape pir phuv.”

²⁹ I phendiá Devél: “Áke, Me dyjom tuménge kažno čar, saví déla siemi (viringli), so isyn pe phuv, i kažno kašt (drévo), dro savó isyn kaštuno siemjo, savó déla barjakirdé (plódy): davá javéla xabén tuménge.

³⁰ I kažnoné murdaleske pe phuv i kažnoné bolybnáskire čirikliake, i kažnoné capniake, saví polzynela pir phuv, i dre savénde isyn džidó di Me dyjom kažno zeleny (zeleno) čar te xan.” I jaciá adiáke.

³¹ I dykhciá Devél, so Jov sozdyjá i, ake, davá sys drieván šukár. I sys bel'vél', i sys zlóko (ránko) – šóvto dyvés.