Vygiiben 1 - Библия - Пэ Балтитко Романи чиб (Романэс) 2019

Израилёскирэ Чхавэ́н Притасавэна

¹ Ѓа́да (Акэ), исын Израилёскирэ-чхавэ́нгирэ лава́, савэ́ загинэ́ Яковоса дро Еги́пто, загинэ́ кажно пэ́скирэ кхэрэса:

² Рувимо, Симеоно, Левиё и Юда,

³ Исахаро, Завулоно и Вениамино,

⁴ Дано и Нефалимо, Гадо и Асиро.

⁵ Сарэ́н манушэ́н, савэ́ выгинэ́ Яковостыр, сыс эфтадэша́, а Ёза (Иосифо) сыс англэды́р кэ Еги́пто.

⁶ И мыя́ Ёза (Иосифо) и сарэ́ лэ́скирэ пша́ла, и саро́ лэ́скиро ро́до;

⁷ а Израилёскирэ чхавэ́ ячнэ́ бут, и ёнэ розбаринэпэ и ячнэ́ ёнэ древа́н зоралэ́, и доя́ пхув пхэрдия лэ́нца.

⁸ И тэрдия́ дро Еги́пто нэво́ кра́ли, саво́ на джиндя́ Ёзас (Иосифос),

⁹ и пхэндя́ пэ́скирэ манушэ́нгэ: “Ѓа́да, Израилёскирэ-чхавэ́нгирэ мануша́, лэн исын древа́н бут и ёнэ исын зоралэды́р амэ́ндыр;

¹⁰ акэ, хохаваса лэн, соб (кай) лэн тэ на явэ́л бут, пал-дова́ со, ке́ли явэ́ла марибэ́н, то кхэтанякирэнапэ ёнэ амарэ́ вэргэнца (врогэнца), и джа́на пэ амэ́ндэ, и выджа́на амарэ́ пхувья́тыр.”

¹¹ И чхудэ́ пэ лэ́ндэ барыдырэ́н пэ буты́, соб (кай) тэ мэнчынэн лэн пхарэ́ бутенца. И ёнэ кэрдэ́ фараоно́скэ Пифомо и Раамсесо, фо́рья, ваш пригараибэн (запасы).

¹² Нэ со лэн буты́р мэнчындлэ, то лэн буты́р бияндёна, и буты́р ёнэ барьёна адя́кэ, со ёнэ, Египтя́ни, дара́ндынэ Израилёскирэ чхавэ́ндыр.

¹³ И палдава́ Египтя́ни зачхувэнас би тангипнаскиро (би жалостякиро) Израилёскирэ чхавэ́н тэ кэрэ́н пхарэ́ бутя́

¹⁴ и лэ́нгиро джиибэ́н кэрдэ́ киркэса пхарэ́ бутя́тыр пэ ґлина (глэя) и бара́, и кажнонэ́ фэлдакирэ бутя́тыр, кэ кажно буты́, кэ сави́ зачхудэ лэн тэ кэрэ́н марибна́са.

¹⁵ Египто́скиро кра́ли припхэндя́ пхурьенгэ, савэ́ бабинэнас тыкнэмасэн (биятэ́н) Юдыцэндэ, лэ́ндыр екхакиро лав сыс Шыфра, а явирьякиро Фуа,

¹⁶ и пхэндя́: “Ке́ли тумэ́ явэ́на тэ бабинэн чхаворэ́н Юдыцэндэ, то тумэ́ дыкхэ́н, сыр ёнэ биянэна: ко́ли явэ́ла чхаво́, тэды мулякирэ́н лэс; а ко́ли чхай, тэды мэк тэ дживэ́л.”

¹⁷ Нэ пхурья, савэ́ бабиндлэ тыкнэмасэн, сыр джувлы́ биянэ́ла, дара́ндынэ Дэвлэ́стыр, и на кэрдэ́ адя́кэ, сыр ракирдя́ лэ́нгэ Египто́скиро кра́ли, и ячкирэнас чхаворэ́н джидэнца.

¹⁸ Египто́скиро кра́ли кхардя́ кхэтанэ́ пхурьен, савэ́ бабиндлэ тыкнэмасэн и пхэндя́ лэ́нгэ: “Ваш со тумэ́ кэрэ́на дасаво рэ́ндо (де́ло), со мэкэ́на чхаворэ́н джидэн?”

¹⁹ Пхурья, савэ́ бабинэнас тыкнэмасэн, отпхэндлэ́ фараоно́скэ: “Юдэ́нгирэ джувля́ на адя́кэ, сыр Египто́скирэ; ёнэ исын зоралэ́, пал-дова́ со англэды́р, сыр явэ́ла кэ ёнэ пхури, сави́ бабинэла тыкнэмасэс, ёнэ ужэ бияндлэ.”

²⁰ Дэвэ́л палдава́ кэрдя́ лачхипэ́н пхурьенгэ, савэ́ бабинэнас тыкнэмасэн; а мануша́ ячэнас бут и ёнэ древа́н зоралёнас.

²¹ И адя́кэ сыр пхурья, савэ́ бабиндлэ тыкнэмасэн, дара́ндынэ Дэвлэ́стыр, то Ёв кэрдя́ лэ́нгэ кхэра́.

²² Тэды фарао́но припхэндя́ сарэ́нгэ пэ́скирэ манушэ́нгэ: “Кажнонэс чхавэ́с, саво́ бияндёла Юдэ́ндэ, чхурдэ́н дрэ рэка (лэнь); а кажнона чха ячкирэн тэ дживэ́л.”