Дание́лё 1 - Biblija - Pe Baltitko Romani čib (Romanes) 2019

O Danijéljo i Léskire Malá Kandéna Devlés

¹ Pe tríto berš Ioakimoskire (Jakimoskire) kralipnaskiro, Judejákire kralískiro, javdiá o Navuhodonosóro, Vavilonóskiro králi, ke Jerusalimo i obgija les trusciál xaladybnasa.

² I dyjá o Raj Devél dro léskiro vast e Iokimos, Judejákire kralís, i adákicy khoré (sasúdy) Devlytkoné kheréstyr, i jov bičhadiá len pe phuv Sienoar, ke léskire Devléskiro kher, i jandiá adalé saré khoré dre piralý vaš kazna léskire devleskiri.

³ I phendiá o králi Asfienazoske, kon sys barydyró léskire jevnuhengiro, sob (kaj) jov te janel Izrailjoskire čhavén, savé te javén kralitkone i thagaritkone rodóstyr,

⁴ terné-beršengiren (otroken), savénde nane nisave doša dre masá (štalto), gožone mósa, sob (kaj) jone te ĥaljon te sykljon dro kažno godypén, dro džinybén i sýges te ĥaljon, savé moginénas (dénas ráda) te dynarinén (te služynen) dre kralískiri felatin (kolóv), i, sob (kaj) te sykliakirén len Xaldieitkone lylvaripnaske (gramotake) i čibake (čibjake).

⁵ I vydyja lénge králi sodyvesytko xabén kralískire skamindestyr i mol (vino), saví jov kokoró p'jelas, i phendiá len te sykliakirén trin berš, sob (kaj) dro kónco (dro jagóro) sykliakiribnaske (učobake) jone moginénas (dénas ráda) te terdjon te dynarinén angíl kralíste.

⁶ Maškir lénde sys Judáskire čhavéndyr o Danijéljo, o Ananija, o Misailo i o Azárija.

⁷ I pirikhardia len barydyró jevnuhengiro – o Danijéljo jaciá o Valtasaro, o Ananija – o Siedraho, o Misailo – o Misaho i Azárija o Avied-Niego.

⁸ O Danijéljo čhudiá dro peskro iló, sob (kaj) te na magirelpe xabnasa kralitkone skamindestyr i moliasa, saví p'jelas o králi, i paldavá mangdiá e barydyrés jevnuhengires pal dová, sob (kaj) javélas saštý léske te na magirelpe.

⁹ Dyjá o Devél Danijeljoske láska i lačhipén jevnuhengire barydyrestyr;

¹⁰ i o jevnuhengiro barydyró phendiá Danijeljoske: “Me darava miré rástyr kralístyr, savó kokoró priphendiá tuménge xabén i pibén. I paldavá, syr dykhéla o králi tumaré muiá sanedyr, syr terné manušénde tumaré jekhe-beršengirendyr, to javéla miro šeró bangó angíl kralíste pale tuménde.”

¹¹ Tén'ci phendiá o Danijéljo Amielsaroske, dykhibnaskireske, savés jevnuhengiro barydyró pričhudia ke Danijéljo, Ananija, Misailo i Azárija:

¹² “Me mangáva tut: propatiakir tyré pishar'jén pir deš dyvesá; i mek te den aménge te xas šahá (ovoščy) i paní te pjas;

¹³ tén'či te javén angíl túte amaré muiá i e muiá odolé terné-beršengire, savé xanas kralítko xabén, korigedýr (pozžedýr) ker tyré pishar'jénca dová, so tu dykhésa lačhés.”

¹⁴ Jov kandyjá len dro dová i propatiakirdia len pir deš dyvesá.

¹⁵ Ake, pe kónco (jagóro) kadalé deš dyvesengire mina pe léngire muiá jaciá gožedyr, i jone sys zoraledýr odolén terné-beršengirendyr, savé xanas kralítko xabén.

¹⁶ I Amielsaro, léngiro dykhibnaskiro, lelas krig léngiro xabén i mol vaš pibén léndyr, i délas lénge šaha.

¹⁷ I dyjá o Devél štarenge adalé terné-beršengirenge džinybén i ĥalyibén dre kažno lylvarí i godý, a Danijeljoske iščo (inké) dyjá ĥalyibén dro kažno dykhibén, i dre suné.

¹⁸ Pe kónco (jagóro) dolé dyvesengiro, kiéli o králi priphendiá te sykavén len, o barydyró jevnuhengiro sykadiá len Navuhodonosoroske.

¹⁹ I rakirlas lénca o králi, i saréndyr terné-beršengiren na lathiape kadasaven, syr Danijéljo, Ananija, Misailo i Azárija, i lyné jone te dynarinén angíl kralíste.

²⁰ I dro kažno godó réndo i léngiro rozĥalyiben, pal so phučelas léndyr o králi, jov lathelas len dro deš mol fedýr sarén čovahanendyr i magendyr, savé sys dro saró kralipén léskiro.

²¹ I sys odój o Danijelio ke/žýko pérvo berš o Kiraskire kralískiro.