Yakobo 1 - Kirimi New Testament

Iramucho

¹ Nene Yakobo, mutumami wa Muungu na wamwa Müküü Yesu Kiristo, ngumwandëkëa nyenye, makabila ikumi na avëë, nëafaghatëe muurëmi. Amuchi!

Uhuvëi na ihaa

² Anyandughu vanë, mutendeke mwina uyanjo utüfu na maighiyo hiyahiya,

³ gusoko mumanyie mwino uëghëëywa gwa uhuvëi wanyu ugumweetea ughimëëyi.

⁴ Mumanye mwino ughimëëyi wanyu ugumwimëcha faka mpeo, mudahe utendeka mwi vaja ino na mukhondekie, gwa udëa ukefewa ukhani mba umwe.

⁵ Ëgweeso nësa umwe wanyu wakefewa ihaa, uvii imunoneye amurombe Muungu nëugudaha umufa, gusoko Muungu uguvafaa voong'e gwa gëhe.

⁶ Ëgweeso imunoneye arombe gwa uhuvëi gwa udëa uhanga wisaghasaghëi mbanduvë. Muntu nëwina wisaghasaghëi wë mwino mafefe a irambo në iküü asaa në ëgusuntëëywa na ugümangwa na mpefo.

⁷ Muntu në wëë gëtë wasuu atasëghee uguhanga intu mbarëmwe ufuma kunë Müküü.

⁸ Muntu në wina masëgho igavëë wina wësaghesangëe mu njëa yakwe yong'e.

Ütuki nanë ughwarë

⁹ Munyandughu në mütuki imunoneye ayanje itungo në Muungu wamuhumbuchaa,

¹⁰ na mughwarë noo imunoneye ayanje në watununtiwaa na Muungu. Gusoko mughwarë uguwüra mwino sembe.

¹¹ Yuva rëuduaa na gwa ufyu wayo në ukharë ugumyaa nkinda, nanë sembe yayo igügwaa, na uja wakwe woong'e ügüruvëkaa. Vii uvii, mughwarë ugumeeywa mumantu akwe.

Ufiimwa na Ughemwa

¹² Bahu akwe muntu nëugimëka vija mumaghemwa, gusoko nëwaghimëëya ugufewa gëfewa ga ufanga gasëë në Muungu wawafee iraghano vasaa nëvëmwaanjëte.

¹³ Në muntu waigheeywa atahanyee: “nëuigheeywa na Muungu.” Gusoko Muungu atiuigheywa na uvë, mbesa mweeso atuigheeywa në muntu mbaumwe.

¹⁴ Ëgweeso muntu uguigheywa nauguutwa na ukwatiwa na nkümbü yakwe në mbë.

¹⁵ Nkümbü nëavëya igufafaa ihutye në ibë, ihutye ryeesonoo nërakhoma rëufafaa nkuya.

¹⁶ Anyandughu vanë, ayanjwi, mutagikhongee!

¹⁷ Muu gëfewa në gëja na muu gëfëwa nëgëkhondekie gëufumaa girunde, gëufumaa kunë Tata, mutundi wa vimwëë, mweeso nëatiukhaanëkëkaa mbesa atikweti gahada manduvë ga ufëëntukanga.

¹⁸ Gwa iyanje rakwe mweeso mughonjo agagufafa sese gwa ukhani wa tutë akwe gudahe utendeka nkhari ya mwandyo mukhatë a ntundo yakwe.

Utegheeya na Utenda

¹⁹ Anyandughu vanë ayanjwi, rëkümbükwi ihanyo ërëë. Muu muntu na atendeke mworo wa utegheeya, ëgweeso ti mworo wa urighëëtya na ti mworo wa ukwatwa ikuwo.

²⁰ Munya ikuwo atiudaha uyatenda asaa në Muungu uguyafenjaa në atutë.

²¹ Gwa uvii, üjughuti kureengë mwenendo në uvë na nduvi yoong'e nëmbë, ivëki fang'ë amwa Muungu na ughenyifa ukhani uroo nëwafandëwe munkhoo yanyu, wasuu nëudahëte uyityoa nkhoo yanyu.

²² Mutikhongee nyenye aghonjo, gwa utegheeya gutufu ukhani wakwe, ëgweeso tendi mwino ukhani uguhanya.

²³ Muntu gëkaku nëuguutegheeyaa ukhani wasuu gweeso atiutenda mwino uguhanya, wasuu wëë mwino muntu nëugiraraavaa ikeru rakwe mughonjo mu giroore.

²⁴ Ugiraravaa mweeso mughonjo, faafo ugwendaa kunë winjë, na muu gënyafaafo ugyëwaa mwino chu urë.

²⁵ Ëgweeso muntu nëugumëraraavaa vija seria në ëkhondekie asëë në ëguvafaa antu uhaghaaro, muntu nëufwaghëëre umëkwatëëra, na ti umëtegheeya gutufu na ukoo usonge umëwa, ëgweeso utenda mwino ëguhanya, muntu wasuu uguforiwa mu gëntu në ugugëtenda.

²⁶ Nësa muntu ugiona mwino në muntu në wina diini, gweeso atiudaha uwibala urëmë wakwe, diini akwe ëtinoneye intu mbanduvë, na ugikhonga mweeso mughonjo.

²⁷ Diini nënjija ino na në ëtikweti ihondo usonge a Muungu Tata unë chëëyë: Uvaarëëya anaakëva nanë ahimbë mu malwe awe, na gighoja mughonjo utakhombwee na urëmi uruu.